3 Sin natandaan na ni Jesus a wanin a naiparateꞌ konran Pariseo, nibwat ya sa Judea ta pigaw nin sumubliꞌ ya sa Galilea, 4 ket matkap a lumabas sara sa lulugar a sakop nan Samaria. 5 Ket nakarateꞌ saradtaw sa Sicar, saya nin babali sa Samaria a adani sa lutaꞌ nin nibi na ni Jacob konan anak nan si Jose sin naꞌteng ana. 6 Main itaw nin bubon nin kinali na intaw ni Jacob. Mapagal yayna si Jesus nin linmalako ta ugtiawro ana kanyaꞌ nin tinmekreꞌ yadtaw sa dani nan bubon. 7-8 Saray tumutumbok na anamaet, nako sara sa babali manaliw nin kanen ra.

Sin sain, main nin babayi nin tagadtaw sa Samaria a nako managoꞌ. Ket wana ni Jesus kona, “Kiinom ako pa?”

9 “Oꞌ, baleꞌ saya ka nin Judio, ket ambaleꞌ ey nin kidawat kan inumen kongko a sayay babayi tan sayay tagadti sa Samaria?” wana nin niꞌbat nin babayi. Wanin a wana banaꞌ ta saray Judio, ket kai sara nin kibiang-biang konran taga Samaria.^a

10 Wanan niꞌbat ni Jesus, “No tandaꞌ mo tamoꞌ kumon no ani a ibi nan Dios tan no siꞌno akoyti nin mangkidawat nin inumen komo, siꞌkayna edet kumon a kidawat kongko ket byan kata nin ranom a umagos tanan pirmi.”

11 Sin sain, wana nin babayi, “Ser, ararem yayti si bubon ket kasa anamaet nin ipanagoꞌ mo. Adti ka nin mangalap ey nin siin si ranom a umagos tanan pirmi? 12 Mas ataꞌgay ka et para dyan si puon tamon si Jacob? Sya a nami nin sitin bubon komi, tan iti ya nin nanagoꞌ tan saray aꞌnak na nin ininom ra tan saray uayep ra.”

13 Inumbat ya si Jesus ket wana kona, “Si siꞌnuman a minom nin saytin ranom, milataꞌ ya liꞌ anamanaet, 14 baleꞌ si siꞌnuman anamaet a minom nin ranom a ibi ko kona, kai yayna gapo nin milataꞌ. Wanin ta si ranom nin ibi ko, magꞌin nin bilang subor sa lalaman na a kai gapo nin maꞌtyan a mami kona nin anggan-angga nin byay a iti konan Dios.”

15 Ket wana nin babayi kona, “Ser, byan nako pa nin siin nin ranom ta pigaw nin kai akoyna gapo nin milataꞌ ket kai koyna nin matkap a makodti et nin managoꞌ.”

16 Wana ni Jesus kona, “Keen ma nin kayaban a asawa mo, miꞌsa kamo nin sumubliꞌ iti.”

17 “Kasa nin asawa ko,” wana nin babayi.

Ket niꞌbat na ni Jesus kona, “Kusto in si wamo a kasa nin asawa mo, 18 ta lima rayna a nagꞌin nin asawa mo, baleꞌ siin si kaꞌyan mo sawanin ket amboꞌ ma nin asawa. Siin si nibaritaꞌ mo a kasan asawa mo ket tutuo ya.”

19 Sin sain, wana nin babayi, “Ser, madlaw ko a saya kamo nin mangingilalaman konan Dios. 20 Ani a kusto? Iti konan sitin talugtog, iti sara nangrayo konan Dios a pupuon mi, baleꞌ siꞌkamo nin Judio, wamoyo a itaw sa Jerusalem a manepeg nin pangraywan konan Dios.”

