3 Wana nin niꞌbat ni Jesus, “Isipen moyoyti nin maong: Kasa gapo ni saya nin makakiramaꞌ sa pagꞌaadiꞌ nan Dios no kai ya nin paitawo nin uman^a a sayay tawo.”

4 Wana ni Nicodemo, “Impusibli a maiyanak yay sayay matuntawo ana! Magwaꞌ na para a paitawo et sa luob nin tyan nan ina na?”

5 Niꞌbat na ni Jesus, “Isipen moyoyti nin maong: Kasa gapo nin makakiramaꞌ sa pagꞌaadiꞌ nan Dios no kai ya anaod nin maiyanak nin uman a sayay tawo sa dalan nin ranom tan dalan nan Ispirito nan Dios. 6 Wanin ta si sayay mangibwat sa tawo, ket kinatawo tamoꞌ a main kona; anamaet, si sayay mangibwat konan Ispirito nan Dios, kinaDios a main kona. 7 Andiꞌ ka edet nin mabigraꞌ no ibaritaꞌ ko komo a matkap moyon tutawo a paitawo nin uman! 8 Say pangibwaten nan mangyadiꞌ nin Ispirito nan Dios konan tawon naiyanak nin uman ket iyalimbawaꞌ ana sa siri. Makauray ya sa puntawen na. Maaraman ma baleꞌ, kai mo nin matandaan a pangibwatan na o a puntawen na.”

9 Ket nitepet na anamaet ni Nicodemo a wana, “Paꞌno wadiꞌ nin mangyadiꞌ in?”

10 “Ani?” wana ni Jesus. “Saya kamo nin manrispitwen nin mangangakay iti sa Israel ket kai moyo in mangkaalilbiꞌ? 11 Isipen moyoyti nin maong: Say ibaritaꞌ mi ket say tandaꞌ mi tan say naꞌkit mi. Baleꞌ siꞌkamo, kai kamo nin mamper sa manꞌibaritaꞌ mi. 12 Anta mampangibaritaꞌ ako komoyo nin mangibwat sa say pupangyadiꞌ iti sa mundo, kai moyo nin tepren. Ket tepren moyo kasi no mangibaritaꞌ ako nin maipaꞌkaꞌ sa man-gawꞌen itaw sa langit? 13 Siꞌko tamoꞌ nin si Pinaitawo nin nangibwat itaw sa langit a makaibaritaꞌ nin maipaꞌkaꞌ sa sain a bubagay, ta kasa et gapo anaod nin raruman nakapikaꞌ itaw no kai siꞌko tamoꞌ.

14 Ket say mangyadiꞌ kongko, ket kapadaytaw say nipangitaꞌgay na ni Moises konan pusti a si ginwaꞌ nin bakas nin ulay sin itaw saray Israelita sa lugar a kasan tawo.^b Wanin ta siꞌkon si Pinaitawo, matkap a itaꞌgay ako liꞌ anamaet 15 ta pigaw nin si siꞌnuman a magmatalek kongko ket magkamain ya nin anggan-angga nin byay a iti konan Dios. 16 Oꞌ, ta wanin ana a pangangawaꞌnan nan Dios kontamo nin tutawo, kanyaꞌ nin kai naya nin nisiblet, no kai edet, nibi naya a Anak na nin kapagkapag ta pigaw nin si siꞌnuman a magmatalek kona nin Anak na ket kai ya nin maisyay konan Dios ta pigaw nin madusa ya, no kai edet, magkamain ya nin anggan-angga nin byay a iti konan Dios. 17 Wanin ta si Dios, kai naya nin nibakiꞌ a Anak na iti sa mundo ta pigaw nin sintinsyawan nasaray tutawo, no kai edet, ta pigaw nin maisalba sara nin nipadalan kona.

