Baꞌuere Robe Hauna Ioane Ena ꞌAri.
14
Rani weianai obia ꞌarana Herod hanona Galilea epoki aina aonai Iesu pouna eona.
2 Ba ena aka haukia ehinabenakia etibaha,
“Ioane baꞌuere robe hauna ahuꞌarina hauna ꞌariai emue emai,
weiana buonai hiabu akakia neiakia ia aonai tiaka.”
3-4 ꞌUaina raninai Herod hanona uahoꞌabana Pilipo atawana Herodia eatawana.
Ba Ioane baꞌuere robe hauna rani ikoinai Herod ehinabena etibaha,
“Babiꞌe neiana oatawana hanona aꞌi ebero.”
Weiana paunai Herod ꞌabi ebaibeni Ioane tebirina wapura itunai tekaiabuna.
5 Herod ena nuatae Ioane keahu ꞌarina,
ia maearima etaꞌu ainakia,
pokina ia hanona mahabanai haunai tebaona.
6 Rani ha Herod ena rama beraurana tatunai Herodia nahuna uahona toꞌu wairakiai ewa,
ba Herod aona ebaonamo kiꞌana.
7 Weiana Herod eꞌabiꞌuai uaho herenai,
ena ꞌabiꞌuai taburana ehinana weiana taba kenoiaina hauna kebena mo.
8 Hinana ena ꞌabiai uaho Herod enoina etibaha,
“Bariu mo Ioane baꞌuere robe hauna arana tihuai koutana kobenaꞌu.”
9 Obia ꞌarana hauna aona earoꞌari.
Ia ena ꞌabiꞌuai baki haukia wairakiai ehinana hauna paunai,
ꞌabi ebaibeni uaho ena noi akana katebabaina.
10 Weiana euhunakia wapura ituna aonai Ioane ꞌakona tekabe hurina.
11 Ioane ꞌarana tihu aonai teutana temaiaina uaho tebena,
ba uaho eaoaina hinana ebena.
12 Ioane iꞌabana haukia temai hauanina teaꞌina teaoaina tehorena.
Ba teao Iesu tebaꞌiobina.
Iesu Maearima Taha Ima Ebanianinakia.
13 Iesu pou weiana eona raninai ahiai eheꞌau ikupaiana eao ꞌeka ꞌabaeana ha,
maearima boꞌona ꞌuru neiana teona hanona ekia aiarai aekiai Iesu murinai teao.
14 Iesu ahiai eriri raninai toꞌu rarina eihana eaokoꞌo ainakia mai ekia inawa ebanamonakia.
15 Aba erabirabi aonai iꞌabana haukia teao Iesu herena teꞌabi tetibaha,
“Neiana hanona ꞌeka ꞌabaeana mai aba kerabi.
Toꞌu haukia mouhunakia temeao,
aiara baika aokiai kipokia ekia aniani temekawa hanona kenamo.”
16 Iesu eꞌabi etibaha,
“Ia hanona aꞌi kauhunakia,
wai taba ha katobenakia kateani.”
17 Iꞌabana haukia teꞌabi tetibaha,
“Ai heremaiai hanona parawa ima mai maia rua ꞌakimo.”
18 Iesu eꞌabi etibaha,
“Tomaiainakia hereꞌu.”
19 Ba maearima ehina benakia tubu ahanai katemiati,
weiana parawa ima mai maia rua eaꞌinakia eaꞌa taea kupa Tirama ebanamona ba parawa ehobinakia,
iꞌabana haukia ebenakia teaoai maearima tebenakia.
20 Ia ikoikiai teaniani teani ꞌari,
iꞌabana haukia aniani harikia tebararo areha ikoinai harauhaea rua tebabonunakia.
21 Weiakia teaniani haukia hanona tahaa ima (5,000) ꞌabana,
hau mo tetuabinakia babiꞌe mai miori hanona aꞌi tetuabinakia.
Iesu Bei Kapenai Ekaꞌa.
22 Weiana murinai Iesu beronai iꞌabana haukia ahiai ebaehe ꞌaunakia kateꞌuai kateao obu abiranai,
aonai ia hanona maearima euhunakia katekaꞌa.
23 Maearima euhunakia tekaꞌa murinai,
ia ikupaiana oeo ha ai ekaraꞌau kebahubaꞌari.
Rabi emai aonai ia hanona ikupaiana weia.
24 ꞌA ahi hanona aba ekarahi ꞌakaumana obu kapenai,
roio niahuao ahuaona pokina baura hanona wairakiai emai.
25 Raurani wapuranai kokoroꞌu ibaihauna niꞌarara ihobonai Iesu bei kapenai ekaꞌa eao herekia.
26 Iꞌabana haukia Iesu bei kapenai ekaꞌa teihana raninai tetaꞌu kiꞌa,
mai taꞌukia teio tetibaha,
“ꞌEi,
biriua.”
27 Iesu beronai mo ehina benakia etibaha,
“Tomobakiro,
ṉa au,
aꞌi katotaꞌu.”
28 Ba Petero etae eꞌabi etibaha,
“Obiapaka e,
oi tohamu raninai moꞌabi,
bei kapenai mawahi heremu.”
29 Iesu eꞌabi etibaha,
“ꞌOmai.”
Weiana Petero ahiai eriri bei kapenai ekaꞌa ha ha Iesu herena eao.
30 ꞌA roio rarina eihana raninai etaꞌu,
beiai nepurupuru aonai eio etibaha,
“Obiapaka e,
mobamaurinaꞌu!”
31 Beronaimo Iesu imana etiu ahina Petero eaꞌina ehinabena etibaha,
“Emu aꞌikakauma eꞌaera haumu,
taba buonai aomu ekaiꞌau kaiꞌau?”
32 Ba terarua ahi ahanai teheꞌau hanona baura eꞌoko.
33 Iꞌabana haukia weia ahi aonai haukia Iesu tekutiaina teꞌabi tetibaha,
“ꞌAbi tohana oi hanona Tirama Nahuna.”
Iesu Genesaretai Inawa Haukia Ebamaurinakia.
34 Obu tebeau banai temai Genesareta hanonai tekaraꞌau.
35 ꞌEka weiana haukia Iesu teiha ꞌiobi aina hanona ꞌabi teuhuna eao aiara weiakia herekiai haukia herekia,
ba maearima weiakia ekia inawa haukia ikoikiai temai ainakia herena.
36 Maearima Iesu tenoina inawa haukia ena habuni puana mo pateaꞌi ꞌapuana.
Ba teaꞌi ꞌapuana haukia ikoikiai hanona tenamo.
Jesus Walks on Water (Mataio 14:22-36)