Satani Iesu Ehobona.
4
Iesu Ioridana atenai emue emai aona Auba Robe ai ebonu weiana Auba ehore ebakaꞌana hanoꞌakuna eaoaina,
2 wapu bariabui weia tiaporo ehore ehobona.
Rani weiakiai aniani ha aꞌi eani ꞌapuana,
puanai ia mareꞌa eꞌari.
3 Tiaporo ehore ia ehina bena etibaha,
“Peoi Tirama Nahuna raninai pihara neiakia pohina benakia pohamai pateao.”
4 Iesu ia ehina bena etibaha,
“Aba tererena,
‘maearima hanona pohamai mo aꞌi kemauri.’”
5 Tiaporo ehore Iesu ebakaraꞌauna eao hano oeonai rani papana hanopaka aiarakia ikoikiai ebaihana.
6 Tiaporo ia ehina bena etibaha,
“Au kahore hiabu mai nuabi neiakia maikoinai kabeniꞌo,
pokina ikoikiai au imaꞌu ai eutana,
haeamona tai nanuatae aina hauna kabena.
7 Weiana oi au kokuti ainaꞌu hanona ikoinai ꞌeumu.”
8 Iesu ena ꞌabi ebamuena etibaha,
“Aba tererena,
‘Obiapaka oi emu Tirama kokuti aina,
iamo kipona taꞌarana koaꞌi.’”
9 Haeamona ebakaꞌana eaoaina Ierusalema marea robe kaipanai ebakori ꞌauna,
ehina bena etibaha,
“Peoi Tirama Nahuna hanona neia kipomu morobo ahi.
10 Pokina aba tererena,
‘ia ena aneru kehina benakia
kateꞌimaniꞌo.
11 Abomo ia imakiai
kateaꞌi taeaniꞌo,
aemu piharai aꞌi mokaina taꞌuna.’” Sal 91.11, 12
12 Iesu ia ehina bena etibaha,
“Aba tererena,
‘Obiapaka emu Tirama baihobo ꞌekanai aꞌi kohorotina.’”
13 Tiaporo ena baihobo ikoinai ebaorenakia hanona ia herenai ekapare keaomo rani namona ha kemai.
Iesu Ena Aka Eaꞌiramana Galileai.
14 Iesu Auba Robe ena hiabuai emue eao Galilea weia pouna tehina otaraina hano weiana aiarakia ikoikiai aokiai.
Luka 4:14-44
Nasareta Haukia Iesu Tebakiꞌana.
16 Iesu ena apaꞌua aiarana Nasareta eao,
ena hoa hoa taina Beraura Robenai Iuda haukia ekia marea aonai etoto,
ekoroti Puka ketuabina.
17 Isaia Mahabanai hauna ena puka tebena,
weiana puka ekaikauna,
ṉa terere aihona ꞌekana etabu ahina etuabina etibaha,
18 “Obiapaka Aubana
hanona au ahaꞌuai,
pokina ebatohanaꞌu
pou namona kairoro aina
uraru haukia herekiai.
Euhunaꞌu kairoro
tebirinakia haukia irubukia
mai maha kiꞌa haukia kateiha mue,
atetua aonai ṯemiaho haukia
kabakarahinakia,
19 Obiapaka ena maearima
kebamaurinakia
ihauna aba etaina pouna
kairoro aina.” Isa 61.1, 2
20 Iesu puka ekaiabuna iꞌimana hauna ebena ba emiati,
marea aonai haukia ikoikiai mahakia ia teiha ꞌiniꞌinina.
21 Weiana ia ehinabe ramanakia etibaha,
“ꞌAbi tona Puka Robenai hauna bariu rani neianai aba etohana.”
22 ꞌAbi namokia pinanai ehinanakia paunai ikoikiai ia tebanamona haeamona tetaꞌu taꞌu huri tebakai bakai tetibaha,
“Neiana hanona Iosepa nahuna,
u?”
23 Iesu ia ehina benakia etibaha,
“ꞌAbi tohana wai ꞌabi ibabatai ha katohinana hereꞌu ai,
‘Toketa haumu e,
kipomu mobamauriniꞌo.’
abomo katohina benaꞌu katotibaha,
‘Taba taba weia Kaperanauma ai obabai urukia taoꞌo haukia,
neia emu aiara tohanai abomo kobabainakia.’”
