Iesu Iꞌabana Haukia Bani Eaparinakia.
5
Rani ha Iesu Genesareta obu haianai ekoroti hanona mako tekori kakaiarona Tirama ena ꞌabi aiana kateona.
2 Ia ahi rua obu haianai tetaiꞌau eihanakia,
baꞌeha haukia tehabonakia poeai ekia reꞌe teutunakia.
Luka 5:1-39
3 Iesu Simona ena ahiai eheꞌau,
ehina bena papana kekai ahi ꞌapuana,
ia ahi ai emiati ba mako ebaꞌiobinakia.
4 Iesu ena ꞌabi eore murinai ia Simona ehina bena,
“ꞌOura hamaeao,
reꞌe kohorenakia maia kobarewa.”
5 Simona ena ꞌabi ebamuena etibaha,
“Poki haumu e,
ai rabi maikoina taro ꞌari rani taba ha aꞌi taꞌina,
ꞌa emu ꞌabi paunai reꞌe kabaririnakia.”
6 Weiana tebabaina hanona maia boꞌona ꞌakina tebarewanakia,
ekia reꞌe herekai mo patetapa.
7 ꞌAbakia baika ahi ha ai haukia tebakonakia katemai katebarainakia,
ba temai ahikia rua tebabonunakia herekai mo pateuhu.
8 Simona Petero hoa weiana eihana raninai Iesu aena pokinai ekai pehu eꞌabi etibaha,
“Obiapaka e,
au hanona kiꞌa hauꞌu,
hereꞌu ai aꞌi komiaho.”
9 Ia mai ꞌabana kipokia tetaꞌu taꞌu huri pokina maia uahomana boꞌona ꞌakina tebarewanakia buonai,
10 Simona kipokia tebaꞌeha oioi haukia Sebedeo nahuna Iakobo mai Ioane abokiamo tetaꞌu taꞌu huri.
ꞌA Iesu Simona ehina bena etibaha,
“Aꞌi kotaꞌu.
Bariu keaomo waira ranikiai oi hanona maearima kobaꞌeha benakia.”
11 Ekia ahi teberi ꞌaunakia poeai,
taba ikoinai tehabonakia Iesu murinai tekaꞌa.
Iesu Morumoru Hauna Ebanamona.
12 Iesu emiaho aiara ha aonai hau ha hauna maikoinai emorumoru,
ba Iesu eihana raninai eꞌeho aena pokinai eꞌumuti enoina eꞌabi etibaha,
“Obiapaka e,
ponuatae raninai pobanamonaꞌu.”
13 Iesu imana etiu ahina eaꞌi ꞌapuana,
ehina bena etibaha,
“Nanuatae,
monamo.”
Beronai morumoru hau weiana ehabona.
14 Ia eharabuna etibaha,
“Hau ha haianai aꞌi koꞌabi,
ia koao robe hauna herenai keihaniꞌo,
mai banamo baibenina Mose eꞌabi ihobona tabana kobaibeni,
ba maearima katebatohana oi aba onamo.”
15 Ia pouna tehina otaraina mai toꞌu rarikia temai tebararona aiana kateona ekia inawa kebanamonakia.
16 ꞌA Iesu ekaobo hano ꞌabaeana ha eao ebahubaꞌari.
Iesu Mero Hauna Ebanamona.
17 Rani ha Iesu ebaꞌiobi aonai Parisea haukia mai rauhubu poki haukia baika weia temiati,
ia hanona Galilea aiara ikoikiai,
Iudea mai Ierusalema aokiai temai.
Obiapaka hiabuna hanona Iesu ahanai inawa haukia ebanamonakia.
18 Maearima baika mero hauna ha totoꞌeai tebuana teaoaina taearana tetabu katetoto aina Iesu wairanai katehorotina.
19 Katetoto aina aonai taeara ha aꞌi tetabu ahina pokina toꞌu rarina buonai,
ba tekaraꞌau aina teao itu kapenai,
kapehene teu kauna mai totoꞌena tebaririna Iesu wairanai mako baiatakiai.
20 Iesu ekia aꞌikakauma eihana raninai eꞌabi etibaha,
“Eꞌu hau e,
emu kiꞌa aba ihina hao.”
