Pou Namona
MAREKO
Ererena Hauna
Baꞌuere Robe Hauna Ioane Eiroro.
1
Tirama Nahuna Iesu Keriso pouna namona kori ꞌuaina hanona neiana.
Mareko 1.1-13
“Tirama eꞌabi,
‘Eꞌu iuhubeau hauna ṉauhu ꞌuaina
kewahi heremu,
emu taeara keaꞌiaꞌi haraina.’ Mal 3.1
3 Aia ha hanoꞌakunai neio netibaha,
‘Obiapaka ena taeara
tomobaꞌoruna.
Ena kaoao boana
tomobaberona.’” Isa 40.3
4 Ua buonai Baꞌuere robe hauna Ioane hanoꞌakunai ewaira tina,
ebaꞌuere robe mai eiroro etibaha,
“Emi kiꞌai tomoraona kabe,
katoꞌuere robe,
Tirama emi kiꞌa kehina haonakia.”
5 Maearima boꞌona Iudea hanonai mai Ierusalema haukia ikoikiai teao Ioane Baꞌuere robe hauna aiana teona,
ekia kiꞌa tehina pou,
abomo Ioridana atenai ebaꞌuere robenakia.
6 Ioane habuni ebatotona hauna hanona Kamela buirana.
Huana ꞌapana hanona Poromakau paruana,
ena aniani hanona pekaupekau mai hoho beina.
7 Ṉa eiroro aiho maearima wairakiai.
“Hau ha au muriꞌuai kemai hauna eapaꞌua kiꞌa baha ba au.
Au hanona aꞌi anamo kakuti,
ena tamaka warona irubunai abomo aꞌi etainaꞌu.
8 Au wai beiai nabaꞌuere robenimi,
ꞌa ia hanona Auba Robeai kebaꞌuere robenimi.”
Iesu Eꞌuere Robe Mai Satani Ehobona.
9 Rani weianai Iesu Nasareta Galileai emai.
Ioane ehore ebaꞌuere robena Ioridana atenai.
10 Iesu beiai ekaraꞌau raninai,
kupa epaꞌa eihana Auba Robe eriri ia ahanai ihana matoha rauria.
11 Abomo aia ha kupai emai etibaha,
“Oi hanona Au Nahaꞌu,
eꞌu raonaꞌau.
Au oi naonamoai kiꞌa bahaniꞌo.”
12 Rani aꞌi ehomaꞌa murinai Auba Robe Iesu eaoaina hanoꞌakunai.
13 Iesu weia emiaho wapu bariabui,
Satani ia ehobona,
ꞌaki tabakia kipokia temiaho,
ba aneru temai tebaraina.
Iesu Baꞌeha Haukia Bani Eaparinakia.
14 Ioane Baꞌuere robe hauna wapura itunai tekaiabuna murinai,
Iesu hanona eao Galilea ai Tirama ena pou namona eiroro aina.
Mareko 1.14-45
15 Etibaha,
“ꞌAbiꞌuai ranina tohana abekaraꞌau,
Tirama ena obia aiarana aba ekaibari,
emi kiꞌai tomoraona kabe,
Pou Namona tomo aꞌikakaumana.”
16 Iesu hanona Galilea ꞌobu poena ꞌekana eao raninai,
Simona mai hatina Anderea ohi eihanakia,
reꞌe ꞌobuai tehorena,
pokina terarua hanona baꞌeha haukia.
17 Iesu ehina benakia etibaha,
“Muriꞌuai tomai,
au kahore wai maearima ibaꞌehakia kaba ꞌiobinimi.”
18 Beronai mo ekia reꞌe tehabonakia murinai teao.
19 Ia ekataeana eao Sebedeo nahuna Iakobo mai hatina Ioane ohi eihanakia ahiai ekia reꞌe tiaꞌiaꞌi harainakia.
20 Ba Iesu beronai terarua eaparinakia,
hamakia Sebedeo mai tebaꞌeha oioi miorikia ahiai tehabonakia murinai teao.
Iesu Hau Ha Aonai Auba Kiꞌa Obona Euꞌu Ahina.
21 Iesu mai iꞌabana haukia kipokia teao Kaperanauma aiaranai.
Beraura Robeai Iesu hanona Iuda haukia ekia marea aonai ekatoto ena baꞌiobi eaꞌi ramana.
