Iesu Iꞌabana Harau Haea Rua Euhunakia Kateiroro.
9
Iesu ehore iꞌabana haukia harau haea rua eaparinakia,
ebatoꞌunakia,
tabura mai hiabu ebenakia paipai kiꞌa obokia ikoikiai kateuꞌu ahinakia mai inawa haeai haeai kateba maurinakia,
2 ba euhunakia Tirama ena obia aiarana pouna kateiroro aina abomo inawa haukia kateba namonakia.
Luka 9:1-22
3 Ehina benakia,
etibaha “Emi harima ai taba ha aꞌi katoaꞌina,
ikaiꞌini ahaꞌi,
mahoa ahaꞌi,
aniani ahaꞌi,
moni ahaꞌi,
abomo emi ibatoto ibaruakia aꞌi katoaꞌinakia.
4 Itu tabanai katokaraꞌau raninai weiamo katomiaho keaomo aiara weiana katohabona.
5 Ba maearima aꞌi kateaꞌi taeanimi raninai ꞌapumi apurorokia katoahuahu obo ba ekia aiara katohabona ia irobekia ꞌabinai keao.”
6 Ba iꞌabana haukia temikiri teao aiara haha aokiai pou namona teiroro aina abomo maearima tebamaurinakia.
Heroda Ena Nuatae Keꞌiobi Haraina Iesu Hanona Tai.
7 Heroda Obia hauna taba ikoinai Iesu ebabai poukia eoꞌo raninai aona earoꞌari,
pokina baika tehina bena baꞌuere robe hauna Ioane aba ꞌariai emikiri mue.
8 Baika tetibaha Elia aba ewaira tina,
haeamona baika tetibaha mahabanai hauna ꞌaiꞌaina ha bariu emikiri mue.
9 Ia Heroda etibaha,
“Ioane ꞌakona aba akabe hurina,
ꞌa ꞌuruna ṉaona aka ṉahomakia nibabai hauna hanona tai?”
Ba ena nuatae hanona keihana.
Iesu Taha Ima (5,000) Ebanianinakia.
10 Iuhubeau haukia temue Iesu herena taba taba tebabai haukia ia wairanai tehinanakia.
Weiana ia ehore ebakaꞌa obonakia ia kipokia teao aiara ha atana Betesaida ai.
11 Ia maearima teꞌiobina Iesu aba weia hanona ikoikiai ia murinai teao.
Eaꞌi taeanakia,
Tirama ena obia aiarana ꞌabina ehinana abomo mauri tenuatae haukia ebamaurinakia.
12 Beraura aba erabirabi iꞌabana haukia harau haea rua temai herena tehina bena tetibaha,
“Maearima neiakia mouhunakia,
temeraꞌa temeao aiara ꞌao uma herekai haukia weia katemiaho kipokia ekia aniani katetabu pokina ꞌeka neiana hanona hanoꞌakuna.”
13 Iesu ekia ꞌabi ebamuena etibaha,
“Wai taba ha tomobenakia temeani.”
Ia tetibaha,
“Ai heremaiai ṯemiaho haukia hanona parawa ima maia rua mo,
konuatae kataeao aniani katakawanakia maearima neiakia ꞌeukia,
ꞌu?”
14 Hau ꞌabaeana hanona ikoinai taha ima (5,000) ꞌabana.
Iesu iꞌabana haukia ehina benakia etibaha,
“Maearima neiakia haukia imabui imabui katoba miatinakia.”
15 Ehinana hauna ihobonai iꞌabana haukia tebabaina ba maearima ikoikiai temiati.
16 Iesu ehore parawa ima mai maia rua eaꞌinakia eaꞌa taea kupa eihana ebanamona murinai ehobi ꞌitiꞌitinakia.
Ba iꞌabana haukia ebenakia katekaitinakia maearima wairakiai.
17 Weiana ikoikiai teaniani eao teani ꞌari,
iꞌabana haukia aniani harikia pohea harauhaea rua tebabonunakia.
Petero Iesu Ehina Pouna Ia Hanona Keriso.
18 Rani ha Iesu kipona ebahubaꞌari,
iꞌabana haukia hanona ia herenai temiaho ebakainakia etibaha,
“Maearima au ahaꞌuai taba ṉa tihoma?”
19 Ia ena ꞌabi tebamuena tetibaha,
“Baika tiꞌabi Ioane Baꞌuere robe hauna,
baika tiꞌabi Elia,
baika tiꞌabi mahabanai hauna ha aba ꞌuainai eꞌari hauna bariu emauri mue.”
