5 Main itaw nin sayay lalaki nin mampagmasakit sa luob ana nin tulumpuloꞌ tan waloy taon. 6 Sin naꞌkit naya ni Jesus tan sin natandaan na nin nakaidaꞌ yaynadtaw nin naꞌteng, wana kona, “Rabay mo para a umandaꞌ?”

7 Wanan niꞌbat nin si lalaki kona, “Ser, kasa baleꞌ nin mangitaoy kongko sa ranom no nakimbor ana. Manꞌipamuspusan ko tamoꞌ et a manaoy ket main anan nakauꞌnan nanaoy.”

8 Wana ni Jesus kona, “Mibangon ka! Awiten ma in si idaan mo tan lumalako kayna.” 9 Ket tampor inmandaꞌ yayna, inawit nayayna a idaan na tan linmalako yayna.

Awron Painawa sin sain. 10 Kanyaꞌ nin saray pupangulo ran Judio wanra konan lalakin napaandaꞌ, “Sa Gugan-gan tamo, maiyawaꞌ a awiten ma in si idaan mo ta sawanin ket Awron Painawa.”

11 Baleꞌ wana nin inumbat, “Baleꞌ wana nin si namaandaꞌ kongko ket, ‘Awiten ma in si idaan mo tan lumalako kayna,’ ” wana.

12 “Siꞌno ya in ket a tawo si nangibaritaꞌ komo nin awiten ma in si idaan mo tan lumalako kayna?” wanran nitepet kona. 13 Baleꞌ si tawo kai na nin tandaꞌ no siꞌno yaytaw si namaandaꞌ kona ta nakaibwat yaynan kai nin nadlaw si Jesus sa kaꞌbawan ran tutawo.

14 Sinmunor, naꞌkit naya ni Jesus a lalakidtaw sa sakop nan Timplo ket wana kona, “Kikiten mo. Inmandaꞌ kayna, ket andiꞌ kayna nin magkasalanan ta bangliꞌ no main nin mas dukaꞌ et nin rumateꞌ komo.”

15 Nibwat yay lalaki tan nikaꞌ na nin nibaritaꞌ konran pupangulo ran Judio a si Jesus a namaandaꞌ kona. 16 Konan siin, tinaranaan rayaynan kuntrawen nin Judio si Jesus, banaꞌ ta mampangwaꞌ ya nin wanti sa Awron Painawa. 17 Sin wanin, wana ni Jesus konra, “Si Ama ko, kai ya gapo nin mantumgen nin gumwaꞌ, kanyaꞌ nin siꞌko anamaet, kai ako nin mantumgen.”

18 Konan siin, nalamuꞌnan a sulit ran Judio nin patyen raya si Jesus ta sa wanra ket kai na tamoꞌ nin sinubag a Gugan-gan maipaꞌkaꞌ sa Awron Painawa, no kai edet, nipada nay kadiryan na konan Dios sa nipanawag nan Ama kona.

19 Ket imbatan na ni Jesus in nin manꞌiparsa ra a wana konra, “Isipen moyoyti nin maong: Siꞌko nin si Anak nan Dios, kasan magwaꞌ kon gawꞌen sa kabukudan ko tamoꞌ no kai edet, say gawꞌen ko tamoꞌ ket say mangkaꞌkit kon gawꞌen na nin Ama ko. Animan a gawꞌen na sain a gawꞌen ko. 20 Wanin ta kawaꞌnan nakon Ama ko. Kanyaꞌ nin manꞌipaꞌkit na ngaꞌmin kongko a man-gawꞌen na tan main et liꞌ nin gawaꞌ nin ipapaꞌkit na kongko nin mas makapakaꞌngap et dyan say ginwaꞌ ko, ket peteg a makaꞌngap kamo liꞌ. 21 Bilang wadiꞌ, si Ama ko, pasublien nasaran mabyay a nati. Ket sain liꞌ anamaet a gawꞌen ko nin si Anak na ta pasublien kosara liꞌ nin mabyay a rabay ko nin pabyayen. 22 Wanin et, si Ama ko, kai ya nin manintinsya nin siꞌnuman, no kai edet, nipagamet nayna kongko nin Anak na a paninintinsya 23 ta pigaw nin say sarban tawo ket pagalangan rakon si Anak na a maikalamoꞌ sa pammagalang ra konan Ama ko. Si siꞌnuman a kai nin mamagalang kongko a si Anak na, kai naya anamaet nin mampagalangan a Ama ko a sya a namakiꞌ kongko.

24 Isipen moyoyti nin maong: Si siꞌnuman a rumngeꞌ tan mamper sa manꞌibaritaꞌ ko nin nangibwat konan Dios a syay namakiꞌ kongko, magkamain ya nin anggan-angga nin byay a iti konan Dios. Kai yayna nin masintinsyawan nin madusa, banaꞌ ta say nikaisyay na kona nin Dios ket napalabas ana tan mabyay yayna anggan-angga nin iti konan Dios.

