Iesu Taha Bani (4,000) Ebanianinakia.
8
Rani weianai maearima boꞌona haeamona teao Iesu herenai tetoꞌu mue.
Ia aniani ahaꞌi buonai,
Iesu iꞌabana haukia eaparinakia temai herenai ehina benakia etibaha,
Mareko 8.1-26
2 “Maearima neiakia hanona naokoꞌo ainakia,
pokina wapu aba aihau hereꞌuai ṯemiaho ekia aniani hanona aba eore.
3 Mai mareꞌakia kauhunakia taearai hanona baika aꞌi temeꞌeho,
pokina baika hanona ꞌeka homaꞌanai temai.”
4 Iꞌabana haukia tehina bena tetibaha,
“Aika hanona hanoꞌakunai.
Aniani aeꞌe ai kahaꞌina,
maearima neiakia kahabani aninakia?”
5 Iesu ehore ebakainakia etibaha,
“Emi aniani ikoinai bita?”
Ia tetibaha,
“Parawa ꞌabaihau hamomo.”
6 Iesu maearima ehina benakia ꞌanoai katemiati.
Ba parawa weiakia ꞌabaihau hamomo eaꞌi taeanakia namo ꞌabina Tirama ebena,
ba ehobi ꞌitiꞌitinakia iꞌabana haukia ebenakia katewatena,
maearima katebenakia.
Eꞌabi ihobona tebabaina.
7 Ekia maia papakia abomo weia,
ebanamonakia,
ba iꞌabana haukia ebenakia katewatenakia.
8 Ikoikiai teaniani,
teani ꞌari.
Iꞌabana haukia aniani harikia tebararonakia hanona areha ꞌabaihau hamomo.
9 Haukia hanona ikoinai taha bani (4,000) ꞌabana.
Ba euhunakia haha ekia ꞌeka teao.
10 Haeamona iꞌabana haukia kipokia ahiai teheꞌau teao Dalmanuta hanona.
Parisea Haukia Tenuatae Hoa Ha Kateihana.
11 Parisea haukia temai Iesu tebakaina katehobona,
hoa ha kebabaina kateihana,
katebatohana ena hiabu hanona Tirama herenai emai.
12 Iesu aona ebahi mai aohaiarana,
eꞌabi etibaha,
“Taba buonai uru neiana haumi hoa tutabuna?
ꞌAbi tohana mo au wai nahina benimi,
uru neiana haumi hoa ha aꞌi kabaihanimi.”
13 Weiana ia ehabonakia ahiai eheꞌau mue ekabanai ꞌobu abirana eao.
Parisea Haukia Mai Heroda Ekia Bakupu Muramurana.
14 Iꞌabana haukia parawa ikoinai tereanakia,
parawa hamona mo ahiai emiaho.
15 Iesu ia erobenakia etibaha,
“Mahami katobanoꞌanakia,
Parisea haukia mai Heroda ekia bakupu mai ekia aoani hoahoakia aꞌi tomobabai marikina.”
16 Iꞌabana haukia kipokia baiatakiai teꞌabiꞌabi tetibaha,
“Aniani ha aꞌi hamaiaina buonai ṉa niꞌabi aiho.”
17 Iesu eꞌiobina taba ṯeꞌuahina,
ebatanakia etibaha,
“Taba buonai aniani heremi ahaꞌi hauna robana tuahuna?
Wai aꞌi ṯoꞌiobi bahana abomo obonai aꞌi tuobo?
Aomi hama ua tepahihi aiho?
18 Mai mahami,
ia aꞌi ṯoihana?
Mai haiami,
ia aiana aꞌi tuona?
Taba aꞌi turaona ꞌini?
19 Au parawa ima ahobi ꞌitiꞌitinakia maearima taha ima (5,000) teani ꞌari,
harikia areha bita tobabonunakia?”
Ia teꞌabi tetibaha,
“Areha harau haea rua.”
20 Ia eꞌabi etibaha,
“Abomo parawa ꞌabaihau hamomo ahobi ꞌitiꞌitinakia maearima taha bani (4,000) teani ꞌari,
harikia areha bita tobabonunakia?”
Ia teꞌabi tetibaha,
“Areha ꞌabaihau hamomo.”