20 Ebakainakia,
“Ia wai hanona taba ṉa tuhoma?
Au hanona tai?”
Petero ena ꞌabi ebamuena etibaha,
“Oi hanona Keriso Tirama euhuniꞌo haumu.”
Iesu Ena ꞌAri Pouna Ehinana.
21 Ia ehore eharabunakia hau ha aꞌi katehinabe ꞌapuana.
22 Haeamona etibaha,
“Maearima Nahuna hanona kehaiara kiꞌa baha,
aiara hau apaꞌuakia,
robe haukia apaꞌuakia mai rauhubu poki haukia kateꞌoatana abomo kateahu ꞌarina,
ia wapu ibaihaunai kemikiri mue.”
Iesu Paunai Mauri Keneꞌena Hauna Mauri Keaꞌina.
23 Ikoikiai ehinabe muenakia etibaha,
“Tai ha nenuatae au keꞌabanaꞌu raninai,
ia kipona ena mauri kehabona ena matiu ibiri ropo keaꞌi taeana kebuana rani ikoinai au muriꞌuai kekaꞌa.
Luka 9:23-62
24 Pokina ena mauri keaꞌi ꞌinina hauna hanona ena mauri kebaꞌakaumana,
ꞌa au pauꞌuai ena mauri keneꞌena hauna hanona mauri keaꞌina.
25 Hau ha hanopaka tabakia maikoinai peaꞌina ena mauri peba ꞌakaumana ꞌao peaꞌi kiꞌana raninai ena namo hanona taba?
26 Hau ha au pauꞌuai ꞌao eꞌu ꞌabi paukiai kehaumaea raninai,
Maearima Nahuna abomo ia kehaumaeaina ena nuabiai abomo Hamana ena nuabiai ena aneru robekia kipokia ekia mai raninai.
27 ꞌAbi tohana mo au wai nahina benimi,
neia tikoroti haukia baika hanona aꞌi kateꞌari keaomo Tirama ena obia aiarana kateihana.”
Iesu Ihana Ebahaeaina.
28 ꞌAbi neiakia ehinanakia wapu ꞌababani teore murikiai Iesu ehore Petero,
Ioane mai Iakobo eba kaꞌanakia oeoai tekaraꞌau kebahubaꞌari paunai.
29 Ebahubaꞌari aonai ia wairana ehaeai ena habuni epore eꞌimare ꞌimare.
30 Hau rua ia kipokia teꞌabiꞌabi,
Mose mai Elia.
31 Mai nuabikia tewaira tina Iesu kipokia Tirama ena nuatae ihobonai Ierusalemai keꞌari hauna terobahu aina.
32 Petero ꞌabana kipokia hanona teparua ꞌari ba tenoꞌa,
Iesu nuabina mai hau rua herenai tekoroti haukia abomo teihanakia.
33 Hau rua Iesu aba katehabona aonai,
Petero ehore Iesu ehina bena etibaha,
“Poki haumu e,
aika neia nahamiaho hanona enamo kiꞌa baha!
Ai iꞌaua aihau katababainakia,
ha oi ꞌeumu,
ha Mose ꞌeuna,
ha Elia ꞌeuna.”
Ia hanona aꞌi eꞌiobina paunai eꞌabi ꞌabaea.
34 Ia niꞌabi ohomo aonai ꞌauhao emai ikoinai ekaiabunakia,
ba ia ꞌauhao aonai hanona tetaꞌu kiꞌa.
35 Aia ha ꞌauhao aonai emai etibaha,
“Neiana hanona Au Nahaꞌu,
atinaꞌana hauna,
aiana katona.”
36 Aia weiana epua murinai Iesu ikupaiana teihana.
Iꞌabana haukia ꞌabi ha aꞌi tehina ꞌapuana,
abomo taba teihanakia haukia rani weianai hanona hau ha aꞌi tehina bena.
Iesu Miori Aonai Auba Kiꞌa Obona Euꞌu Ahina.
37 Erani ia oeoai teriri Iesu maearima boꞌona kipokia tebaitabu ahi.
38 Hau ha maearima baiatakiai eio etibaha,
“Baꞌiobi haumu e,
au oi nanoiniꞌo,
nahaꞌu neiana moihana,
nahaꞌu hamomona mo neiana.
39 Rani baika auba ha miori neiana niaꞌina,
beronai neio,
nibaꞌororo abuna,
pinanai ꞌutoꞌuto tikarahi,
aꞌi nihabona keaomo hauna nimaniꞌa obo.
