Pou namona neiana Mareko ererena, ena ꞌabi koriꞌuaikia aokia ṉa eꞌabi aiho, “Iesu Keriso Tirama Nahuna Pouna Namona.” Puka neiana aonai hanona kahaꞌiobina Iesu hanona mai ena hiabu taba ikoikiai kebabainakia. Maearima nibamarerenakia ranikiai, auba kiꞌa obokia neuꞌu ahinakia ranikiai, mai maearima ekia kiꞌa nehina haonakia ranikiai ena hiabu hanona kahaihana. Iesu kipona eaparina Maearima Nahuna, ia emai kipona kebaibeni aina maearima ikoikiai kekawa muenakia kiꞌa herenai katerubu ꞌabaea paunai.

Mareko kipona ena nuatae ꞌabina hanona boꞌona aꞌi nehinana, ia beronai Iesu ena aka pouna nehinana. Koriꞌuaina Mareko ehore Ioane baꞌuere robe hauna robana eahuna, mai Iesu aea eꞌuere robe aiho mai Satani ia ehobona hauna robaha eahuna. Ba Iesu ehore maearima weiakia puma boꞌona tebuanakia haukia eaokoꞌo ainakia, ba ebamaurinakia mai ebamarere harainakia. Popounai hanona murinai tiꞌau haukia Iesu taba nibabai obokia aꞌi teobo, iamo mai ꞌaiaunukia ia kipokia tekaoao haeamo eaomo teꞌiobi haraina. Weiakia ia tiꞌoatana haukia ekia opuere hanona eao eapaꞌua hao apaꞌua hao. Puka neiana puanai hanona Iesu ena ꞌari mai ena mikiri mue robakia eahuna.