Iesu Morumoru Hauna Ebanamona.
8
Iesu oeo ai eriri raninai maearima toꞌu rarina ꞌakina murinai teꞌau.
2 Morumoru hauna ha emai Iesu wairanai ekaipehu eꞌabi etibaha,
“Obiapaka e,
konuatae raninai kobanamonaꞌu ketaina.”
3 Iesu imana etiu ahina eaꞌi ꞌapuana eꞌabi etibaha,
“Au nanuatae haumu menamo.”
Biaimo ena morumoru enamo.
4 Ba Iesu hau weiana ehinabena etibaha,
“Hau ha haianai aꞌi koꞌabi,
ia koao kipomu robe hauna herenai haumu kobaihana,
mai beruberu Mose eꞌuahina hauna kobaibeni ia herenai kebatohaniꞌo oi hanona aba onamo.”
Roma Huari Poki Hauna Ena Aꞌikakauma Hoana.
5 Iesu Kaperanauma aiaranai ekatoto raninai,
Roma huari poki hauna ha emai herena enoina kebaraina.
6 Eꞌabi etibaha,
“Obiapaka e,
eꞌu taꞌara aꞌi hauna nimero ituai enoti,
hauna nihaiara kiꞌa.”
7 Iesu ehinabena etibaha,
“Kawahi kabanamona.”
8 Huari poki hauna eꞌabi etibaha,
“Obiapaka e,
au aꞌi anamo oi komai eꞌu itu,
ꞌa koꞌabi mo weiana eꞌu taꞌara aꞌi hauna kemauri.
9 Pokina au hanona hiabu hauna ha baꞌanai ṉamiaho mai huari haukia baika au baꞌaꞌuai ṯemiaho.
Au hau neiana ṉahina bena,
‘Moao’ hanona niao,
haeamona hau weiana ṉahina bena,
‘Omai.’
hanona nimai.
Abomo eꞌu taꞌara aꞌi hauna ṉahina bena,
‘Neiana mobabaina.’
hanona ia nihore nibabaina.”
10 Iesu aia weiana eona raninai etaꞌu taꞌu huri,
ba murinai tiꞌau haukia ehinabenakia etibaha,
“ꞌAbi tohana au wai nahinabenimi,
Isaraela aonai hau ha herenai aꞌikakauma ṉahomana ha aꞌi atabu ahi ꞌapuana.
11 Au wai nahinabenimi maearima boꞌona ꞌakina taetanai mai tibotainai katemai Tirama ena obia aiarana aonai tatu ꞌekanai Aberahamo,
Isako,
Iakobo kipokia katemiati haeamo.
12 Ia maearima weiakia Tirama ena obia aiarana ebaꞌoruna ꞌeukia haukia hanona mahana wapuranai katekapo ahinakia weia katehai mai nihekia katearaoꞌi araoꞌi.”
13 Iesu huari poki hauna ehinabena etibaha,
“Moao emu itu,
oaꞌikakauma ihobonai heremuai aba kerama.”
Ena taꞌara aꞌi hauna beraura hoana weiana aonai beronai emauri mauri.
Iesu Petero Rawana Babiꞌena Ena Inawai Ebanamona.
14 Iesu Petero ena ituai ekatoto raninai,
Petero rawana babiꞌena eihana neinawa hauna nehiabu enoti.
15 Iesu ehore babiꞌe imana eaꞌi ꞌapuana,
ba inawa ehabona,
babiꞌe emikiri Iesu taꞌarana eaꞌi.
Iesu Ehore Inawa Haeai Haeai Ebanamonakia.
16 Weiana rabirabi eaoaina aonai maearima boꞌona auba kiꞌa obokia aokiai haukia temaiainakia Iesu herena.
Iesu hanona ena ꞌabiai auba kiꞌa obokia euꞌu ahinakia mai inawa haukia ikoikiai ebamaurinakia.
17 Neiana hanona Isaia mahabanai hauna ena ꞌabi ibatohana ṉa eꞌabi aiho,
‘Ia kipona eka ꞌabeꞌabe
keaꞌi parenakia
mai eka inawa kebua obonakia.’
Iesu Iꞌabana Haukiai Kateao.
18 Iesu toꞌu rarina tekori kaiarona eihanakia raninai iꞌabana haukia ehina benakia katekabanai obu abirana kateao.
19 Rauhubu poki hauna ha emai Iesu ehinabena etibaha,
“Baꞌiobi haumu e,
ꞌeka tabana koao ia au hanona oi murimuai kaꞌau.”
20 Iesu ia ena ꞌabi ebamuena etibaha,
“Waeha ꞌaki hanona mai ekia ꞌuri,
mai ꞌubi roborobokia hanona mai ekia niꞌi,
ꞌa au maearima nahuna hanona araꞌu kahorotina karai ꞌekana ahaꞌi.”
21 Iꞌabana hauna ha Iesu ehinabena etibaha,
“Obiapaka e,
paeao ꞌuai hamaꞌu pahorena.”
22 ꞌA Iesu ia ehinabena etibaha,
“Muriꞌuai moꞌau,
ꞌari haukia hanona mohabonakia kipokia ekia ꞌari temehorena.”
Iesu Rani Mai Roio Ebaꞌomatanakia.
23 Weiana Iesu ahiai eheꞌau,
iꞌabana haukia kipokia teao.
24 Weiana obuai kou rarina ꞌakina eabu ꞌau,
roio rarikia temikiri ahi tebahu abuna,
ꞌa Iesu hanona eparua ꞌari.
25 Iꞌabana haukia teao tebaona teꞌabi tetibaha,
“Obiapaka e,
moba maurinaka aba kahatono.”
26 Ia ekia ꞌabi ebamuena etibaha,
“Emi aꞌikakauma ekoꞌi koꞌi haumi,
aehoma buonai tutaꞌu kiꞌa?”
Ba Iesu emikiri rani mai roio erikenakia,
weiana beronai eꞌomata harai ꞌaki.
27 Hau weiakia tetaꞌu taꞌu huri teꞌabi tetibaha,
“Neiana hanona hau tabana,
ba rani mai roio abomo aiana tikaꞌaina.”
Iesu Hau Rua Aokiai Auba Kiꞌa Obokia Euꞌu Ahinakia.
28 Iesu obu abirana Gadarene hanonai ekaraꞌau raninai,
hau rua aokiai auba kiꞌa obokia ṯemiaho haukia ꞌari ahanai temai herena.
Ia teaiahu wairai paunai hau ha taeara weianai aꞌi ekabanai.
29 Ia teio tetibaha,
“Tirama nahuna e,
heremai ai taba nonuatae aina?
Rani aꞌi nitai bahana ia oi omai hanona ai kobahaiaranamai,
u?”
30 ꞌEka weianai baiatana aꞌi ehomaꞌa hanona aiporo toꞌuna ha tianiani.
31 Ba auba kiꞌa obokia Iesu tenoina tetibaha,
“Oi kobakarahinamai raninai,
kouhunamai kataeao aiporo toꞌuna weiana aokiai katatoto.”
32 Weiana ia ehinabenakia etibaha,
“Tomoao.”
Ba ia tekarahi teao,
aiporo aokiai tetoto.
Aiporo toꞌuna maikoinai herehere ai tebeau riri papaꞌa ai terobo ahi obu aonai tetobu tetono ꞌari.