Pinaandaꞌ naya ni Jesus a Tawon Nasrepan nin Ispiriton Dukaꞌ
5
Ket nakarateꞌ saradtaw sa rubariꞌ, sa lugar ran Gerasenoa. 2 Sin inmarawas ya si Jesus sa baluto, tampor a main nin sayay lalakin ibat sa yuyukib nin pannabunan a sinumnaꞌ kona. Sitin lalaki, nasrepan yan ispiriton dukaꞌ 3 tan mampiikap yadtaw sa yuyukib nin pannabunan. Kai ya gapoyti nin mabaror mataman et nin kadina a usaren nin ipamaror kona. 4 Anaod, niꞌno rayayna nin binaror sa ayi tan gamet, baleꞌ niꞌnu-niꞌno nayna nin binulsot a kadina tan binariꞌ a pusas. Pinasyan kasaw na ket kasa gapo nin makapangipukpok kona. 5 Awro tan yabi ket itaw ya sa tutalugtog tan sa pannabunan a tumaꞌwa-taꞌway ya tan sugat-sugaten nan bato a lalaman na.6 Sin naalilbiꞌ nayayna si Jesus itaw et sa adayoꞌ, nalayo yan sinumnaꞌ tan nanalimukod ya sa adapan na. 7 Ket wanan niburyaw, “Jesus, Anak nan Sangkataꞌgayan nin Dios, ani ket a kabiangan mo kongko? Isamba mo sa adapan nan Dios a kai nako nin padyaꞌdyaen!” 8 Nibaritaꞌ na a wanin ta si Jesus ket ginan-gan nayayna a wana, “Ispiriton dukaꞌ, lakwanan maytin tawo!”
9 Tinepet na ni Jesus kona, “Ani a tawag komo?”
Ket wana, “Say tawag kongko ket Rinibu-ribo ta siꞌkami, abaw kamin tuloy.” 10 Ket sin sain, nipaingangaꞌdo na kona ni Jesus a andiꞌ nasara nin palakwanen konan sitaw a lugar.
11 Sin sain, main nin abaw nin tuloy nin baboy a mampangan-pangan sa rigrig nin talugtog itaw. 12 Wanan nipaingangaꞌdo nin ispiriton dukaꞌ kona ni Jesus, “Aburuyan mo tana pa a sumrep kami konran baboy.” 13 Ket wana mako sarayna edet. Kanyaꞌ nin linmiwaꞌ sara kona nin lalaki tan sinumrep sara konran baboy. Nangimros saray baboy a magrwanribo sara kaꞌbaw, nin namunta sara sa kikiras sa temben nin baybay. Ket nanaboꞌ sara tan nirebreb sara ngaꞌmin.
14 Ket saray mampangalilaꞌ konran baboy, nagsipalayo sara tan nibari-baritaꞌ ray nangyadiꞌ sa babali tan sa bubaryo. Saray tutawo nagsipako sara nin kumikit sa nangyadiꞌ. 15 Nako sara kona ni Jesus ket naꞌkit rayaytaw si tawon ibwatan ran rinibu-ribo nin ispiriton dukaꞌ. Mantumekreꞌ ya tan nisket yayna tan limpyo anay pangingisip na. Ket linmiꞌmo sara sa nangyadiꞌ. 16 Saray nakaꞌkit nin mismo sa nangyadiꞌ, inistu-isturya ra konran raruman tutawo a nangyadiꞌ konan tawo tan konran baboy. 17 Ket saray tutawo, dinawat-dawat ra kona ni Jesus a lumakwan yayna sa lugar ra.
18 Sin manrumuran yayna si Jesus sa baluto, sitaw si tawon ibwatan nin uispiriton dukaꞌ, dinawat na a mayi kona.
19 Baleꞌ kai naya nin inaburuyan ni Jesus a wana kona, “Sumubliꞌ kaynadtaw komoyo ket ibaritaꞌ mo konran kabbali mo a sarban ginwaꞌ nan Catawan komo tan no paꞌnoy nipangingaꞌdo na komo.”
20 Ket nibwat yaynay tawo tan naku-nako ya sa intiron sakop nin Mapuloꞌ a Bubabali a mantawagen nin Decapolis. Nikaꞌ na nin nibari-baritaꞌ ngaꞌmin a ginwaꞌ na ni Jesus kona, ket nakaꞌngap sara ngaꞌmin a nakarngeꞌ.