21 Sin sain, wana ni Jesus, “Madam, say katutuꞌwan, amboꞌ in a impurtanti. Tepren moyoytin ibaritaꞌ ko komoyo: Rumateꞌ liꞌ a panaon a amboꞌ ana nin konan sitin talugtog o sa Jerusalem a pangraywan ran tutawo konan Dios a syay Ama. 22 Siꞌkamo nin taga Samaria sawanin, kurang a tandaꞌ moyo maipaꞌkaꞌ konan manraywen moyo, baleꞌ siꞌkami, nipadar na komi a kadiryan nan si manraywen mi. Oꞌ ta tandaꞌ tamo a mangibwat konran Judio a pangingisalba nan Dios konran tutawo. 23 Ket say katutuꞌwan, rinmateꞌ anay panaon a saray tutuon mangrarayo konan Dios a syay Ama ket amboꞌ nin sa sayay lugar raya nin raywen, no kai edet, raywen raya nin nangibwat sa kanakman ra nin naipatukdoꞌ sa katutuꞌwan maipaꞌkaꞌ sa kinasiꞌno na. Tutuoyti ta wanin a rabay nan Dios nin klasin pangrarayo kona. 24 Si Dios ket ispirito ya, kanyaꞌ nin saray mangrayo kona, matkap a say pangrarayo ra ket nangibwat sa kanakman ra nin naipatukdoꞌ sa katutuꞌwan maipaꞌkaꞌ sa kinasiꞌno na.”

25 Wana nin babayi, “Tandaꞌ ko a rumateꞌ ya liꞌ a Mesias, sitaw si tawagen nin Cristo. Ket no rumateꞌ ya, ipatandaan na liꞌ a sarba kontamo.”

26 “Siꞌko nin mangkiirgo komo, siꞌko ya in,” wana ni Jesus.

27 Sin sain ket rinmateꞌ saraynay tumutumbok na ni Jesus. Nakaꞌngap sara sin naꞌkit rayan mangkiirgo sa sayay babayi, baleꞌ kasa gapo ni saya konra a nanepet kona no ani a rabay na konan babayi o no ambaleꞌ a mangkiirgo ya kona.

28 Sin sain anamaet, nibatiꞌ naya nin babayi a paya na tan sinmubliꞌ ya sa babali. Wana konran tutawodtaw, 29 “Mayi kamo kongko ta keen moya nin kiten taw si tawo nin nangibaritaꞌ kongko nin sarban gawaꞌ-gawaꞌ ko. Syayna palayi a mantawagen nin Cristo?” 30 Ket nibwat sara anaod a tutawodtaw sa babali ta mako saradtaw kona ni Jesus.

31 Sa leleg nadtaw nin babayi sa babali, saray tumutumbok na anamaet ni Jesus, wanraynan niꞌnu-niꞌno kona, “Maistro, mangan kamoyna.”

32 Baleꞌ say niꞌbat na konra, “Kai ana ta main nin kinnan ko nin kai moyo nin tandaꞌ.”

33 Konan siin, nitepetan saray tumutumbok na a wanra, “Main palayin nami nin kinnan na?”

34 Wana ni Jesus konra, “Siti a mangkanen ko, si tumulok ako sa karabayan nan namakiꞌ kongko ket mayadiꞌ a nipagwaꞌ na kongko. 35 Main yayti e si wamoyo, ‘Aꞌpat a bulan tana ket pangyayatab ana liꞌ.’ Sumadyaꞌ kamoyna! Kiten moyo saray tutawon manꞌumarak. Sara, manꞌiyarig kosara sa matua anan pari sa gagawaꞌ ket matkap saraynan yataben. 36 Manꞌupaan sarayna a mangyayatab. Ket, kiririket saray mangmumula nin minsahi nan Dios konran mangyayatab ta iyator rayna a yinatab ra a saray nakagaꞌmor nin anggan-angga nin byay a iti konan Dios.^b 37 Maꞌkit a katutuꞌwan na sawanin nin si wanra a, ‘Sakalako a mangisabwag ket sakalako anamaet a mangyatab.’ 38 Wanin ta, siꞌko, ibakiꞌ katamo nin paꞌsar mangyatab sa kai moyo nin kinapagalan, ket siꞌkamoy minabang sa kinapagalan ran raruma.” 39 Ket abaw sara a taga Samaria nin itaw konan siin nin babali a nagmatalek kona ni Jesus banaꞌ sa wana nin babayi a nibaritaꞌ na ngaꞌmin ni Jesus a gawaꞌ-gawaꞌ na.

