Mamaandaꞌ ya a Cristo nin Makaparmay nin Sakit sa Katat
8
Ket sin kinmayupaꞌ ya nangibwat sa purod si Jesus, tinumbok rayan abaw tuloy nin tutawo. 2 Kaaram-aram, main nin sayay tawon mampagmasakit nin dukaꞌ sa katat a mantawagen nin liprusia a kinmadani kona. Nanalimukod ya sa adapan na ni Jesus tan nipaingangaꞌdo na, “Ser, no rabay moyo magwaꞌ moyo nin maakoꞌ rako anamanaet nin tutawo a bilang sa gindatb”3 Nipababo naya ni Jesus a gamet na kona tan wana, “Oꞌ, rabay ko. Umandaꞌc kayna.” Ket tampor inmandaꞌ yay tawo. 4 Ket wana ni Jesus kona, “Mangrengeꞌ kan maong. Andiꞌ moyti ibari-baritaꞌ sa siꞌnuman, ana edet, mako ka konan padiꞌ ta ipadar moy nikapaandaꞌ mo.d Ket mangidaꞌton ka sigon sa Gugan-gan nin nibi na ni Moises ta pigaw nin maipaꞌkit a katutuꞌwan konra no siꞌno ako.”
Say Pagmamatalek nan sayay Amboꞌ nin Judio
5 Nako sara si Jesus sa Capernaum ket sin karateꞌ radtaw main nin amboꞌ nin Judio nin sinumnaꞌ konra. Kapitan yayti nin sundaloꞌ nin Romano ket dinawat na kona ni Jesus 6 a wana, “Ser, mampagmasakit yay alilaꞌ ko. Itaw ya sa bali ko. Naparalitiko ya ket mangkapaidap yan maong.”
7 “Sigi, paandaen koya; tamoyna sa bali mo,” wana ni Jesus.
8 “Ay, kai, Ser! Andiꞌ ana,” wanan kapitan, “ta kai ako kumanaꞌ a sumrep ka sa bali mi. Ket, sadag anan ibaritaꞌ mo, ‘Oꞌ, umandaꞌ yayna,’ ket umandaꞌ yaynay kawaꞌnan kon alilaꞌ ko. 9 Oꞌ, maibaritaꞌ in ta mantumulok akon lamang konan pangulo kon diri, tan main nin susundaloꞌ a iti sa pakauray ko. No ibaritaꞌ ko konan sayay sundaloꞌ ko, ‘Mako kadtaw e,’ ket mako yaynaod; ket konan saya anamaet ibaritaꞌ ko, ‘Mako kadti,’ ket umarak ya kongko. Wanin anamaet a lamang konan aripen ko. No wangko kona, ‘Gawꞌen mayti,’ gawꞌen ta gawꞌen naya anaod.”
10 Nakaꞌngap yan tuloy si Jesus sin narngeꞌ naytin wanan kapitan. Ket wana konran mantumumbok kona, “Ibaritaꞌ koyti komoyo a kasa gapo et nin narngeꞌ kon tawo a main nin wantin pagmamatalek mataman kontamon Israelita! 11 Ibaritaꞌ ko komoyo, rumateꞌ liꞌ a awro nin abaw sara liꞌ a amboꞌ nin Judio nin mangibwat sa baytan tan sa panrupan a kipunsya nin kidungon mangan kalamoꞌ ran puon tamon Judio, a sara si Abraham, Isaac tan Jacob, itaw sa Pagꞌadian nan Dios. 12 Sara baleꞌ a raruman Judio nin sara kumon a kipagꞌadiꞌ konan Dios ket, itampal sara liꞌ itaw sa pinasyan dedlem tan pinasyan kadayꞌan konan Dios ket itaw umasisit sara liꞌ tan ngumaretenget liꞌ a ngipen ra banaꞌ sa pakapaidap tan bereng ra.” 13 Kaaram, wana ni Jesus konan kapitan, “Mako kayna. No ani a timper mo, saytaw anamaet a mangyadiꞌ.”
Ket konan sitaw si udas a inirgo na ni Jesus taw, inmandaꞌ yay alilaꞌ.
Pinaandaꞌ nasaran Cristo a Abaw nin Tutawo
14 Nako sara si Jesus sa bali ra ni Pedro. Nakaidaꞌ yay katyangan nan babayi ni Pedro ta maꞌmot ya. 15 Ginaꞌgetan naya ni Jesus a sayay gamet na ket tampor a inmandaꞌ ya. Nibangon yayna tan nagsirbi ya konra ni Jesus sa pangnganan.
