Uꞌnawen a say Mamin Kaabigan sa Awron Painawa
14
Saya anamanaet nin Awron Painawa, sinagyat ya si Jesus nin mangan sa bali nan sayay pangulo ran Pariseo. Ket manꞌimatunan rayan itaw no ani a gawꞌen na. 2 Anaod ta itaw ya sa dani na a sayay lalakin umna-umnal a lalaman na. 3 Ket tinepetan nasara ni Jesus a Pariseo tan saray abugado sa Gugan-gan a wana, “No paandaen nayan sayay tawo a sayay main nin masakit no Awron Painawa, subagen na kasi a Gugan-gan, o kai?”4 Nititinek sara tamoꞌ baleꞌ. Sin sain, nipababo nay gamet na ni Jesus konan lalaki ket inmandaꞌ ya, miꞌsa pinaugot nayayna sa bali ra. 5 Kayadiꞌ sain, wana ni Jesus konran saray abugado tan saray Pariseo, “Bilang wadiꞌ a main komoyo a si anak na o si baka na ket nanaboꞌ ya sa bubon, kai naya kasi nin arwasen nin tampor mataman no Awron Painawa?”
6 Ket kai sara nin nakaꞌbat konan tepet na.
Maipaꞌkaꞌ konan Sayay Maayupaꞌ a Nakem tan Mapananꞌili
7 Sin sain, naasikaso na ni Jesus a main konran saray sinagyat a piniliꞌ ran tekrean a para konran saray ataꞌgay nin tutawo. Kanyaꞌ nin wana konra, 8 “Bilang wadiꞌ ket sinagyat ka sa sayay bansal, andiꞌ ka nin tumekreꞌ sa tekrean a para konran saray ataꞌgay nin tutawo, ta bangliꞌ no main nin sayay sinagyat nin mas ataꞌgay nin tawo dyan siꞌka. 9 Ket si nanagyat ikaꞌ naya nin patekreen sa mantekrean mo tan wana komo, ‘Para konan sitin tawo ya in nin tekrean.’ No wanin ket madingꞌeyan ka nin erpe-erpes nin mako sa rigrig.
10 Ana edet, no main nin managyat komo, itaw ka sa rigrig tumekreꞌ ket keen naka liꞌ nin namabansal nin ibaritaꞌ na komo, ‘Amigo, taynadtaw e tumekreꞌ sa naisadyaꞌ nin tekrean!’ Konan siin ket mapagalangan ka sa adapan ran kadungo mo.” 11 Anaod, si mangitaꞌgay nin lalaman nan diri, maikayupaꞌ ya liꞌ ket si mipaayupaꞌ, maitaꞌgay ya liꞌ.
12 Sawanin, wana anamaet ni Jesus konan Pariseo a nanagyat kona, “No manadyaꞌ ka para sa sayay pakan, amboꞌ nin saray uamigo mo, bubsat mo, kukanayon mo, tan saray mumayaman nin kabaraybay moy sagyaten mo, ta masagyat raka liꞌ anamaet ket natubaleꞌ kayna. 13 Ana edet, no mamakan ka, maong anan saray pubri, pilay, bulag a sagyaten mo. 14 Ket makarmaꞌ ka liꞌ ta kai sara nin makatubaleꞌ, baleꞌ si Dios tubaleen naka liꞌ no pasublien nasarayna nin mabyay a mapteg.”
Si Pangingiyarig Maipaꞌkaꞌ sa Ubat sa Nikasagyat sa Punsya
15 Sin narngeꞌ nayti nin saya konran saray kadungo na ni Jesus nin mampangan, wana kona, “Makarmaꞌ saray makakidungon mangan itaw sa Pagꞌadian nan Dios!”
