Si Pangingiyarig Maipaꞌkaꞌ sa Saka-sakalakon Klasin Lutaꞌ
4
Niꞌsa, nako yaynaet si Jesus sa rigrig nan Baybay Galilea ta pigaw nin mangyakay ya. Pinasyan kaꞌbawan ran tawo nin inmarak. Kanyaꞌ nin rinmuran ya sa sayay baluto nin nakapundo ket tinmekreꞌ yadtaw. Saray tawo anamaet itaw sara sa abay. 2 Nangusar yan pangingiyariga sa niyakay nan abaw nin bubagay konra. Wana,3 “Mangrengeꞌ kamo! Main nin sayay magtatalon a nako nin nanabwag nin biniꞌ sa lutaꞌ na. 4 Sin manꞌisabwag nay biniꞌ, main nin naikaꞌ sa dadalanan. Naꞌkit rayti nin manuk-manok ket kinnan ra. 5 Main anamaet nin naikaꞌ sa babato a iti tamoꞌ sa babo a lutaꞌ. Rinumsik nin tampor ta ababo a lutaꞌ. 6 Sin naꞌmutan, nalanes; ket banaꞌ ta kai nin nakayamot nin ararem, nakriꞌ! 7 Main et nin naikaꞌ sa lugar a mantubuan nin madiwin didikot. Linmambot nin kinmubpal a madiwin dikot ket nadaeg ti. Kanyaꞌ nin kai nin nakabunga. 8 Ket main anamaet nin naikaꞌ sa madaem a lutaꞌ. Tinmuboꞌ tan inmalaki, ket main nin ginmungan tulumpuloꞌ, main nin aꞌnem a puloꞌ, tan main anamaet nin sanyasot.”
9 Wana et ni Jesus, “Siꞌkamon manrumngeꞌ, adalen moyoyti nin maong.”
Say Gagara nin Pangingiyarig
10 Sin nagsiibwat saraynay tutawo, nabatiꞌ saray labinrwa pati saray raruman tumutumbok na. Tinepet ra kona no ani a rabay nan ibaritaꞌ nin sitaw si pangingiyarig na. 11 Wanan niꞌbat ni Jesus, “Siꞌkamo nin peteg nin mantumumbok kongko, manꞌaburuyan nakamo nin Dios nin matandaan moyoy maipaꞌkaꞌ sa pagꞌaadiꞌ na a kai et nin nipatarusan nangibwat sin nuꞌna. Baleꞌ konran raruma a kai sara nin tumulok kongko, naibi a pangingiyarig 12 ta pigaw nin sa wanin ket matandaan nin
‘Kikiten rayna man nin kikiten
ket kai ra nin mangkaipurok a mangkaꞌkit ra, tan
marngeꞌ rayna man nin marngeꞌ
baleꞌ kai ra nin manꞌadalen a pipaꞌkaan nin mangkarngeꞌ ra
ta no amboꞌ nin wanin,
mapabaꞌyo kumon a nakem ra tan mapirduna sara.’b ”
Si Papalaway na ni Jesus Maipaꞌkaꞌ sa Pangingiyarig
13 Miꞌsa wana ni Jesus konra, “Kai moya para nin mataros tin pangingiyarig? No wanin, paꞌno moyo edet nin mataros a raruma et nin pangingiyarig ey?” 14 “Wanti na e: Say nisabwag nan magtatalon ket Saritaꞌ nan Dios. 15 Saytaw say dadalanan a naikaan nin biniꞌ ket sara a tutawo a nakarngeꞌ sa Saritaꞌ nan Dios. Baleꞌ kapingmatan nako ya konra si Satanas ket nipalingwanan na konra a narngeꞌ ran Saritaꞌ nan Dios.
16 Saytaw anamaet say babato a naikaan nin biniꞌ, sara a tutawon maririket nin nakarngeꞌ sa Saritaꞌ nan Dios tan inakoꞌ ran tampor. 17 Baleꞌ kai nin nakayamot konra ket kai nin nagnayon ta sin mangirangep sarayna nin pakapaidap tan pammadyaꞌdyaꞌ banaꞌ sa nipangrisibi ran Saritaꞌ nan Dios, rinmayꞌep sara ket ginurutan rayna.
18 Saytaw anamaet say no adti main nin tinmuboꞌ nin madiwin dikot a naikaan nin biniꞌ ket sara et a tutawon mampangrengeꞌ sa Saritaꞌ nan Dios. 19 Baleꞌ banaꞌ ta kaaburidwan ray kabibyay ra, tan nuꞌna-nuꞌnay apes ran yumaman tan magkamain nin nagsikabarang a bubagay, ket nadaeg nin sain a apes ran tumulok sa Saritaꞌ nan Dios, kanyaꞌ nin kai ginmunga sa byay ra.