21 Ia ehina benakia etibaha,
“Wai aehoma buonai aomi aꞌi niea?”
Iesu Bedesaidai Maha Kiꞌa Hauna Mahana Ebanamonakia.
22 Temai Betesaida aiaranai tekaraꞌau raninai,
maearima baika maha kiꞌa hauna ha tebakaꞌana temai Iesu herena tenoina ahanai kehaoꞌau mahana kebanamonakia.
23 Iesu maha kiꞌa hauna imanai eꞌebe tekarahi aiara murinai,
imana eꞌatotina ia mahana etaronakia epua imana ia mahana ahanai ehaoꞌau ba ebakaina etibaha,
“Taba aba noiha?”
24 Maha kiꞌa hauna eaꞌa taea,
eꞌabi etibaha,
“Maearima naihanakia tikaoao kaoao matoha matiu ꞌabakia.”
25 Haeamona mahanai ehaoꞌau mue,
weiana eihao ihao aonai ena ihaiha abenamo,
taba ikoinai aba eiha harainakia.
26 Euhuna keao ena itu,
ia ehina bena etibaha,
“Aiara aonai aꞌi kokatoto.”
Petero Iesu Ehina Pouna Keriso.
27 Iesu iꞌabana haukia kipokia Kaisarea Pilipo aiarakia teao,
taearai iꞌabana haukia ebakainakia etibaha,
“Maearima hanona taba ṉa tihoma,
au hanona tai?”
Mareko 8.27-38
28 Ena ꞌabi tebamuena tetibaha,
“Baika tiꞌabi ṯetibaha,
oi hanona Baꞌuere robe hauna Ioane,
ꞌa baika ṯetibaha,
oi hanona Elia,
haeamona baika ṯetibaha,
oi hanona mahabanai hauna ha.”
29 Haeamona ia ebakainakia etibaha,
“Ia wai hanona taba ṉa tuhoma,
au tai?”
Petero ia ehina bena etibaha,
“Oi hanona Keriso,a
Tirama ena aꞌi taea haumu.”
30 Iesu eharabunakia ia pouna hau ha aꞌi katebaꞌiobina.
Iesu Kehaiara Mai Keꞌari ꞌAbikia Ehina.
31 Ia iꞌabana haukia ebaꞌiobi ramanakia,
Maearima Nahuna hanona haiara boꞌokia kehoainakia,
aiara poki haukia,
robe haukia apaꞌuakia,
mai rauhubu poki haukia kateꞌoatana abomo kateahu ꞌarina,
ia wapu ibaihaunai hanona kemikiri mue.
32 ꞌAbi neiana ehina pou haraina raninai,
Petero ehore Iesu eba kaparena haiahaiai ehinabe pahihina.
33 ꞌA Iesu hanona ekori kabe,
iꞌabana haukia eihanakia,
Petero ebatana etibaha,
“Satani,
Mokapare,
muriꞌu moao!
Pokina emu raona hanona Tirama ꞌeuna ahaꞌi,
ia maearima ꞌeukia.”
34 Weiana Iesu mako eaparinakia abomo iꞌabana haukia kipokia ehina benakia etibaha,
“Hau ha kenuatae au keꞌabanaꞌu raninai,
ia kipona ena mauri kehabona,
ena matiu ibiri ropo keaꞌi taeana kebuana,
au muriꞌu ai kekaꞌa.
35 Pokina ena mauri keaꞌi ꞌinina hauna ena mauri keba ꞌakaumana,
ꞌa au pauꞌuai mai pou namona paunai ena mauri keneꞌena hauna hanona ena mauri keaꞌina.
36 Hau ha hanopaka maikoinai peaꞌina ia ena mauri pebaꞌakaumana hanona ꞌeunai ena namo taba?
37 Hau ha taba kebaibeni ena mauri keaꞌi muena?
38 Hau ha au pauꞌuai ꞌao eꞌu ꞌabi paukiai nabau abomo aka kiꞌa uruna neiana wairakiai kehaumaea ainaꞌu hauna,
au Maearima Nahuna abomo ia kahaumaea aina Hamaꞌu ena nuabiai ena aneru robekia kipokia katemai raninai.”