16 Ket wanan niꞌbat ni Jesus a nipadalan na sa sayay pangingiyarig, “Main nin sayay mamapunsya ket abaw saray sinagyat na. 17 Sin narateꞌ anay awron punsya, nipakayaban nasaray sinagyat konan katulong na a wana konra, ‘Kamoyna ta nakasadyaꞌ ana ngaꞌmin.’ 18 Baleꞌ sarba ra main nin badaꞌnan. Wanan nuꞌna, ‘Nakasaliw akon lutaꞌ. Matkap nin keen koya bisitawen. Kidawat akon dispinsa.’ 19 Wana anamaet nin saya, ‘Nanaliw akon mapuloꞌ ray damulag. Keen kosara nin sarien nin ipangadado. Kidawat akon dispinsa.’ 20 Wana nin saya et, ‘Kayadiꞌ ko tamoꞌ nin nikasal kanyaꞌ nin kai ako nin makapikaꞌ.’
21 Sin sain, sinmubliꞌ yaynay katulong tan nibaritaꞌ naytin bubadaꞌnan ra konan amo na. Sawanin, sabtan sager nan amo kanyaꞌ nin ginan-gan nayay katulong nin wana, ‘Madaliꞌ ka, mako ka sa palingki, sa plasa tan sa kukalsada ta iꞌras mosaradti a pubri, a bulag tan pilay.’ 22 Ket kaaram, sinmubliꞌ yaynaet a katulong konan amo na tan wana, ‘Ser, ginwaꞌ koynay nigan-gan mo kongko, baleꞌ abaw et a bakantin tekrean.’ 23 Ket niꞌbat nan amo konan katulong, ‘Mako ka edet sa dudalan ta pasueten mosaray tutawo nin makodti ta pigaw nin mapnoꞌ yay bali ko 24 ta ibaritaꞌ koyti komoyo, ni siꞌnuman konran saraytaw saray nuꞌnan sinagyat nin nagbadaꞌ ket kai nin makataway sa nisadyaꞌ ko.’ ”
Matkap nan Ipulisay nin Sayay Tumutumbok a Mabli kona
25 Sa nipangituloy na ni Jesus nin mako sa Jerusalem, pinasyan kaꞌbawan ran tutawon nayi kona. Sin sain, inmadap ya konra ket wana, 26 “Si siꞌnuman a marabay nin tumumbok kongko nin mas alaki a pangangadoꞌ na konran mangatua na, asawa na, aꞌnak na, bubsat na, tan taman sa lalaman nan diri dyan sa pangangadoꞌ na kongko, kai ya nin magwaꞌ nin magꞌin nin tumutumbok ko. 27 Oꞌ ta si tawon kai nin paꞌsar mamalatay nin kudos na nin ipulisay na a sarban mabli kona, kai nan lamang nin magwaꞌ a magꞌin nin tumutumbok ko.
28 Anaod, si siꞌnuman nin tumumbok kongko ket matkap a bilang yan sayay mampagplanon mamaꞌdeng nin bali. Kwintawen na yapoꞌ a magastos na ta pigaw nin matandaan na no sumadag a kwarta na nin ipangyadiꞌ konan bali 29 ta saliꞌ no mayadiꞌ na nin maipaꞌdeng a pundasyon, kai nayayna nin maituloy ket sarba ran makaꞌkit kakaꞌlisan raya 30 nin wanra, ‘Ya, siin a tawo, namaꞌdeng ya ket kai naya nin nayadiꞌ.’
31 Wanin anamaet, no girawen yay sayay adiꞌ a main nin mapuloꞌ a ribon sundaloꞌ, ket si adiꞌ a mangira kona ket main anamaet nin rwampuloꞌ a ribon sundaloꞌ na, siguradon isipen na yapoꞌ tan adalen na no mababaꞌ rasaran labanan nin mapuloꞌ a ribon sundaloꞌ na a rwampuloꞌ a ribon sundaloꞌ nan kagira na. 32 Ket no wadiꞌ a kai ra nin mababaꞌ, mintras a kai sara et nin inmintra a kalaban, mangibakiꞌ yaynan mangilalaman kona nin mangibaritaꞌ konan si saya et nin adiꞌ no ani a matkap nan gawꞌen ta pigaw nin mituno sara. 33 Edet, no kai nin gurutan nin siꞌnuman a sarbaynan main na, kai ya magwaꞌ nin magꞌin nin tumutumbok ko.”