25 Isipen moyoyti nin maong: Say sarban tutawo say paꞌsar ket nati ana, banaꞌ ta naisyay a sarba konan Dios. Baleꞌ narateꞌ anay panaon a mataman nin saray say paꞌsar ra, ket nati ana ket marngeꞌ ray irgo ko nin si Anak nan Dios. Ket saraytaw saray tumulok sa narngeꞌ ra ket peteg a magkamain sara nin siin nin byay. 26 Wanin ta si Ama ko a puon nin byay. Ket wanin ako anamaet nin si Anak na banaꞌ ta nangibwat kona a siꞌkoy puon nin byay, 27 tan ginwaꞌ na et nin siꞌkon si Anak na ket main nin kapangyadian ko nin manintinsya banaꞌ ta pinaitawo ako. 28 Andiꞌ kamo nin mabigraꞌ sa saytin nibaritaꞌ ko ta marateꞌ liꞌ a awro a sarba ran nati, marngeꞌ ra a irgo ko, 29 ket lumiwaꞌ sara liꞌ sa nanabunan konra. Saray nangwaꞌ nin maabig, pasublien sara liꞌ nin mabyay iti konan Dios, baleꞌ, saray nangwaꞌ nin dukaꞌ, pabyayen sara anamaet ket lumiwaꞌ sara sa nanabunan konra baleꞌ sintinsyawan sara nin madusa.

30 Kasa nin magwaꞌ kon gawꞌen nin kabukudan ko tamoꞌ! Mampanintinsya ako nin dipindi sa manꞌibaritaꞌ na kongko nin Ama ko. Kanyaꞌ nin say paninintinsya ko ket matunong banaꞌ ta amboꞌ nin say karabayan ko a manꞌunuren ko no kai edet, say karabayan na nin Ama ko nin namakiꞌ kongko.

31 No siꞌko nin mismo tamoꞌ a mamatutuo nin say maipaꞌkaꞌ kongko, say ibaritaꞌ ko edet, kai nin tepren. 32 Baleꞌ main ya a Ama ko nin mamatutuo sa maipaꞌkaꞌ kongko, ket say ibaritaꞌ na, tutuo anaod.

33 Main saraytaw anamaet intaw saray nibakiꞌ moyo nin mako nin nangrengeꞌ kona ni Juan ket pinatutuꞌwan na et a maipaꞌkaꞌ sa no siꞌno ako. 34 Kai ko baleꞌ nin matkap a pammatutuo ran tutawo sa maipaꞌkaꞌ kongko, no kai ibaritaꞌ koyti say pammatutuo na ni Juan maipaꞌkaꞌ kongko ta pigaw nin mamper kamo ket maisalba kamo. 35 Maiyarig ya si Juan sa sayay tyoꞌ a mandumta nin maslag ket maririket kamo intaw sa anted nin panaon a mangkapalawayan nay kukaisipan moyo. 36 Baleꞌ main nin pammatutuo sa maipaꞌkaꞌ kongko nin mas maksaw et dyan say nibaritaꞌ na ni Juan. Wanin ta say man-gawꞌen ko a say nipagwaꞌ na nin Ama ko, ket sain a mamatutuo a siꞌko a nibakiꞌ nan Ama ko. 37 Si Ama ko anamaet nin nangibakiꞌ kongko, syan diri a namatutuo nin say maipaꞌkaꞌ kongko.

Baleꞌ siꞌkamo, kai moyo gapo nin narngeꞌ a busis na tan kai moyo gapo naꞌkit a bakas na. 38 Linmabas tamoꞌ komoyo nin bilang nin siri a nibaritaꞌ na, ta kai moyoko nin akuen nin si nibakiꞌ na. 39 Manꞌadalen moyoynan manꞌadalen a Masanton Kasuratan sa pangngipaꞌkaꞌ moyo anaod a mangibwat sa sayti ket magkamain kamon anggan-angga nin byay a iti konan Dios. Anta sayti nin kasuratan ket mamatutuo no siꞌno ako, 40 baleꞌ andiꞌ kamo nin adalen moyoy maipaꞌkaꞌ kongko ta pigaw nin magkamain kamo kumon nin byay.

41 Kai ko nin tikapen a pagalangan rako nin tutawo, 42 laloyna a mangibwat komoyo ta tandaꞌ koy kanakman moyo, a peteg a kasa nin pangangawaꞌnan moyo konan Dios. 43 Alimbawaꞌ, siꞌko, nako akodti nin pinakalalaman nan Ama ko, ket kai rako nin asikaswen. Baleꞌ no main nin makodti nin ipataꞌgay nay lalaman nan diri, siin, asikaswen moya. 44 Paꞌno kamo anaod nin magmatalek konan Dios ey? Say tikapen moyo ket say pangrarayo nin barang saya tan saya komoyo tan amboꞌ a say pangrarayo na komoyo nin sayan-saya nin Dios.

45 Wanin man, andiꞌ moyo nin isipen a siꞌko a mangiriklamo komoyo konan Ama ko, ta say nisurat na ni Moises nin sayti a mampagmatalkan moyo a mangwaꞌ nin sain. 46 Kai moyo nin mantepren a nisurat na ta no peteg a mamper kamo sa nisurat na ni Moises, mamper kamo anamaet kumon kongko banaꞌ ta maipaꞌkaꞌ kongko a nisurat na. 47 Ket banaꞌ anaod ta kai moyo nin tepren a nisurat na, paꞌno moyo edet nin tepren a manꞌibaritaꞌ ko ey?”