Maearima Ekia Rauhubukia Mo Tibaꞌiobinakia.
15
Rani weianai Parisea haukia mai rauhubu poki haukia baika Ierusalemai temai Iesu herena tebakaina tetibaha,
2 “Aehoma buonai iꞌabamu haukia ꞌaiꞌai ekia hoahoa tikabenakia?
Imakia aꞌi ṯeutu ꞌuai,
ia tianiani mo.”
3 Iesu ekia ꞌabi ebamuena etibaha,
“Aehoma buonai wai Tirama ena rauhubu ꞌabina tukabena,
ia emi ꞌaiꞌai ekia hoahoa tuaꞌi taeanakia?
4 Pokina Tirama eꞌabi etibaha,
‘Hamamu mai hinamu komariki ainakia,’
abomo ‘Hau ha hamana ꞌao hinana keururu aina hauna hanona kateahu ꞌarina.’
5 Ia wai hanona emi baꞌiobiai tuꞌabi ṯotibaha,
‘Hau ha hamana ꞌao hinana kehina benakia ketibaha,
“Kepu neiakiai pabarainimi haukia hanona kabaibeni Tirama ꞌeuna.”
6 Ba hau weiana hanona hamana mai hinana kohu weianai aꞌi kemariki ainakia.’
Taeara ṉahomanai wai Tirama ena ꞌabi taba ahaꞌiai tubaona,
ia ꞌaiꞌai ekia hoahoa mo tuaꞌi taeanakia.
7 Bahaorea haumi e,
Isaia emahabanai harai wai ahamiai eꞌabi etibaha,
8 “Maearima neiakia hanona pinakia
kapenai mo ataꞌu tibanamona,
ꞌa aokia hanona atauꞌa ꞌakinai.
9 Ṯekutiai ꞌabaeanaꞌu,
pokina tibaꞌiobi rauhubukia
hanona maearima ekia rauhubu
ꞌabikia mo.” Isa 29.13
ꞌAbi Maearima Nibaꞌopuna.
10 Iesu mako eaparinakia teao herena,
ehinabenakia etibaha,
“Katobahu abomo obona katobo.
11 Taba pinai nitoto niao aoai hauna hanona Tirama wairanai maearima aꞌi niba ꞌopuna,
ia taba pinai nikarahi hauna maearima nibaꞌopuna.”
12 Ba iꞌabana haukia temai herena tebakaina tetibaha,
“Parisea haukia aiamu teona raninai aokia teopuere hanona oꞌiobina?”
13 Ekia ꞌabi ebamuena etibaha,
“Matiu ikoikiai Hamaꞌu kupai nemiaho hauna aꞌi ebatonakia haukia mai ramukia kepuhu ꞌaunakia.
14 Tomohabonakia.
Ia mahakia tekiꞌa ba maha kiꞌa haukia ṯeꞌuai ainakia.
Maha kiꞌa hauna ha kehore maha kiꞌa hauna ha kebakaꞌana raninai terarua ꞌuriai katetoa.”
15 Ba Petero eꞌabi etibaha,
“ꞌAbi ibabatai neiana anina mohina hina haraina heremaiai.”
16 Iesu ia ehina benakia etibaha,
“Wai abomimo obo aꞌi tuobo oho mo?
17 Taba ikoikiai pinai titoto tiao moꞌoru haukia haeamona moꞌoruai tikarahi timai atapakai hanona aꞌi ṯoꞌiobina?
18 ꞌA taba pinai tikarahi haukia hanona aoai timai tikarahi,
ba weiakia haukia tihore maearima tibaꞌopuna.
19 Weiana aoai nikarahi hauna hanona raona kiꞌa obokia maearima niao ainakia kateahuahu,
katenabau,
katemaha porepore,
katebainao,
katebaiꞌoi mai kateꞌuahi ꞌuahi.
20 Hoahoa weiakia haukia maearima tibaꞌopuna Tirama wairanai,
ia imaka aꞌi nahautu nahaniani hauna maearima aꞌi nibaꞌopuna.”
Kanana Babiꞌena Ena Aꞌikakauma.
