Iesu Hau Ha Aonai Auba Kiꞌa Obokia Euꞌu Ahinakia.
5
Iesu iꞌabana haukia kipokia tekabanai ꞌobu abirana teao,
Gerasa hanonai tekaraꞌau.
Mareko 5.1-20
2 Rani weianai Iesu ahiai eriri hanona,
hau ha auba kiꞌa obokia aonai ṯemiaho hauna ꞌariahanai ekarahi emai Iesu ohi tebaitabu ahi.
3 Ena miaho ꞌekana hanona ꞌariahana,
hau ha tabiri ai kebiri ꞌinina hanona aꞌi etaina.
4 Pokina rani boꞌona hanona tabiri mai ꞌanaua ai tebirina,
ia ꞌanaua ebamohunakia mai tabiri eba paꞌanakia,
ia ibamamatana hanona hau ha aꞌi eꞌiobina.
5 Rabi mai mararani ia hanona ꞌariahanai mai oeo ai rani ikoinai eio,
abonamo ia kipona hauna wairoai eiuaiua ꞌauna.
6 Hau weiana Iesu atauꞌai nimai eihana raninai,
ebeau eao wairanai ekaipehu.
7-8 Iesu auba kiꞌa obona ehina bena etibaha,
“Auba kiꞌa obona!
Hau naiana aonai mokarahi.”
Hau weiana eio aota etibaha,
“Iesu ꞌUbi ꞌakina Tiramana Nahuna e.
Hereꞌu ai taba kobabaina?
Tirama atanai nanoiniꞌo,
aꞌi kobahaiaranaꞌu.”
9 Iesu ehore ebakaina etibaha,
“Oi atamu hanona tai?”
Ia ena ꞌabi ebamuena etibaha,
“Ataꞌu hanona Mako,
pokina ai hanona taboꞌo kiꞌa baha.”
10 Ia Iesu enoi hao noi haona,
ꞌeka weianai aꞌi keuhu ahinakia.
11 Aiporo toꞌuna rarina ꞌakina oeo mekenai ṯetuatua.
12 Auba kiꞌa obokia weiakia tehore Iesu tenoina tetibaha,
“Kouhunamai,
aiporo weiakia aokiai katatoto.”
13 Ua buonai Iesu ena ꞌabi ai auba kiꞌa obokia hau weiana aonai tekarahi teao aiporo aokiai tetoto,
aiporo toꞌuna hanona taha rua (2,000) tebeau teao papaꞌai terobo ahi ꞌobu ai tetobu,
tetono ꞌari.
14 Aiporo ꞌima haukia tebeau teao,
aiara haukia mai umai teaiara haukia herekiai pou tehinana,
ua buonai maearima teraꞌa teao taba erama hauna kateihana.
15 Teao Iesu herenai tekaraꞌau raninai,
ꞌuainai hau weiana aonai auba kiꞌa obokia temiaho hauna aona aba ebero,
ena habuni ebatotonakia emiati teihana raninai,
tetaꞌu kiꞌa.
16 Maearima weiakia Iesu taba ebabaina teihana haukia maearima baika herekiai hau weiana auba kiꞌa obokia aonai temiaho hauna pouna mai aiporo poukia teba ꞌiobinakia.
17 Aiara haukia tehore Iesu tenoina,
ekia hano kehabona.
18 Iesu ahiai eheꞌau hanona auba kiꞌa obokia aonai temiaho hauna ehore Iesu enoina keꞌabana kateao.
19 ꞌA ia ebamuena etibaha,
“Komue koao emu itu haukia herekia,
Tirama aea eaokoꞌoai aihoniꞌo abomo ebamauriniꞌo hauna hatiaꞌamu kobaꞌiobinakia.”
20 Ua buonai hau weiana eao Tekapoli aiarakia aokiai Iesu taba herenai ebabaina hauna pouna eiroro aina,
maearima ikoikiai tetaꞌu taꞌu huri.
Iairo Nahuna Uahona, Mai Iesu Ena Habuni Eaꞌi ꞌApuana Babiꞌena.
21 Iesu haeamona ahi ai eheꞌau,
tekabanai ꞌobu abiranai tebatai ꞌau,
mako rarina hanona weia poeai haeamona tetoꞌu mue.