40 Au tiꞌabaniꞌo haukia anoinakia auba kiꞌa obona kateuꞌu ahina,
ba ia aꞌi etainakia.”
41 Iesu ehina benakia etibaha,
“Aꞌikakauma ahaꞌi mai kiꞌa babai uruna haumi,
heremiai kamiaho keaomo aita?
Nahumu omaiaina hereꞌu.”
42 Miori ekaꞌa haha aonai biriua kiꞌa obona ehore miori ꞌanoai eꞌatiaina ebaꞌororo abuna,
Iesu ehore auba kiꞌa obona ebatana ba miori ebamaurina,
eaoaina hamana ebena.
43 Tirama ena hiabu rarina ꞌakinai maearima ikoikiai tetaꞌu taꞌu huri.
Ia Iesu taba ebabaina hauna tiaonamoai ohona aonai iꞌabana haukia ehina benakia etibaha,
Iesu Keꞌari ꞌAbina Ehina Pouna.
44 “ꞌAbi tabana heremiai aba kahinana hauna tomobahuai haraina.
Maearima Nahuna hanona hinahinana katehina maearima herekiai.”
45 ꞌA ia ena ꞌabi neiana anina aꞌi teꞌiobina.
Ia herekiai taba eꞌuahina hauna ebuni buonai obona aꞌi teobo,
ba katebakaina hanona tetaꞌu.
Tai Hanona Eapaꞌua.
46 Rani ha iꞌabana haukia kipokia mo baiatakiai tebaihara tae tai hanona keapaꞌua kiꞌa baha.
47 Iesu ekia raona weiana eꞌiobina buonai miori papana ha emaiaina herenai ebakorotina.
48 Ba ehina benakia etibaha,
“Tai ha au ataꞌuai miori papana neiana niaꞌi taeana hauna hanona au niaꞌi taeanaꞌu,
au niaꞌi taeanaꞌu hauna hanona euhunaꞌu Tirama abomo niaꞌi taeana.
Wai ikoimiai baiatamiai ha ekoꞌi koꞌi kiꞌa baha hauna ia hanona keapaꞌua kiꞌa baha.”
Aꞌi Niꞌoatanimi Hauna Emi Hau.
49 Ioane Iesu ehina bena etibaha,
“Poki haumu e,
ai hau ha taihana oi atamuai auba kiꞌa obokia euꞌu ahinakia.
Ba ai tahina bena kebapuana pokina ia hanona aika ꞌabaka ahaꞌi.”
50 Iesu ehina benakia etibaha,
“Aꞌi patobaꞌorona,
pokina aꞌi niꞌoatanimi hauna hanona wai ꞌabami.”
Samaria Haukia Iesu Aꞌi Tenuatae aina.
51 Iesu kemue kupa keao ranina ekaibari aonai ia aona ebataburana emikiri Ierusalema keao.
52 Ba iuhubeau haukia euhu ꞌuainakia teao Samaria aiarana ha aonai taba ikoikiai katebaꞌorunakia.
53 ꞌA maearima weia haukia aꞌi teaꞌi taeana,
pokina ia teꞌiobina Iesu hanona Ierusalema niao.
54 Iꞌabana haukia Iakobo mai Ioane babai weiana teihana raninai tebakaina tetibaha,
“Obiapaka e,
nonuatae iruba kupai kataparina,
keriri kebaꞌara koukounakia,
u?”
55 ꞌA Iesu ekabe terarua erikenakia,
56 ba ia teao aiara haeai ha.
Iesu Iꞌabana Hoana Aeahomana.
57 Ia taearai tekaꞌa aonai hau ha Iesu ehina bena etibaha,
“Au oi aeana nuao hanona murimuai kaꞌau.”
58 ꞌA Iesu ia ehina bena etibaha,
“Waeha ꞌaki hanona mai ekia ꞌuri,
ꞌubi roborobokia abomo mai ekia niꞌi,
ia Maearima Nahuna kenoti kearai hanona ꞌekana ahaꞌi.”
59 Haeamona Iesu hau ha ehina bena etibaha,
“Muriꞌuai moꞌau.”
ꞌA hau weiana eꞌabi etibaha,
“Obiapaka e,
maeao hamaꞌu mahore ꞌuaina.”
60 Iesu ia ehina bena etibaha,
“Tiꞌari haukia ekia ꞌari temehorena,
ꞌa oi moao Tirama ena obia aiarana pouna koiroro aina.”