21 Rauhubu poki haukia mai Parisea haukia aokiai teraonaraona tetibaha,
“Neiana hanona hau tabana Tirama niaꞌi kiꞌana?
Tai kiꞌa kehina hao,
Tirama mo kipona.”
22 ꞌA Iesu ekia raona eꞌiobina paunai ehina benakia etibaha,
“Taba buonai raona nahomakia aomiai turaonanakia?
23 Aeana hauna eꞌamaꞌama kahaihana,
emu kiꞌa aba ihina hao ꞌao momikiri mokaꞌa.
24 Ia wai katoꞌiobina Maearima Nahuna hanopakai mai hiabuna kiꞌa kehina hao.”
Ia mero hauna ehina bena etibaha,
“Au oi nahina beniꞌo,
momikiri emu totoꞌe moaꞌina moao emu itu.”
25 Beronai mo wairakiai emikiri ena totoꞌe eaꞌi taeana eao ena itu Tirama ebanamona.
26 Ikoikiai tetaꞌu taꞌu huri mai Tirama tebanamona,
mai taꞌukia teꞌabi tetibaha,
“Bariu taba neiana haeai tohana haihana.”
Iesu Lebi Ena Aka ꞌEkanai Eaparina.
27 Weiana murinai Iesu ekarahi eao moni bararo hauna ha atana Lebi moni aꞌi ꞌekanai emiati eihana,
eaparina etibaha,
“Muriꞌuai omai.”
28 Lebi emikiri taba ikoikiai ehabonakia Iesu murinai ekaꞌa.
29 Lebi ena ituai Iesu keroꞌona anianina ha ebabaina,
weia moni aꞌi haukia boꞌokia mai maearima haeai baika kipokia temiati teaniani haeamo.
30 Parisea haukia mai rauhubu poki haukia tehore iꞌabana haukia herekiai teꞌabi hara tae tetibaha,
“Taba buonai moni aꞌi haukia mai kiꞌa haukia kipokia tuaniani mai ṯoinu inu haeamo?”
31 Iesu ekia ꞌabi ebamuena etibaha,
“Aꞌi ṯeinawa haukia hanona toketa hauna aꞌi titabuna,
ia inawa haukia mo toketa hauna titabuna.
32 Au amai hanona bero haukia aꞌi kaparinakia,
ia kiꞌa haukia kateraona kabe paunai amai.”
Ani Robe Bakai bakaina.
33 Ia Iesu tehina bena tetibaha,
“Ioane iꞌabana haukia rani boꞌokia tiani robe mai tibahubaꞌari,
Parisea iꞌabakia haukia abomo ihobona tibabaina,
ia oi iꞌabamu haukia tianiani mai ṯeinuinu.”
34 Iesu ehina benakia etibaha,
“Wai turaonana hawainibe mahamaha hauna ena baki haukia kipokia ṯemiaho oioi aonai kateani robe hanona ketaina, u?
35 ꞌA rani kemai aonai hawainibe mahamaha hauna herekiai kateaꞌi parena,
rani weiakiai ia hanona kateani robe.”
36 Ia ꞌabi ibabataiai ehina benakia,
“Hau ha habuni maha mahana puana aꞌi ketapa obona habuni ꞌaiꞌaina maranai aꞌi kehuri abuna pokina habuni mahamahana ketapa obona raninai habuni ꞌaiꞌaina mai habuni mahamahana ohi hanona ihakia aꞌi kateihobo.
37 Hau ha bine beina mahamahana aparu ꞌaiꞌainai aꞌi kebaharuna,
weiana kebabaina raninai bine beina mahamahana kekupu aparu ꞌaiꞌaina kebua paꞌana haeamona kekiki oioi mai ꞌaparu kekiꞌa.
38 ꞌA bine beina mahamahana hanona aparu mahamahanai kebaharuna,
ba terarua katenamo.
39 Hau ha bine beina ꞌaiꞌaina keinu murinai bine beina mahamahana aꞌi kenuatae aina pokina keꞌabi bine ꞌaiꞌaina hanona enamo.”