Pinaandaꞌ naya ni Jesus a Tawon Nati yay Takyay na
3
Saya anamanaet nin wantin awro, nako ya anamanaet si Jesus sa sinaguga. Main nin sayay lalakidtaw a nati yay sayay takyay na. 2 Ket manꞌimatunan raya si Jesus nin saray kuntra kona no tambaren naya kasi mataman nin Awron Painawa, banaꞌ ta mampaningkap saran padalan a maparsawan rayan mansumubag sa Gugan-gan. 3 Ket wana konan sitaw si lalaki, “Mako kadti sa adapan.” 4 Miꞌsa wana konran tutawo, “Ani a aburuyan nin Gugan-gan tamo no Awron Painawa? Magwaꞌ kasi a tumulong o a mamaidap? Magwaꞌ kasi a mamabyay o a mangmati?”Nititinek sara tamoꞌ baleꞌ. 5 Ket masager ya baleꞌ si Jesus a sinusaꞌsa nasaran pinastang. Wanin man, kaꞌdwan nasaran lamang ta kasan pakiingar ra sa kapada ran tawo. Ket wana konan lalaki, “Ipaꞌnat may takyay mo.” Nipaꞌnat naya ket tampor linmimpyo yay takyay na. 6 Ket linmiwaꞌ saran tampor a Pariseo tan nako sara nin nikitarusan konran tutawo na ni Adiꞌ Herodes no paꞌnon pammapati ra kona ni Jesus.
Abaw saray Tutawon Tinmumbok kona ni Jesus
7 Si Jesus tan saray tumutumbok na ket nibwat sara anamanaet nin nako sa rigrig nan Baybay Galilea. Abaw saran tuloy a tutawo nin tinmumbok konra a nangibwat sa prubinsya nin Galilea tan sa Judea, 8 tan sa syudad nin Jerusalem, tan sa prubinsya nin Idumea, tan sa rubariꞌ nan Ilog Jordan, tan sa lulibed nin syudad nin Tiro tan Sidon. Inmarak sarayti kona ni Jesus banaꞌ ta narngeꞌ ray maipaꞌkaꞌ sa makapangyayadiꞌ a gugawaꞌ na. 9 Abaw saran tuloy a tutawo kanyaꞌ nin pinangisadyaꞌ nasara ni Jesus nin ruranan nan baluto a tumutumbok na ta saliꞌ no piraramuꞌyukan rayan saraytin abaw a tutawo. 10 Banaꞌ ta abaw saray pinaandaꞌ na, nileletletan sara sa libed na a tutawon main nin masakit ta pigaw tana nin makudit raya. 11 Ket barang sayay tawon nasrepan nin ispiriton dukaꞌ a makaꞌkit kona, lumukbob sara sa adapan na tan umagsit sara a wanra, “Siꞌkay Anak nan Dios!”
12 Baleꞌ binibilin nasaran maong ni Jesus a andiꞌ ra nin ibaritaꞌ a syay Anak nan Dios.
Saray Labinrwan Lulalaki a Piniliꞌ na ni Jesus
13 Ket nako ya si Jesus sa lugar a pupurod. Nanagyat yan lulalakin mayi kona ket nayi sara. 14 Nanuyoꞌ yan labinrwa sara konra a tinawag na anamaet nin apostolesa ta pigaw nin kikalamoꞌ sara kona tan ta pigaw nin ibakiꞌ nasaran mangipata-patandaꞌ nin minsahi nin nangibwat konan Dios a bilang sa man-gawꞌen na. 15 Binyan nasaran pakayadiꞌ nin mamalakwan nin uispiriton dukaꞌ konran tutawon nasrepan ra.
16 Ket sarayti a labinrwan piniliꞌ na:b si Simon a pinangaranan nan Pedro, 17 saray aꞌnak na ni Zebedeo a si Santiago tan si Juan a pinangaranan nasaran Boanerges a say katarusan na ket Anak nin Kudor, 18 si Andres, si Felipe, si Bartolome, si Mateo, si Tomas, si Santiago a anak na ni Alfeo, si Tadeo, si Simon a myimbro nin grupon ribulusyunaryo, 19 tan si Judas Iscariote a syay magtraidor kona ni Jesus.
Naparsawan ya si Jesus a Main konay Pakayadiꞌ na ni Satanas
20 Sinmunor, sinmubliꞌ sarayna sa bali. Abaw saraynaet a tutawon inmarak kona, kanyaꞌ nin kai nayna nin maadap a mangan ni Jesus tan saray tumutumbok na. 21 Sin natandaan raytin kapamilyawan na ni Jesus, nako saradtaw ta pigaw nin kalapen raya ta wanran tutawo ket naluang yayna.
22 Wanra baleꞌ nin saray Madudunong sa Gugan-gan a nangibwat sa Jerusalem, “Si Beelzebul a uunuren ran uispiriton dukaꞌ, nasrep naya si Jesus. Ket sa tulong nan lamang, palakwanen nasara ni Jesus a ispiriton dukaꞌ konran tutawo.”
23 Sin sain ket pinididinep nasara ni Jesus a tutawo tan wana konra a nangusar yan sayay pangingiyarig, “Paꞌnon sain a si Satanas ket palakwanen nay lalaman nan diri ey? 24 Kapada nin siin ket no bilang wadiꞌ si sayay nasyon ket matau-tao ya tan milalaban saray tutawo na, kai ya nin magnayon. 25 Wanin a lamang no sa sayay pammali o babali ket, mapuruk-purok sara nin miaaway a saya tan saya, misisyay a piratꞌanan ra. 26 Wanin anamaet no si Satanas ket mampalakwanen nasaray kapada nan uispiriton dukaꞌ, say rabay nin irgwen ket mangkuntrawen nay kadiryan na. Kai edet nin miꞌteng no kai magkamain nin anggawan a pakayadiꞌ na.
27 Si Satanas, kapada nayay sayay magsen nin tawo a kasan makasrep sa bali na ta pigaw nin kalapen ray kukayadian na no kai raya yapoꞌ nin baruren in a magsen nin tawo. Ket no nabaror rayayna, magwaꞌ rayna nin kalapen ngaꞌmin a rabay ra.
28 Ibaritaꞌ koyti komoyo: Mapirduna saray tutawo sa nagsikabarang a kukasalanan ra, pati sa animan et a dukaꞌ a irgwen ra konan Dios tan konran kapada ran tawo. 29 Baleꞌ si siꞌnuman a magꞌirgon dukaꞌ maipaꞌkaꞌ sa ginwaꞌ nan Ispirito nan Dios, kasa gapo nin pakapirduna na no kai edet, kasalanan na in anggan-angga.” 30 Nibaritaꞌ nayti ni Jesus banaꞌ ta wanra anaod ket nasrepan yaynan ispiriton dukaꞌ.
Saray Peteg a Ina tan Bubsat na ni Jesus
31 Sin rinmateꞌ saradtaw si inay na tan saray bubsat na ni Jesus, tinmaꞌgan saradtaw sa rikor tan nipakayaban raya. 32 Nalibed ya si Jesus nin tutawon nakatekreꞌ ket wanra kona, “Si inay mo tan saray bubsat mo itaw sara sa rikor ket mandawaten ra a mako kadtaw konra.”