16 Sin yinmabina, niꞌra-niꞌras rasaran tutawo kona ni Jesus a mampagmasakit a nasrepan nin ispiriton dukaꞌ. Pinalakwan nasara ni Jesus a dudimunyo sa irgo na tamoꞌ, tan pinaandaꞌ nasara a sarba ran main nin masakit. 17 Napatutuꞌwan a wana ni Prupita Isaias sa wanin a ginwaꞌ na ni Jesus. Wana, “Syay nanambar nin sarban mumasakit tamo tan ginlat na ngaꞌmin a sarban manꞌirangep tamo sa lalaman tamo.”e
Saray Mangkatugaꞌ nin say Maipaꞌkaꞌ sa Katutumbok konan Cristo
18 Niꞌsa, sin naꞌkit na ni Jesus a kaꞌbawan ran tawo, pinasaki nasaray tumutumbok na nin makodtaw sa rubariꞌ. 19 Sin sain, kinmadani ya kona ni Jesus a sayay Madunong sa Gugan-gan tan wana kona, “Maistro, mayi ako komo adtiman a keen mo.”
20 Ket wana ni Jesus kona, “Mas maong sarayna edet a uayep sa tatalon ta main nin piikapan ran diri, tan sara et a manuk-manok ta main nin apunan ran diri ta, siꞌkon si Pinaitawo, kasa nin bali kon diri a magwaꞌ nin painawnan.”
21 Si saya nin tumutumbok wana kona ni Jesus, “Ser, no miꞌsayna liꞌ ta itabon koya yapoꞌ si tatay mi.”
22 Baleꞌ wana ni Jesus kona, “Kai, mayi ka kongko. Pauryan mon saray kasa sa sirong nin pagꞌaadiꞌ nan Dios a mangitabon konran nunati ra.”
Main nin Pakayadiꞌ nan Cristo sa Pwirsa sa Libed-libed
23 Kaaram, nako ya nin rinmuran sa baluto si Jesus ket nayi saray tumutumbok kona. 24 Sin kapresan ran mansumaki, bigraꞌ a tribunada ana, ket si baluto ra manlumdeg yaynan maspakan nin burakan. Sin sain, mampaꞌlek ya si Jesus. 25 Kinaꞌ raya nin pinukaw. Wanra kona, “Maistro, manlumdeg atamoyna! Isalba rakami!”
26 Wana ni Jesus konra, “Aninay liꞌmo moyo! Aninay kababwan nin pagmamatalek moyo!” Ket nibangon tan inumdeng ya tan nigan-gan nan tumgen yay siri tan kumpaꞌ a daluyon. Tampor linumteng tan linminak yay taaw.
27 Nakaꞌngap saray kalalamoꞌ na. “Ani ket a pitatawo nan siti a mataman si tribunada tan say daluyon, tumulok kona!”
Main nin Pakayadiꞌ nan Cristo konran Dudimunyo
28 Nakarateꞌ saradtaw sa rubariꞌ, sa lugar a sakop nan Gadara. Rwa ran lalaki nin linumwaꞌ sa yukib nin mampanabunan a sinumnaꞌ kona ni Jesus. Nasrepan saran ispiriton dukaꞌ ket pinasyan bayani ra kanyaꞌ nin maliꞌmo saran lumabas itaw a tutawo. 29 Sin naalilbiꞌ raya si Jesus, wanran niburyaw, “Siꞌkan Anak nan Dios, ani ket a kabiangan mo komi? Iti ka para ta pigaw nin padyaꞌdyaen nakami ana abirno nin kai et narateꞌ a udas nin panunusa?”
30 Sin sain, sa amboꞌ nin adayoꞌ sa kamiꞌnan ra ket main nin abaw nin baboy a mampangan. 31 Wanran nikidawat nin ingangaꞌdo nin ispiriton dukaꞌ kona ni Jesus, “No palakwanen rakami ana, aburuyan mo tana edet a sumrep kami konran baboy.”
32 “Sigi, mako kamoyna,” wana ni Jesus. Ket linakwanan rasaran ispiriton dukaꞌ a lulalaki tan sinumrep sara konran baboy. Ket nangimros saray baboy nin namunta sa kikiras ket nanaboꞌ sara sa raranom tan nati sara ngaꞌmin.
33 Saray mampangalilaꞌ konran baboy, nagsipalayo saran nako sa babali tan nibari-baritaꞌ ray nangyadiꞌ lalun-laloynay nangyadiꞌ konran rway lalakin nasrepan nin ispiriton dukaꞌ. 34 Kanyaꞌ nin sin narngeꞌ rayti nin gumabali, nako sara kona ni Jesus tan nikidawat saran ingangaꞌdo a lumakwan yaynadtaw kadiꞌ sa lugar ra.