Iesu Mero Hauna Ha Ebanamona.
9
Iesu ahi ai eheꞌau obu ebeau banai ena aiara tohana eao.
2 Maearima baika mero hauna ha totoꞌeai teaoaina herena.
Iesu ekia aꞌikakauma eihana raninai,
mero hauna ehinabena etibaha,
“Nahaꞌu e,
aꞌi kotaꞌu,
emu kiꞌa aba ihina hao.”
3 Weiana rauhubu poki haukia baika kipokia baiatakia teꞌabiꞌabi tetibaha,
“Hau neiana hanona Tirama herenai niꞌabi kiꞌa.”
4 Iesu ekia raona raona eꞌiobinakia ba eꞌabi etibaha,
“Aehoma buonai raona kiꞌa obona aomiai turaonana?
5 Aeana hauna eꞌamaꞌama,
kaꞌabi ‘Emu kiꞌa ihinahao.’
ꞌao kaꞌabi ‘Momikiri,
mokaꞌa.’
6 ꞌA wai katoꞌiobina au maearima nahuna hanona mai eꞌu hiabu hanopaka maearimakia ekia kiꞌa kahina hao.”
Ba Iesu mero hauna ehinabena etibaha,
“Momikiri,
emu totoꞌe moaꞌina,
moao emu itu.”
7 Weiana ia emikiri,
eao ena itu.
8 Toꞌu haukia babai weiana teihana raninai tetaꞌu kiꞌa,
ba hiabu uahomana maearima ebenakia Tiramana tebanamona.
Iesu Mataio Eaparina.
9 Iesu ꞌeka weiana ehabona eao aonai hau ha eihana,
ia atana Mataio moni aꞌi ꞌekanaia emiati,
ehinabena etibaha,
“Muriꞌuai moꞌau.”
Mataio emikiri murinai ekaꞌa.
10 Iesu Mataio ena itu ai nianiani aonai,
moni bararo haukia boꞌona mai aka kiꞌa haukia abomo temai ia mai iꞌabana haukia kipokia teaniani haeamo.
11 Parisea haukia baika hoahoa weiana teihana raninai iꞌabana haukia tebakainakia tetibaha,
“Aehoma buonai emi baꞌiobi hauna moni bararo haukia mai aka kiꞌa haukia kipokia tianiani haeamo?”
12 Iesu aia neiana eona hanona ekia ꞌabi ebamuena etibaha,
“Aꞌi ṯeinawa haukia hanona muramura baibeni haunab aꞌi ṯenuatae aina,
ꞌa ṯeinawa haukia mo ia ṯenuatae aina.
13 Wai tomoao Puka robena ꞌabina neiana anina taba hanona katotabuna,
‘Au aokoꞌo nanuatae aina ia baibeni tabana ahaꞌi.’
Au amai ena poki hanona bero haukia aꞌi kaparinakia,
ꞌa aka kiꞌa haukia kaparinakia.”
Ani Robe ꞌAbina.
14 Weiana Ioane iꞌabana haukia temai Iesu herena tebakaina tetibaha,
“Aehoma buonai ai mai Parisea haukia kipokia ṯani robe,
ꞌa oi iꞌabamu haukia hanona aꞌi tiani robe?”
15 Iesu ekia ꞌabi ebamuena etibaha,
“Hawainibe mahamaha hauna ena baki haukia herekiai nemiaho aonai ia aea katehai aiho?
ꞌA rani kemai hawainibe mahamaha hauna herekiai kateaꞌi parena aonai ia kateani robe.
16 Hau ha habuni mahamahana puana habuni ꞌaiꞌaina ohi aꞌi ketai orenakia,
pokina itai ꞌekana kepuhu paꞌana hanona tapa keapaꞌua kiꞌa.
17 Maearima bine beina mahamahana beibei ꞌaiꞌaikiai aꞌi katebaharuna,
pokina beibei katepaꞌa hanona bine beina kekiki oioi abomo beibei kekiꞌa,
ꞌa bine beina mahamahana hanona beibei mahamahakiai kateibaharu weiana terarua katenamo.”
Uaho Eꞌari Hauna Ha, Mai Inawa Babiꞌena Ha.
