Say Matkap nin Taladan Maipaꞌkaꞌ sa Kinamapteg
7
“Andiꞌ ka nin manintinsyan kapada mon tawo a baraꞌmo kan hwis ta pigaw nin kai naka liꞌ nin sintinsyawan nin Dios. 2 Oꞌ, ta no paꞌno mosaran sintinsyawan a kapada mon tawo, wantaw naka liꞌ nin sintinsyawan nin Dios. No ani a nipanukat mo sa kapada mon tawo, wanin anamaet liꞌ a itubaleꞌ nan panunukat nin Dios komo. 3 Ambaleꞌ a say kasalanan ran kapada mon tawon baraꞌmon puling tamoꞌ tana a maꞌkit mo, baleꞌ kai mo nin mangkaasikaso a baraꞌmon truson nakasalimbeng ana sa mata mo? 4 Paꞌno mon maibaritaꞌ kona, ‘Galten tayay puling mo,’ anta siꞌka ket ni kai ma mangkaasikaso nin galten a truson nakasalimbeng sa mata mo? 5 Maong ka kano wadiꞌ! Galten mo yapoꞌ a kadukaan sa kanakman mo baꞌyo ka manita nin kapada mon tawo.6 Andiꞌ moyo nin ipasuet a mangyakay nin maipaꞌkaꞌ konan Dios konran tutawon nikasamaꞌ a kabibyay tan kasan kadingꞌeyan. No ipasuet moyo, baraꞌmon nibi moyoy pirlas moyo konran baboy ket italma-talmak ra tamoꞌ o baraꞌmo anamaet nin nibuntok moyo konran aso a masagradon bubagay ket birngan rakamon kayaten.”
7 “Kidawat kamo konan Dios nin say matkap moyo ket byan nakamo. Ituluy-tuloy moyoy manumog kona ket tulungan nakamon manumog sa mantikapen moyo. Kumutana kamo ket pasrepen nakamo 8 ta sarba ran kidawat, mabyan sara. Sarba ran manumog, makadumog sara; tan sarba ran kumutana, pasrepen sara. 9 Siꞌkamon mumatua, byan moya paran bato no kidawat yan maꞌkan a anak moyo? Kai! 10 O, byan moya paran ulay no kidawat yan kunaꞌ komoyo? Kai anaod! 11 Say rabay ko nin irgwen, no siꞌkamo nin tawo tamoꞌ a sikakasalanan ket tandaꞌ moyoy mamin mabistan bubagay konran aꞌnak moyo, kai na kasi ibi nin Ama moyo sa langit a no ani a maabig para konran kidawat kona?
12 Edet, no ani anamaet a rabay moyon gawꞌen ra komoyo nin kapada moyon tawo, saytaw a matkap moyon gawꞌen konra. Konan siin, matukid moyo a uakay nin Gugan-gan ni Moises tan saray prupita.”
Matkap a Pangungusisaꞌ nin Kabibyay
13 “Si akipot nin purta a serpan moyo sa Pagꞌadian nan Dios. Anaod, si purta nin siaabri nin mako sa impyirno ket alawang ya, tan mainumꞌay yan tumbuken tan abaw saraynay mampakodtaw, 14 baleꞌ akipot yan pageꞌ a purta tan maidap yan tumbuken a dalan nin mako sa byay a iti konan Dios, ket matalag saray makadumog kona.”
15 “Pakatalad kamo konran mibaluꞌ-baloꞌ a prupita nasaran Dios. Baraꞌmo saran mauyamoꞌ a karniro a rabay nin irgwen ket baraꞌmo saran tutuon mammemper konan Dios, baleꞌ say tutuo baraꞌmo saran mabayanin ayep ta say gagara ra ket manidaꞌ. 16 Say pakaalilbian moyo konra ket say pigagawaꞌ ra, kapadan pakaalilbiꞌ moyo no maabig yay kayo o mula sa pakaꞌkit nin bunga na. Si amboꞌ nin ubas, kai ya gumungan ubas, tan si arumas, kai ya gumungan igos. 17 Mataway a bunga nin marigsa nin kayo, ket main nin dipirinsya nin bunga nan kayon main nin sidaꞌ na. 18 Si malambot nin kayo kai ya gumunga nin dukaꞌ ket si main nin sidaꞌ nin kayo kai yaynamaet gumunga nin mabista. 19 Pukanen tamoꞌ miꞌsa liꞌ puuran a kayon gumungan dukaꞌ. 20 Wanin anamaet konran magwadiꞌ-wadiꞌ a prupita nasaran Dios, maalilbiꞌ moyo sara sa pakaꞌkit nin pigagawaꞌ ra.”
21 “Pakatalad kamo! Abaw saray tumawag kongko a wanra, ‘Uunuren ko! Uunuren ko!’ baleꞌ amboꞌ nin sarba ra ket risibyen nan Ama kon itaw sa langit sa Pagꞌadian na, no kai edet, saraytaw tamoꞌ saray gumwaꞌ nin karabayan na. 22 Sa Awron Paninintinsya, abaw sara liꞌ a mamaritaꞌ a wanra kongko, ‘Uunuren ko, ambaleꞌ ey? Nangyakay kami anamaet nin maipaꞌkaꞌ komo! Kai para a pinaandaꞌ misaray nasrepan nin dukaꞌ a uispirito tan nakapagmilagro kami et sa pakayadiꞌ mo?’ 23 Baleꞌ iꞌbat koyti liꞌ konra, ‘Amboꞌ katamo gapo nin trabahador! Kumadayoꞌ kamodti kongko, siꞌkamon gumu-gumwaꞌ nin dukaꞌ!’ ”
Say Maipaꞌkaꞌ sa Katutulok
24 “Anaod, si rumngeꞌ tan tumulok sa sain nin uakay ko, maipada ya sa sayay manakem nin tawo a bato a pundasyon nan nipaꞌdeng nan bali na. 25 Ginmagyo ya. Marges yay rapeg tan linmanip ya. Bingkasan nayan siri baleꞌ kai ya nin naybaꞌ a bali ta batoy pundasyon na.
26 Ket si nakarngeꞌ anamaet baleꞌ kai ya nin mangimbabaet, maipada ya sa sayay kasinakem nin tawo a nipaꞌdeng nayay bali na sa bubuyangin. 27 Ginmagyo ya anamaet a lamang. Marges yay rapeg tan linmanip ya. Bingkasan nayan siri a bali ket naybaꞌ yan liso.”