Mamaandaꞌ ya a Cristo nin Sayay Kai nin Makakimey
9
Ket rinmuran sara anamanaet sa baluto si Jesus nin sumubliꞌ sa rubariꞌ a mako yayna sa babalia. 2 Amboꞌ nin naꞌteng sin itaw sarayna, main nin nirateꞌ ran tutawo nin sayay lalakin kai nin makakimey a nakaidaꞌ sa idaan na. Naꞌkit na ni Jesus a pagmamatalek ra kona ket wana konan lupoy, “Rumiriket ka, amigo. Napirduna anay kukasalanan mo.”3 Ket itaw, main nin umno ray Madudunong sa Gugan-gan. Sin narngeꞌ raytaw ket wanra sa nakem ra, “Manꞌuꞌna-uꞌnawan nayay Dios nin sitin tawo!”
4 Baleꞌ, nataros na anaod ni Jesus a iti sa nakem ra kanyaꞌ nin wana konra, “Ambaleꞌ nin dukaꞌ a pangingisip moyo? 5 Wamoyo tana kumon ket mas magwaꞌ et nin ibaritaꞌ a umandaꞌ nin makalalako kayna, dyan si mapirduna anay kukasalanan mo! 6 Ket, ta pigaw nin matandaan moyo a siꞌkon si Pinaitawo ket main nin pakayadiꞌ kon mamirdunan kukasalanan iti sa lutaꞌ, ibaritaꞌ koyti,” ket anaod wana ni Jesus konan paralitiko, “Mibangon ka. Awiten ma in si undayon mo ta sumubliꞌ kayna komoyo.”
7 Nibangon yay tawo ta nugot yayna sa bali ra. 8 Sin naꞌkit rayti nin tutawo nin itaw, nakaꞌngap saran awit a liꞌmo tan rinayo rayay Dios ta binyan nay tawo nin wanin a pakayadiꞌ.
Kayaban nasara nin Cristo a Makasalanan
9 Linmakwan yadtaw si Jesus. Sin manlumalako ya, naꞌkit nayay maniningir nin buisb a si Mateo nin nakatekreꞌ itaw sa upisina na. Wana ni Jesus kona, “Magꞌin kan tumutumbok ko.”
Inumdeng ya si Mateo tan nayi ya kona ni Jesus.
10 Nangan yadtaw si Jesus tan saray tumutumbok na sa bali na ni Mateo, ket abaw saray maniningir nin buis tan amboꞌ nin rilihyuso a kadungo ra. 11 Main nin myimbro sa dupong ran Pariseo a mampangimaton kona ni Jesus, ket wanra konran tumutumbok na, “Ambaleꞌ a mangkidungo yay maistro moyo konran wanin a tutawo?”
12 Narngeꞌ nayti ni Jesus ket inubatan nasara nin sayay alimbawaꞌ. Wana, “Amboꞌ nin saray marigsa a makatkap nin duktor, no kai edet, saray main nin masakit. 13 Maipaꞌkaꞌ konan siin, adalen moyan maong a mabasa sa Masanton Kasuratan a wanan Dios, ‘Say mapaingangaꞌdo kamo konran kapada moyon tawo a makapaririket kongko, amboꞌ a say daꞌton moyo.’c Adalen moya in ta nako akodti sa lutaꞌ nin mamagbabawiꞌ konran makasalanan amboꞌ konra nin kano ket matunong sara.”
Say Pisiswian nin say Baꞌyo tan say Nakaiparmawan
14 Main nin niꞌsa, nako saray tumutumbok na ni Juan a Mammawtismo kona ni Jesus. Wanra kona, “Siꞌkami tan saray Pariseo, ket mampagkulasyon kami. Ambaleꞌ a saray tumutumbok mo ket kai sara gapo nin mampagkulasyon?”
15 Niꞌbat na ni Jesus konra nin saya yan alimbawaꞌ, “No main nin kasal, kasan sapo nin kiriga sara konan nubyo a kumbidado na! Legꞌan a kalamoꞌ raya et a nubyo, kai sara gapo nin gumereng. Baleꞌ rumateꞌ liꞌ a panaon a maikadayoꞌ ya ket magkulasyon sarayna.”
16 Wana et ni Jesus a maipaꞌkaꞌ sa baꞌyon akay na, “Kasan tawon manaliꞌneb nin baꞌyon abel sa maꞌran a aysing ta no gawꞌen a wanin, si baꞌyon abel kumsen ya liꞌ ket guruyen naya a maꞌran nin abel ket maluod yay bisang na. 17 Kasaynamaet a lamang nin mangikwa nin mampibaliw nin arak sa maꞌran a katat nin supot a pangangwan, ta no gawꞌen a wanin, si mampibaliw nin baꞌyon arak tubraken naya, ket masidaꞌ yay supot tan mapirdin maꞌmet a arak. Matkap a say baꞌyon arak ket ikwa sa baꞌyon pangwan ta pigaw nin kasa konran saraytin rwa a mapirdi.”