40 Banaꞌ konan siin, sin nako saradtaw kona ni Jesus dinawat ra a itaw ya yapoꞌ. Ket itaw ya yapoꞌ anaod si Jesus nin rway awro. 41 Ket inmabaw sara et a nagmatalek kona ni Jesus banaꞌ sa niyakay-akay na, 42 tan wanra konan babayi, “Magmatalek kami ana, amboꞌ nin banaꞌ tamoꞌ sa nibaritaꞌ mo no kai edet, banaꞌ ta narngeꞌ miya ket tandaꞌ mi nin sya a peteg nin Mangingisalba nin tutawo iti sa mundo.”

43 Napalabas a rway awro nin itaw ya si Jesus sa Samaria, nibwat sarayna tan nituloy ray nako sa Galilea. 44 Mangyakay yadtaw lamang si Jesus mataman nin nibaritaꞌ nayna a wana, “Kasan rispito ra konan sayay prupita nin saray kalugaran na nin mismo.” 45 Wanin man, inakoꞌ rayadtaw nin saray taga Galilea sin rinmateꞌ ya banaꞌ ta nako saradtaw nin nikipista sa Jerusalem sin saytaw ket naꞌkit ra ngaꞌmin a ginwa-ginwaꞌ na.

46 Sin itaw sarayna anaod, sinmubliꞌ ya si Jesus sa Cana, si babali sa Galilea nin itaw ket ginwaꞌ na nin arak a ranom. Main itaw nin sayay upisyal nin gubyirno a si anak nan lalaki ket itaw ya sa Capernaum nin main nin masakit na. 47 Sin narngeꞌ nan sitin upisyal a rinmateꞌ yadtaw sa Galilea si Jesus nin ibat sa Judea, nako ya kona tan nikidawat yan ingangaꞌdo nin mako ya sa Capernaum ta keen naya nin paandaen a anak nan mangkamati. 48 Ket anaod, wana ni Jesus kona, “Siꞌkamo nin tutawo, no kai kamo nin makaꞌkit nin makapakaꞌngap nin pupakaꞌkitan, kai kamoynaod nin mamper.”

49 Ket wana nin upisyal, “Ser, pangingaꞌdo moyo ta tamoyna baꞌyo ya nin mati a anak ko.”

50 Wana ni Jesus kona, “Mako kamoyna. Mabyay yaynaod a anak moyo.” Namper yay upisyal sa irgo na ni Jesus ket sinmubliꞌ yayna sa bali ra.

51 Iti ya et a lamang sa dalan sin sumunor a awro,^c sinnaꞌ rayaynan ibabakiꞌ na a wanra ket inmandaꞌ yayna a anak na. 52 Ket tinepet na no ani a udas sin ginmana-gana a kaingaran na nin anak. Niꞌbat ra kona, “Kinmayupaꞌ a amot na sin bandan ala una naapon.”

53 Ket napanemtem na nin ama a sin sain nin udas na nin inirgo ni Jesus a wana, “Mabyay yaynaod a anak moyo.” Banaꞌ ta wanin, sya tan saray sarba ran kabali na ket nagmatalek sara kona ni Jesus. 54 Siti a ikarwan ginwaꞌ na ni Jesus nin pammatutuo nin maipaꞌkaꞌ no siꞌno yan diri sin nako ya sa Galilea nin ibat ya sa Judea.