22 Maearima weiakia ena baꞌiobi ꞌurukia teoꞌo raninai tetaꞌu taꞌu huri,
pokina ena baꞌiobi hanona mai hiabukia,
rauhubu poki haukia ꞌabakia ahaꞌi.
23 Weia hanona hau ha aonai auba kiꞌa obona etoto hauna marea aonai eio etibaha,
24 “Iesu Nasareta haumu e!
Taba heremaiai kobabaina,
Oi ai koaꞌi kiꞌanamai paunai omai,
u?
Au oi aꞌiobiniꞌo,
oi hanona Robe haumu Tirama eaꞌi taeaniꞌo.”
25 Iesu auba kiꞌa obona ehina bena etibaha,
“Mounu hau naiana aonai mokarahi.”
26 Auba kiꞌa obona hau weiana ebaꞌururu kiꞌana,
mai ioiona hau weiana aonai ekarahi.
27 Maearima weia ikoikiai tetaꞌu taꞌu huri,
ha ha kipokia tebakai bakai,
tetibaha,
“Neiana taba?
Baꞌiobi mo mahamahana ha mai hiabuna.
Auba kiꞌa obokia nehina benakia hanona aiana tiona.”
28 Ua buonai Iesu pouna Galilea hanona maikoinai tehina otaraina.
Iesu Maearima Boꞌona Ebanamonakia.
29 Iesu iꞌabana haukia Ioane mai Iakobo kipokia marea tehabona berokiai teao Simona mai Anderea ekia ituai.
30 Simona rawana babiꞌena einawa,
hauna ehiabu ena ituai enoti.
Iesu emai raninai,
haianai ena inawa pouna tehinana.
31 Iesu eao ia herena,
imanai eaꞌi ebaraina eberi korina.
Ena hau hiabu eore,
babiꞌe emikiri ekia aniani ebabai.
32 Beraura ekaihuna rabirabinai inawa haukia mai maearima aokiai auba kiꞌa obokia ṯemiaho haukia teaoainakia Iesu herena.
33 Aiara maearimakia ikoikiai temai itu weiana wairanai tetoꞌu.
34 Inawa haeai haeai haukia boꞌokia Iesu ebanamonakia,
haeamona auba kiꞌa obokia boꞌona euꞌu ahinakia,
ꞌa auba kiꞌa obokia hanona Iesu teꞌiobina buonai ekaiabunakia aꞌi kateꞌabi.
Iesu Galileai Eiroro.
35 Raurani wapuranai,
aꞌi nirani baha aonai Iesu emikiri itu ehabona,
eao ꞌeka ꞌabaeanai ha,
uaꞌa ebahubaꞌari.
36 Ba Simona ꞌabana kipokia tekarahi itabuna teao.
37 Weia tetabu ahina ba tehina bena tetibaha,
“Maearima ikoinai hanona oi titabuniꞌo.”
38 Ia Iesu ekia ꞌabi ebamuena etibaha,
“Aika hamaeao aiara herekai haukia,
aokiai abomo kairoro,
aka weiana hauna paunai amai.”
39 Iesu hanona Galilea aona maikoina ekana,
Iuda haukia ekia marea aokiai eiroro mai auba kiꞌa obokia maearima aokiai haukia euꞌu uꞌu ahinakia.
Iesu Morumoru Hauna Ebanamona.
40 Morumoru hauna ha emai Iesu wairanai ekai pehu,
enoina etibaha,
“Ponuatae raninai,
pobamaurinaꞌu.”
41 Iesu ehore eaokoꞌo aina,
abomo etara eaꞌi ꞌapuana,
ehina bena etibaha,
“ꞌE.
Au nanuatae konamo.
Haumu menamo!”
42 Rani hamona morumoru hanona hau weiana ehabona,
hauna enamo.
43 Iesu hau weiana euhuna aonai eharabuna etibaha,
44 “Aiaꞌu nona,
hau ha haianai aꞌi koꞌabi ꞌapua.
Beronai koao,
Robe hauna herena,
haumu keihana.
Mose ena rauhubu ihobona,
onamo hanona beruberuna Tirama herenai kobaibeni,
oi emu namo ibatohana.”
45 ꞌA hau weiana eao ꞌeka ikoinai ena namo pouna ekikipa otaraina.
Ena kikipa weiana buonai Iesu hanona aiara aokiai aꞌi ekatoto.
ꞌA ꞌeka ꞌabaeakiai mo emiaho,
ꞌeka haeai haeai maearimakia hanona teao herena.