18 Saray magmatalek konan Anak nan Dios, kai sarayna nin sintinsyawan nin madusa, baleꞌ saray kai nin magmatalek, nasintinsyawan sarayna nin madusa banaꞌ anaod ta kai sara nin magmatalek konan kapagkapag a Anak nan Dios. 19 Siti a rason a madusa sara: Si palaway nin mamalaway nin kaisipan ran tutawo ket nako yadti sa mundo baleꞌ, mas maalaga konra a kadedleman dyan say palaway. Wanin ta say man-gawꞌe-gawꞌen ra ket dukaꞌ. 20 Oꞌ ta saray mampangwaꞌ nin dukaꞌ ket kai ra nin rabay a palaway tan kai ra nin rabay a mako sa palaway banaꞌ ta, no mako sara ket maipadar a gawaꞌ-gawaꞌ ra. 21 Baleꞌ saray sumunor sa katutuꞌwan a nipadar nan Dios, umarak sara sa palaway ta pigaw nin maipaꞌkit nin mapalaway a say ginwaꞌ ra ket katutulok ra konan Dios.”

22 Sin nayadiꞌ in, nako ya si Jesus tan saray tumutumbok na sa raruman lugar sa prubinsya nin Judea. Ket itaw sarayna yapoꞌ nin nitanda-tandaan saran maong tan namawti-bawtismo sara. 23-24 Si Juan anamaet, mampamawti-bawtismo yadtaw sa Enon nin adani sa Salim ta raranom itaw nin lugar. (Sin sain ket kai ya et nin mangkapriso si Juan.) Kasan tegen ran mako nin tutawo kona ket binawti-bawtismwan nasara.

25 Banaꞌ ta wanin, sayay awro, nikidiskusyon saray tumutumbok na ni Juan konan sayay Judio maipaꞌkaꞌ sa saka-sakalakon kaugalian a maringgasan yay sayay tawo sa pangingikit nan Dios. 26 Ket nako saraytaw nin tumutumbok kona ni Juan. Wanra kona, “Maistro, sitaw intaw si lalaki nin kalamoꞌ moyodtaw sa rubariꞌ nan Ilog Jordan, sitaw si pinatutuꞌwan moyoy maipaꞌkaꞌ kona, mampamawtismo ya anamaet ket mampako sara ana edet a sarba kona!”

27 Inumbat ya si Juan ket wana konra, “Si siꞌnuman a tawo, kasan animan nin kapapaꞌsar a pagꞌinan na no amboꞌ ya a Dios a nami kona. 28 Mapatutuꞌwan moyo a nibaritaꞌ ko a wangko, ‘Amboꞌ ako a Cristo, no kai siꞌko a nibakiꞌ nin muꞌnayna kona.’ 29 Say paꞌsar ko, siꞌkoy amigo na nin nubyo nin main rispunsibilidad nin mangisadyaꞌ nin sarba para sa kasal na. Abir nin sitin amigo nan nubyo ket amboꞌ yay makaikon konan nubya, alakin lamang a ririket na ta mangkarngeꞌ nay pakapariga nan nubyo. Ket siꞌko nin nangisadyaꞌ konra nin tutawo sa irarateꞌ nan Cristo, alaki a ririket ko sawanin. 30 Matkap a maitaꞌgay ya, ket maikayupaꞌ ako.”

31 “Oꞌ, si saya nin mangibwat sa langit, syay sangkataꞌgayan. Si saya nin mangibwat iti sa lutaꞌ, bilang ya konran raruman tagadti sa lutaꞌ, say irgwe-irgwen na say maipaꞌkaꞌ iti sa lutaꞌ. Baleꞌ si saya nin mangibwat ya sa langit, syay sangkataꞌgayan sa sarba. 32 Ibari-baritaꞌ nay naꞌkit tan narngeꞌ na. Mataman baleꞌ nin wanin, umno sara tamoꞌ a mamper sa ibaritaꞌ na. 33 Ket saraynamaet a mamper kona, patutuꞌwan ra a say nibaritaꞌ nan Dios ket tutuo, 34 ta say saritaꞌ na mismo nin Dios a ibaritaꞌ nan sitin nibakiꞌ na. Wanin ta konan sitin nibakiꞌ na, mampiikapen nayan liso nin Dios a Ispirito na. 35 Wanin ta, si Dios a syay Ama, kawaꞌnan nayay Anak na, ket nipagamet na a sarba kona. 36 Ket, si siꞌnuman a magmatalek konan Anak na, main ana nin anggan-angga nin byay na a iti konan Dios. Baleꞌ si siꞌnuman a kai nin tumulok konan Anak na, kasa yayti nin byay kona, no kai edet, dusawen naya anggan-angga nin Dios mangibwat sa alakin sager na.”