Mareko 5.21-43
22 Marea poki hauna ha,
atana Iairo,
eao weia Iesu eihana aena pokinai ekaipehu,
23 mai aona ikoinai enoi,
etibaha,
“Nahaꞌu uahouahona hanona aba keꞌari,
pahaeao,
haunai pohao ꞌau pemauri.”
24 Iesu emikiri Iairo ohi teao,
ꞌa mako rarina hanona Iesu teꞌopu abuna tekaꞌa.
25 Babiꞌe ha abomo weia babiꞌe ekia inawa ehaiara aina ihauna ikoinai harau haea rua.
26 Muramura baibeni haukia boꞌokia ia ena inawa katebanamona ia aꞌi etainakia,
ena moni mai kepu boꞌona ebaorenakia,
ꞌa ena inawa aꞌi enamo,
inawa hanona eapaꞌua.
27 Ia Iesu pouna eona raninai,
mako baiatakiai ia murinai ekataeana,
ena habuni eaꞌi ꞌapuana.
28 Pokina ia eraonana,
‘Ena habuni mo paꞌi ꞌapuana hanona pamauri.’
29 Ena habuni eaꞌi ꞌapuana beronai aruaru eꞌoro,
hauna eonobaina ena inawa hanona aba enamo.
30 Iesu beronai eonobaina bamauri hiabuna aonai hauna ekarahi buonai ekori kabe ebakai bakai etibaha,
“Tai eꞌu habuni eaꞌi ꞌapuana?”
31 Iꞌabana haukia teꞌabi tetibaha,
“Mako rarina ꞌakina tibaiꞌabi aina heremuai,
aehoma buonai nubakai bakai,
tai eaꞌi ꞌapuaniꞌo.”
32 ꞌA Iesu hanona eihao ihao ia eaꞌi ꞌapuana hauna etabuna.
33 Babiꞌe herenai erama akana aba eꞌiobina buonai,
etaꞌu kiꞌa mai ꞌururu ꞌururuna ekaꞌa eao Iesu wairanai ekaipehu,
ena pou maikoina ehinana.
34 Iesu ia ehina bena etibaha,
“Nahaꞌu e,
emu aꞌikakauma buonai aba omauri.
Mai baibuamu moao.
Emu haiara ikoikiai aba teore.”
35 Iesu niꞌabi oho mo aonai,
Iairo ena ituai maearima baika temai herena tehina bena tetibaha,
“Nahumu hanona aba eꞌari.
Baꞌiobi hauna aꞌi mobaroꞌarina.”
36 ꞌA Iesu ꞌabi weiana eona raninai aꞌi eaꞌi taeana,
marea poki hauna ehina bena etibaha,
“Aꞌi motaꞌu,
moaꞌikakauma mo.”
37 Ia ehore ikoikiai ebamuenakia,
tai ha aꞌi keꞌabana,
ꞌa Petero,
Iakobo mai uahoꞌabana Ioane iamo teaihau kateꞌabana.
38 Teao marea poki hauna ena ituai tekaraꞌau,
maearima eihanakia tehai aokoꞌo mai tehai apaꞌua.
39 Iesu itu aonai ekatoto,
maearima ehina benakia etibaha,
“Taba buonai tuhai,
uru rarina ꞌakina tubabuana,
uaho neiana aꞌi eꞌari,
ꞌa ia hanona niparua.”
40 ꞌA ia hanona Iesu teiriri aina.
Maearima ikoikiai ehina benakia tekarahi,
epua murinai,
uahouaho hamana mai hinana abomo ia mai iꞌabana haukia aihau kipokia teao uahouaho enoti ꞌekanai tetoto.
41 Iesu uahouaho imanai eaꞌi,
ehina bena etibaha,
“Tarita Kumi!”
(Anina hanona ‘Uahouaho e,
nahina beniꞌo,
momikiri.’)
42 Uaho uaho weiana beronai mo emikiri,
ekaoao kaoao.
Teihana haukia ikoikiai tetaꞌutaꞌu huri.
Uahouaho ihauna hanona harau haea rua.
43 Iesu ehore eharabunakia pouna aꞌi katehinana.
Haeamona ehina benakia,
uahouaho ena aniani katebena.