21 Iesu ꞌeka weiana ehabona Turo mai Sidono hanokia eao.
22 ꞌEka weianai Kanana babiꞌena ha emai herena ba eapari etibaha,
“Obiapaka Davida Nahuna e,
moaokoꞌo ainaꞌu,
auba kiꞌa obona nahuꞌu uahouahona aonai nibahaiara kiꞌa bahana.”
23 ꞌA Iesu babiꞌe ena ꞌabi aꞌi ebamuena,
ba iꞌabana haukia Iesu tenoi hao noi haona tetibaha,
“Mouhuna mekatuꞌa,
pokina ia murikai nimai niapari toꞌona.”
24 Iesu eꞌabi etibaha,
“Tirama au euhunaꞌu hanona Isaraela mamoekia teꞌakauma haukia mo paukiai.”
25 Babiꞌe emai Iesu wairanai ekai pehu,
eꞌabi etibaha,
“Obiapaka e,
mobarainaꞌu.”
26 Iesu babiꞌe ena ꞌabi ebamuena etibaha,
“Miori ekia aniani kahaneꞌena waeha kateani hanona aꞌi enamo.”
27 Babiꞌe etibaha,
“ꞌAbi tohana,
ia mo obia hauna ena itara ai,
aniani ꞌikaꞌikakia tiꞌeho baꞌai hanona waeha abomo tiani.”
28 Ba Iesu ia ehinabena etibaha.
“Babiꞌe e,
emu aꞌikakauma hanona eapaꞌua,
emu nuatae tabana hanona kerama.”
Beraura hoana ihobonai nahuna uahouahona emauri mauri.
Iesu Inawa Haeai Haeai Ebamaurinakia.
29 Iesu ꞌeka weiana ehabona,
Galilea obu poena ekana eao,
ba oeoai ekaraꞌau emiati.
30 Mako rarina temai herena,
temaiainakia haukia hanona ꞌome,
maha kiꞌa,
ima kobekobe,
maeakia tekiꞌa,
abomo inawa haukia haeaihaeai Iesu herenai tehorotinakia,
ba ia ehore eba maurinakia.
31 Maeakia tekiꞌa haukia teꞌabi ꞌabi,
ima kobekobe haukia imakia tebero,
ꞌome haukia tekaꞌa,
mahakia tekiꞌa haukia teihaiha.
Maearima hoa neiakia teihanakia raninai tetaꞌu taꞌu huri,
weianai Isaraela ena Tirama tebanamona.
Iesu Maearima Taha Bani Ebanianinakia.
32 Rani weianai Iesu iꞌabana haukia eaparinakia temai herena,
ehina benakia etibaha,
“Au maearima neiakia ṉaokoꞌo ainakia,
pokina ia hanona aba wapu aihau au hereꞌuai ṯemiaho taba ha aꞌi tiana,
mai mareꞌakia kauhunakia katekaꞌa hanona aꞌi nanuatae,
pokina ha taearai mareꞌa aꞌi mebaꞌehona.”
33 Iꞌabana haukia teꞌabi tetibaha,
“Neiana hanona hano ꞌabaeana,
aniani aeꞌeai kataꞌinakia mako nahomana katabanianina?”
34 Iesu ebakainakia etibaha,
“Aniani heremiai bita?”
Ia teꞌabi tetibaha,
“Parawa ꞌabaihau hamomo mai maia papakia bita ꞌaki mo.”
35 Iesu ehore toꞌu haukia ehina benakia ꞌanoai katemiati.
36 Ba parawa ꞌabaihau hamomo mai maia eaꞌinakia Tirama ebanamona,
epua ehobi ꞌiti ꞌitinakia,
iꞌabana haukia ebenakia ba iꞌabana haukia maearima tebenakia.
37 Maearima ikoikiai teanaiani teaniꞌari,
iꞌabana haukia aniani harikia areha ꞌabaihau hamomo tebabonunakia.
38 Weia teaniani haukia tetuabinakia hanona 4,000,
ꞌa babiꞌe mai miori hanona aꞌi tetuabinakia.
39 Iesu toꞌu haukia euhunakia tekaꞌa murinai ahiai eheꞌau ebeau banai Magadan hanona eao.