24 Ia etibaha,
“ꞌAbi tohana au wai nahina benimi,
mahabanai hauna ena aiara tohanai hanona aꞌi kateaꞌi taeana.
25 ꞌAbi tohana au wai nahina benimi,
Elia ena raniai wapu babiꞌekia boꞌokia Isaraelai temiaho,
kupa ekaiabuna abara aꞌi etibo ihau aihau mai nawa ꞌabaihau arobo rarina ꞌakina erama hano maikoina.
26 Ba Elia aꞌi euhuna weiakia ha herena aꞌi eao,
ꞌa eao Sarepata aiarana Sidono hanonai wapu babiꞌena ha herena.
27 Abomo mahabanai hauna Elisa ia ena raniai Isaraela aonai weia hanona morumoru haukia boꞌokia,
ha ahaꞌi enamo,
ꞌa Suria hauna Namana ikupaiana mo enamo.”
28 Marea aonai maearima ikoikiai ꞌabi weiakia teoꞌo raninai teopuere wairai.
29 Temikiri aiarai tetori ahina tebakaꞌana teaoaina teaiara oeona ahanai papaꞌai katekapo ahina.
30 Ia hanona toꞌu baiatakia tohanai ekaobo.
Iesu Hau Ha Aonai Auba Kiꞌa Obona Euꞌu Ahina.
31 Eriri eao Galilea aiarana ha Kaperanauma Beraura Robeai maearima ebaꞌiobi ramanakia.
32 Ena baꞌiobi ꞌabikiai tetaꞌu taꞌu huri pokina ena ꞌabi hanona mai hiabuna.
33 Hau ha aonai auba kiꞌa obona etoto hauna weia marea aonai eio aota kiꞌa,
34 etibaha,
“ꞌAi,
Iesu Nasareta hauna e,
taba heremaiai kobabaina?
Omai hanona ai koahu ꞌarinamai?
Au aꞌiobina oi hanona Tirama ena Robe hauna.”
35 Iesu ia ebatana etibaha,
“ꞌUriꞌurimu.
Ia aonai mokarahi.”
Ikoikiai wairakiai auba kiꞌa obona hau weiana ebaꞌeho kiꞌana ba ekarahi,
aꞌi ebamaniꞌana.
36 Maearima ikoinai tetaꞌu taꞌu huri,
tebaihinabe aina tetibaha,
“Neiana hanona baꞌiobi tabana?
Mai hiabuna haeamona mai taburana auba kiꞌa obokia nehina benakia hanona tikarahi.”
37 Hano weiana maikoinai Iesu pouna tehina otaraina.
Iesu Simona Rawana Babiꞌena Ena Inawa Ebanamona.
38 Iesu marea ehabona eao Simona ena itu.
Simona rawana babiꞌena hau hiabu inawana eaꞌina,
Iesu tenoina kebaraina.
39 Weiana ia babiꞌe herenai ekoroti hau hiabu inawana erikena,
ba inawa epua,
beronai babiꞌe emikiri taꞌarakia eaꞌi.
Iesu Inawa Haeai Haeai Ebanamonakia.
40 Beraura kaihu niaoaina aonai maearima ikoikiai herekiai inawa haeai haeai haukia temai ainakia Iesu herena,
imana ha ha ahakiai ehaoꞌau ebamaurinakia.
41 Auba kiꞌa obokia maearima boꞌokia abomo aokiai tekarahi teio tetibaha,
“Oi hanona Keriso Tirama Nahuna.”
Iesu erikenakia eharabunakia aꞌi kateꞌabi pokina teꞌiobina ia hanona Keriso.
Iesu Iudea Mareakia Aokiai Eiroro.
42 Rani nirerena aonai Iesu ekarahi ꞌeka ꞌokona ha eao.
Mako ia itabuna teao,
tetabu ahina raninai tehina bena herekiai aꞌi pekaobo.
43 ꞌA Iesu ehina benakia etibaha,
“Au hanona Tirama ena obia aiarana pouna kairoro aina aiara haeai haeai herekiai pokina weiana paunai euhunaꞌu.”
44 Ba Iudea mareakia aokiai eiroro.