Pinaandaꞌ nan Cristo a Grabin Mumasakit
18 Mampagꞌirgo ya et si Jesus sin rinmateꞌ yay sayay pangulo nin Judio. Tinmalimukod ya sa adapan na ni Jesus tan wana, “Kai ya et nin nainsanan nin nati a anak kon babayi. Mayi ka tana kadiꞌ sa bali ko tan ipababo moy gamet mo kona ta pigaw nin sumubliꞌ yan mabyay.”
19 Inumdeng ya si Jesus tan nayi ya kona. Nayi sara anamaet a tumutumbok na.
20-21 Sin adap rayna sa bali nan upisyal, main nin babayin kinmadanin nako sa gurot na ni Jesus. Sitin babayi ket labinrway taon anan mandumayaꞌ ya nin kasan tegen. Ket wanan sitin babayi sa nakem na, “Makudit koya tanay aysing na umandaꞌ akoyna.” Kanyaꞌ nin kinudit nayay saroy nan aysing na ni Jesus.
22 Nibring yan inmadap si Jesus ket wana konan babayi, “Arikong, rumiriket ka. Banaꞌ sa pagmamatalek mo ket inmandaꞌ kayna.” Ket tampor konan sitaw anan udas inmandaꞌ ya.
23 Nituloy raynay nako ket nakarateꞌ sara sa bali nan pangulo. Sinumrep ya si Jesus ket sin naꞌkit nan itaw main nin musiko tan gewgewan ran tutawo, 24 wana, “Lumiwaꞌ kamodti ngaꞌmin. Kai ya nin nati a anak; mampaꞌlek ya tamoꞌ.” Ket kinakaꞌlisan rayan panuyaꞌ-tuyaꞌ kona. 25 Sin napaliwaꞌ sarayna ngaꞌmin a itaw, linmuob ya si Jesus sa kwarton kamiꞌnan nan anak. Ginaꞌgetan nay gamet na ket nibangon ya. 26 Natanda-tandaan tin ginwaꞌ na ni Jesus sa sarban bubabalidtaw.
27 Nibwat yaynadtaw sa bali nan upisyal si Jesus. Sin manlumalako ya, rwa ran bulag a tinmumbok konra. “Kaꞌdwan rakami kadiꞌ, siꞌkan nipangakoꞌ a puri na ni David,” wanran nitaꞌwa-taꞌway.
28 Sin sinumrep ya si Jesus sa bali, saray rway bulag inmarak sara kona. Tinepetan nasara a wana, “Mamper kamo nin mababaꞌ kon gawꞌen a makaꞌkit kamo?”
“Oꞌ, Maistro, mamper kami,” niꞌbat ra.
29 Inapros na a mata ra tan wana, “Mangyadiꞌ komoyo a tepren moyo.” 30 Ket nakaꞌkit sarayna. Mairot nin nibibilin na konra a andiꞌ ra ibari-baritaꞌ a maipaꞌkaꞌ sa sayti.
31 Wanin man a wana ni Jesus, nikaꞌ ran lamang nibari-baritaꞌ sa sarban bubabalidtaw a maipaꞌkaꞌ kona.
32 Mampibwat saraynaytaw saray rwan gindat a bulag sin main nin tawon naumel ta nasrepan yan ispiriton dukaꞌ a nirateꞌ ran umno ran katawo kona ni Jesus. 33 Sin napalakwan nayayna ni Jesus a ispiriton dukaꞌ, nakapagꞌirgo yayna a tawon naumel ket nakaꞌngap sara ngaꞌmin a tutawodtaw. “Sawanin kami tamoꞌ nakaꞌkit nin wanin iti sa Israel,” wanra.
34 Baleꞌ main nin Pariseo nin itaw ket wanra, “Si uunuren ran uispiriton dukaꞌ binyan naya in nin pakayadiꞌ kanyaꞌ nin makapamalakwan yan ispiriton dukaꞌ.”d
Say Pakapaga nan Cristo konran Abaw a Tawo
35 Kinaꞌ-kinaꞌ na ni Jesus a abaw nin bubabali tan bubaryo nin niyakay naya sa sinaguga tan nipata-patandaꞌ nayay Mabistan Patandaꞌ nin maipaꞌkaꞌ sa pagꞌaadiꞌ nan Dios. Pinaa-paandaꞌ nasaray tutawon main nin nagsikabarang nin masakit tan manꞌirangep sa lalaman ra. 36 Kaꞌdwan nasaran tuloy a nadupong nin abaw a tutawo ta marereꞌ sara tan kasan makatulong konra a baraꞌmo saran karniro nin kasan mangipastor konra. 37 Ket wana konran tumutumbok na, “Abaw saray nasadyaꞌ nin masagyat nin sumrep sa Pagꞌadian. Wanin man, matalag saray mangyayatab, 38 kanyaꞌ edet nin idasal moyo konan Dios a syay main nin ikon sa yayataben a mangibakiꞌ ya et nin saray trabahador nin kiyatab.”