Parisea Haukia Tenuatae Hoa Ha Kateihana.
16
Parisea haukia mai Sadukea haukia temai Iesu herena tehobona,
tenoina hoa ha keba ihanakia katebatohana ia hanona kupai emai.
2 Iesu ehinabenakia etibaha,
“Rabirabi beraura kaihu niaoaina raninai,
tuꞌabi ṯotibaha,
‘Mara rani kenamo pokina kupa nipairu.’
3 Kerani raurani tuꞌabi ṯotibaha,
‘Bariu rani neianai abara mai baura katemai pokina kupa nipairu auhao ekaiabu haraina.’
Toꞌiobina kupai hoa tabakia katerama,
ia aehoma buonai rani neianai hoa tabana kerama hauna aꞌi toꞌiobina?
4 Aꞌikakauma ahaꞌi mai aka kiꞌa uruna haumi,
hoa tutabu,
ia hoa ha aꞌi kabenimi,
mahabanai hauna Iona ena hoa mo kabaihanimi.”
Ba Iesu ehabonakia herekiai ekaobo.
Parisea Ekia Bakupu Muramurana.
5 Weiana iꞌabana haukia tekabanai obu abiranai raninai parawa tereanakia aꞌi teaꞌi.
6 Ba Iesu ehina benakia etibaha,
“Mahami katoba noꞌa,
Parisea haukia mai Sadukea haukia ekia bakupu muramurana herenai katoꞌima ꞌima harainimi.”
7 Iꞌabana haukia kipokia teꞌabiꞌabi tetibaha,
“ꞌAbi neiana nehinana pokina parawa ha aꞌi hamaiaina.”
8 Iesu ekia raona eꞌiobina ba ehina benakia etibaha,
“Aꞌikakauma papana haumi e,
aehoma buonai kipomi parawa ha aꞌi toaꞌina hauna paunai tuꞌabiꞌabi?
9 Aomi aꞌi niea baha parawa ima ꞌaki maearima taha ima (5,000) teaniꞌari mai harikia areha bita tobabonu hauna aꞌi turaona ꞌinina?
10 Abomo parawa ꞌabaihau hamomoaimo maearima taha bani (4,000) teaniꞌari,
harikia areha bita tobabonu haukia aꞌi toraonaꞌini?
11 Aehoma buonai aomi aꞌi niea?
Au hanona parawa robana aꞌi nahuna,
ia Parisea haukia mai Sadukea haukia ekia bakupu muramurana herenai katoꞌimaꞌima harainimi.”
12 ꞌAbi weianai aokia ea,
teꞌiobina ia hanona parawa ibakupuna muramurana robana aꞌi niahuna ꞌa ia hanona Parisea haukia mai Sadukea haukia ekia baꞌiobi ꞌabikia herekiai kateꞌimaꞌima harainakia.
Petero Iesu Ehina Pouna Keriso.
13 Iesu Kaisarea Pilipo hanokiai ekaraꞌau aonai,
iꞌabana haukia ebakainakia etibaha,
“Maearima taba ṉa tihoma,
au maearima nahuna hanona tai?”
14 Ena ꞌabi tebamuena tetibaha,
“Baika tiꞌabi Ioane baꞌuere robe hauna,
baika tiꞌabi Elia,
haeamona baika tiꞌabi Ieremia ꞌao mahabanai hauna ha.”
15 Iesu haeamona ebakai muenakia etibaha,
“Ia wai taba ṉa tuhoma,
au hanona tai?”
16 Simona Petero eꞌabi etibaha,
“Oi hanona Keriso,
mauri Tiramana Nahuna.”
17 Iesu eꞌabi etibaha,
“Simona Iona nahuna e,
Tirama ebanamoniꞌo,
pokina maearima ha ꞌabi neiana oi aꞌi ebaꞌiobiniꞌo ꞌa Hamaꞌu kupai nemiaho hauna ebaꞌiobiniꞌo.
18 Nahina beniꞌo,
oi hanona Petero,
wairo neiana ahanai eꞌu marea kabakorina,
ꞌari ena hiabu eꞌu marea neiana aꞌi keba ibiuna.
19 Au kahore Tirama ena obia aiarana ikaikauna hiabuna kabeniꞌo,
ba hanopaka ai kobirinakia haukia abomo kupa ai kebirinakia,
hanopaka ai korubunakia haukia abomo kupa ai kerubunakia.”
20 Ba Iesu iꞌabana haukia eharabunakia,
hau ha haianai aꞌi kateꞌabi ia hanona Keriso.
Iesu Kehaiara Mai Keꞌari ꞌAbikia Ehinana.
21 Rani weianai Iesu iꞌabana haukia ebaꞌiobi ramanakia ia hanona keao toha Ierusalema ai weia Iuda ekia maearima apaꞌuakia,
robe haukia apaꞌuakia mai rauhubu poki haukia hauna katebahaiara kiꞌana ba kateahu ꞌarina,
ia wapu ibaihaunai Tirama kehore ia kebamikiri muena.
22 Petero ehore Iesu ebakapare haiahaiai ehinabe pahihina etibaha,
“Obiapaka e,
ua aꞌi kehoma,
oi hanona ua aꞌi katehomaniꞌo.”
23 Iesu ekori kabe Petero erikena etibaha,
“Satani e,
hereꞌuai mokatua,
oi au eꞌu taeara nukaiabuna,
pokina emu raona raona hanona Tirama ꞌeunai ahaꞌi ia maearima ꞌeukiai emai.”
24 Ba Iesu iꞌabana haukia ehinabenakia etibaha,
“Hau ha kenuatae au muriꞌuai kekaꞌa raninai ia kipona ena mauri kehabona,
ena matiu ibiri ropo kebuana au muriꞌuai kekaꞌa.
25 Hau ha kipona ena mauri nenuatae ai kiꞌana hauna hanona kebaꞌakaumana,
ia hau ha au pauꞌuai kipona ena mauri kehabona hauna hanona keaꞌi muena.
26 Hau ha hanopaka maikoina iaꞌinai ena mauri kebaꞌakaumana hanona ena namo taba?
ꞌAo hau ha ena mauri tabai kekawa muena?
27 Au Maearima Nahuna hanona Hamaꞌu nuabinai kamai eꞌu aneru kipokia,
rani weianai maearima ha ha ekia aka ihobokiai ꞌarakia kabenakia.
28 ꞌAbi tohana au wai nahinabenimi,
baika neia tikoroti haukia aꞌi kateꞌari baha keaomo Au Maearima Nahuna kupa aiarana obia hiabunai kamai maearima baiatakiai hanona kateihanaꞌu.”