18 Iesu ꞌabi neiana nehinana aonai,
marea poki hauna ha emai wairanai ekai pehu ehinabena etibaha,
“Nahaꞌu uahona hanona bariu mo eꞌari,
ia omai imamu ahanai kohao ꞌau hanona kemauri.”
19 Ba Iesu emikiri murinai eꞌau,
iꞌabana haukia abomo teao.
20 Weia babiꞌe ekia inawa eaꞌina ihau harau haea rua babiꞌena ha Iesu murinai ekaꞌa emai ena habuni puana eaꞌi ꞌapuana.
21 Pokina kipona aonai etibaha,
“Ena habuni puana mo kaꞌi ꞌapuana hanona kanamo.”
22 ꞌA Iesu eiha kabe eihana ba ehinabena etibaha,
“Nahaꞌu e,
aꞌi kotaꞌu,
emu aꞌikakauma ehore ebanamoniꞌo.”
Babiꞌe beronai mo enamo.
23 Weiana Iesu marea poki hauna ena ituai etoto,
irarabu ahu haukia mai toꞌu rarina urukia nebua eihanakia raninai,
24 ia ehinabenakia etibaha,
“Tomokatuꞌa,
uaho hanona aꞌi eꞌari,
ia hanona niparua.”
Toꞌu haukia Iesu teiriri aina.
25 Ba toꞌu haukia tekarahi mahanai murinai,
ia ikaihuri aonai etoto,
uaho imanai eaꞌi hanona uaho emauri mauri ba emikiri.
26 Pou neiana eao hano weiana maikoinai tehina otaraina.
Iesu Mahakia Tekiꞌa Haukia Rua Mai Maeana Ekiꞌa Hauna Ha Ebanamonakia.
27 Iesu ꞌeka weianai ekarahi aonai mahakia tekiꞌa haukia rua murinai tekaꞌa teio tetibaha,
“Davida nahuna e,
moaokoꞌo ainamai.”
28 Ia ituai etoto raninai mahakia tekiꞌa haukia temai herena,
ba Iesu ebakainakia etibaha,
“Wai tuaꞌikakaumanaꞌu au aka neiana kababaina hanona ketaina,
u?”
Ia teꞌabi tetibaha,
“ꞌE,
Obiapaka,
ṯaꞌikakaumaniꞌo.”
29 Weiana Iesu ia mahakia eaꞌi ꞌapuanakia ba eꞌabi etibaha,
“Emi aꞌikakauma ihobona heremiai merama.”
30 Weiana mahakia tenoꞌa.
Ba Iesu eharabunakia etibaha,
“Hau ha aꞌi katobaꞌiobina.”
31 ꞌA ia tekarahi teao hano weiana maikoina aonai Iesu pouna tehina otaraina.
32 Ia tekarahi tekaꞌa aonai,
maearima baika hau ha aonai auba kiꞌa obona nemiaho buonai maeana ekiꞌa hauna teaoaina Iesu herena.
33 Auba kiꞌa obona euꞌu ahina murinai maeana ekiꞌa hauna enamo ba eꞌabiꞌabi,
toꞌu haukia maikoinai tetaꞌu taꞌu huri teꞌabi tetibaha,
“Isaraela aonai hoa nahomana ha aꞌi haiha ꞌapuana.”
34 ꞌA Parisea haukia teꞌabi tetibaha,
“Ia hanona auba kiꞌa obokia ekia poki hauna ena hiabuai auba kiꞌa obokia neuꞌu ahinakia.”
Iesu Toꞌu Haukia Eaokoꞌo ainakia.
35 Weiana Iesu eao aiara apaꞌuakia mai papakia maikoikiai aokiai ekaoao,
ekia marea aokiai ebaꞌiobi,
Tirama ena obia aiara pouna namona eiroro aina,
inawa mai haiara haeai haeai ikoikiai ebanamonakia.
36 Iesu toꞌu haukia eihanakia hana eaokoꞌo ainakia pokina tiaru ꞌabaea mai hau hororokia ihobona mamoe iꞌimakia hauna ahaꞌi haukia ꞌabana.
37 Ba ia iꞌabana haukia ehinabenakia etibaha,
“Umai aniani boꞌona aba teꞌoru,
ia aka haukia hanona aꞌi eboꞌo.
38 Ua buonai uma Poki Hauna katonoina aka haukia keuhunakia ena umai kateueu.”