20 Ket saytaw anamaet say madaem a lutaꞌ nin naikaan, sara a tutawo nin nangrengeꞌ sa Saritaꞌ nan Dios. Ket rinisibi rayti ket nagtrabaho sa byay ra ket ginmunga nin bilang biniꞌ a main nin ginmungan tulumpuloꞌ, aꞌnem a puloꞌ tan sanyasot.”
21 Wana et ni Jesus konra, “Main paran manulsol nin lampadawan miꞌsa naya nin sakban nin salop o ikwa sa sirong nan katri? Kasa! No kai ikwa nayaynaod sa sayay pangngitukduan. 22 Wanin anamaet sa pangungusar kon pangingiyarig ta sarban adi sawanin ket magꞌin liꞌ nin mapala-palaway tan say sikrito anamaet sawanin ket matandaan liꞌ. 23 Kanyaꞌ anaod nin siꞌkamon mampangrengeꞌ, adalen moyoy pipaꞌkaan nin saytin nibaritaꞌ ko!”
24 “Adalen moyon maong a marngeꞌ moyo ta no wanin, padmangan nan pakataros nin Dios a pangrerengeꞌ moyo tan ana edet lamuꞌnan na et a pakataros moyo. 25 Anaod, si tawon manꞌipamuspusan nan matarusan a narngeꞌ na, say pakataros na ket malamuꞌnan; baleꞌ si tawon kai na rabay nin tarusan, mataman nin say tandaꞌ na ket magꞌin nin kasa.”
Say Ritrato nin Katutuboꞌ
26 Nami ya anamana nin sayay pangingiyarig si Jesus. Wana, “Say pagꞌaadiꞌ nan Dios ket maiyarig sa mangyadiꞌ no manabwag yan biniꞌ a sayay magtatalon sa mantalunen na. 27 Mayadiꞌ na nin gawꞌen in, pauryan nayna ket ituloy nayna a man-gawꞌen nan inawru-awro. Ket rinumsik tana a biniꞌ tan inmalaki. Si magtatalon, kai na nin tandaꞌ no paꞌnoy nikagwaꞌ nin sayti. 28 Si lutaꞌ a namatuboꞌ sa mula. Primiro rumsik, miꞌsa gumulong ket amboꞌ nin maꞌteng gumunga. 29 Ket no matua anay bunga, ipayatab nayna ta narateꞌ anay panaon nin pangyayatab.”
Say Iritrato nan Bikoy nin Mustasa sa Israel
30 Wana et ni Jesus, “Ani et baleꞌ a usaren kon pangngiritrato sa pagꞌaadiꞌ nan Dios, o ani et a pangiyarigan ko? 31 Say iyalawang nin pagꞌaadiꞌ nan Dios ket maiyarig sa bikoy nin mustasa a sangkadaitean sa sarban bikoy iti sa mundo. Baleꞌ no naimula yayna, 32 tumuboꞌ ya ket magꞌin yan sangkaalakyan sa sarban pupising.c Sumanga yan alalaki ket saray manuk-manok, umapon sara kona tan mipugar sara sa sirong nin susanga na.”
33 Abaw et a wantin pangingiyarig a inusar na ni Jesus sa pangangakay na sigon sa angan-anganen nan mababaꞌ ran tarusan. 34 Kasan niyakay na konran tutawo a kai ya nangusar nin pangingiyarig. Baleꞌ no sara-sara tamoꞌ tana nin tumutumbok na, ipapalaway nay sarba konra.
Pinatgen naya ni Jesus a Maksaw nin Tribunada
35 Sin yinmabi, wana ni Jesus konran tumutumbok na, “Sumaki atamon makodtaw sa rubariꞌ.” 36 Ket rinmuran saraynay tumutumbok na sa baluto ta itaw yaynan gindat si Jesus. Ket linakwanan rasaray tutawo. Main anamaet nin nikialuyon konra nin raruman bubaluto. Sin kapresan ran mansumaki, 37 kapingmatan tribunada ana. Mangkaspakan yaynan daluyon a baluto ra kanyaꞌ nin mangkapnoꞌ yaynan ranom. 38 Sin sain, si Jesus, mampaꞌlek ya nin nialunan itaw sa ulin. Ket, pinukaw raya a wanra, “Maistro, kasa para nin kwinta komo a manlumdeg atamoyna?”
39 Ket nibangon ya miꞌsa naya nin ginan-gan a tribunada a wana, “Tumgen ka!” tan wana konan taaw, “Pakatinek ka!” Ket tinumgen yay tribunada tan tinminek yay taaw. 40 Ket wana konran tumutumbok na, “Aninay katakrutan moyo! Kasa et nin pagmamatalek moyo!”
41 Pinasyan liꞌmo ra ket wanra sa saya tan saya, “Ani yaytin tawo a mataman nin si tribunada tan say daluyon ket tumulok kona!”