Banaꞌ sa Pagmamatalek Mapaandaꞌ na ni Jesus a Masakit
21 Sin sinmaki saraynaet si Jesus nin sinmubliꞌ sa rubariꞌ, abaw saray tawon inmarak konadtaw sa rigrig nin baybay. 22 Ket main nin sayay pangulo nin sinaguga a rinmateꞌ itaw nin say ngaran na ket Jairo. Sin naꞌkit naya si Jesus, nitalimukod na sa adapan na 23 tan nikidawat yan ingangaꞌdo para konan gumalasitang nin anak na a wana, “Mangkamati yay anak ko. Mayi ka tana kadiꞌ sa bali ko tan ipababo moy gamet mo kona ta pigaw nin umandaꞌ ya tan mabyay ya et.”
24 Ket nayi ya si Jesus kona. Pinasyan kaꞌbawan ran tawon nayi-nayi kona a nileletletan raya.
25 Main anamaet nin babayidtaw nin nalabas a reges nin karirigla na sa luob nin labinrway taon ana. 26 Mampangirangep ya sa katatambar ra kona nin abaw anan duktor. Naꞌpos anay main na sa kapapatambar na, baleꞌ kai ya nin inmandaꞌ no kai naluod yayna edet a masakit na. 27 Nakarateꞌ kona a maipaꞌkaꞌ kona ni Jesus. Kanyaꞌ nin nikiletletan ya konran tutawo anggan nakakadani ya sa gurot na ni Jesus ket kinudit nayay aysing na 28 ta wana sa nakem na, “Makudit ko tanay aysing na ket umandaꞌ akoyna.”
29 Ket kinudit naynaod a aysing na ni Jesus. Tampor nin tinumgen a kadadayaꞌ na tan naingar na a limpyo yayna. 30 Sin sain, naaraman naynamaet ni Jesus nin linmiwaꞌ kona a pakayadiꞌ. Ket nibring yan inmadap konran tutawo ket wana, “Siꞌnoy nangudit nin aysing ko?”
31 Wanran tumutumbok na kona, “Maistro, mangkaꞌkit moyna anaod nin abaw a tawo a mampileletletan raka, ket ambaleꞌ a tepeten mo et a wamo, ‘Siꞌnoy nangudit kongko?’ ”
32 Baleꞌ pasta-pastang ya si Jesus ta pigaw nin kikiten na no siꞌnoy nangudit kona. 33 Sitaw si babayi, banaꞌ ta tandaꞌ nay nangyadiꞌ kona, kinmadani ya kona ni Jesus nin mangingintar ya banaꞌ sa liꞌmo na. Nanalimukod ya sa adapan na ket nibaritaꞌ na a sarba kona. 34 Wana ni Jesus kona, “Arikong, banaꞌ sa pagmamatalek mo inmandaꞌ kayna. Mako kayna nin matinek anay kaisipan. Inmandaꞌ kayna nin liso konan masakit mo.”
35 Sin kapresan nay mampagꞌirgo et ni Jesus ket main nin rinmateꞌ nin ibat sa bali na ni Jairo a wanra, “Andiꞌ mayna nin mulistyawen et si Maistro ta nati yaynan lamang a anak moyo.”
36 Baleꞌ narngeꞌ nayti ni Jesus ket wana kona ni Jairo, “Andiꞌ ka nin mapaga; basta magmatalek ka.” 37 Ket kasan inaburuyan nan mayi kona no kai si Pedro tan saray mibsat a Santiago tan Juan tamoꞌ. 38 Ket nakarateꞌ sara sa bali nan si pangulo nin sinaguga. Naꞌkit na ni Jesus a gewgewan, a main nin mampangabet-abet tan manꞌumakis nin maksaw. 39 Sinumrep ya sa bali tan wana konra, “Ambaleꞌ tin gewgewan? Ambaleꞌ a mampangabet-abet kamo? Kai ya nin nati; mampaꞌlek ya tamoꞌ.”
40 Ket kinakaꞌlisan rayan panuyaꞌ-tuyaꞌ kona nin tutawo. Sin sain, pinaliwaꞌ nasara ngaꞌmin. Miꞌsa kalamoꞌ nasaray matua nan anak tan saray tulon kalalamoꞌ na linmuob ya si Jesus sa kwarton kamiꞌnan nan anak. 41 Ginaꞌgetan nay gamet na tan wana kona sa saritaꞌ ran Hebreo, “Talita, kumi,” a say katarusan, “Naning, mibangon ka.” 42 Ket tampor nin nibangon yay anak ket linmalako ya. Si anak ket labinrway taon na.