Iesu Iuhubeau Haukia Harau Haea Rua Etinaꞌanakia.
10
Iesu iꞌabana haukia harau haea rua eaparinakia temai herena,
hiabu ebenakia auba kiꞌa obokia kateuꞌu ahinakia haeamona inawa mai haiara haeai haeai ikoikiai kateba namonakia.
2 Iuhubeau haukia harau haea rua atakia hanona neiakia,
kori ꞌuaina Simona,
ia hanona teaparina Petero,
mai uahoꞌabana Anderea,
Sebedeo nahuna Iakobo mai uahoꞌabana Ioane.
3 Pilipo,
Batolomeo,
Toma mai moni bararo hauna Mataio,
Alepeo nahuna Iakobo,
mai Tadeo.
4 Selote hauna Simona,
mai Isakariote hauna Iuda,
Iesu ehinahinaina hauna.
Iꞌabana Haukia Harau Haea Rua Euhu Ahinakia.
5 Iesu hau harau haea rua neiakia euhunakia mai ehinabenakia etibaha,
“Rama haeai haukia ekia hano aꞌi katoao abomo Samaria aiarakia ha aꞌi katokatoto.
6 ꞌA katoao Isaraela itubuna ena mamoe teꞌakauma haukia herekia.
7 Katoao aonai katoiroro katotibaha,
‘Tirama ena obia aiarana hanona aba herekai.’
8 Inawa haukia katoba namonakia,
ꞌari haukia katoba maurinakia,
morumoru teaꞌina haukia hauanikia katoba namonakia,
mai auba kiꞌa obokia katouꞌu ahi.
Wai toaꞌi ꞌabaeana buonai katobaibeni ꞌabaea.
9 Emi mahoa ihiua ihiua aokiai moni apaꞌuana ꞌao papana ha aꞌi katoutana.
10 Emi kaoao paunai mahoa,
habuni ibatoto ibaruana,
tamaka,
mai ikaiꞌini aꞌi katoaꞌinakia,
pokina aka hauna hanona mai ena iroꞌo.
11 Aiara tabanai tukatoto hanona keaꞌi taeanimi hauna katotabuna herenai katomiaho keaomo ꞌeka weiana katohabona.
12 Itu weianai tukatoto hanona banamo katobaibeni.
13 Itu maearimakia kateaꞌi taeanimi raninai emi baibua banamona ahakiai kemiaho,
ꞌa aꞌi kateaꞌi taeanimi raninai emi banamo hanona kemue heremi.
14 ꞌA tai ha aꞌi keaꞌi taeanimi ꞌao aiami aꞌi keona raninai aiara ꞌao itu weiana katohabona aonai ꞌapumi ꞌapurorokia katotabu tabu obonakia.
15 ꞌAbi tohana au wai nahina benimi,
bakai orena berauranai Sodoma mai Gomora aiarakia ekia puma ma keꞌaera,
ia aiara weiana ena puma hanona keapaꞌua.
Baiꞌoata Katemai.
16 Au wai nauhunimi hanona ihobona matoha mamoe ꞌabakia tuao waeha ꞌaki baiatakiai.
Ua buonai ꞌerau ꞌabakiai katoao katoaobero mai rauria ꞌabakiai katoao aomiai kiꞌa aꞌi katoraonana.
17 Maearima herekiai katoꞌima ꞌima harainimi,
pokina ia kateaoainimi bakai ꞌekanai katehorotinimi,
abomo marea aokiai kateꞌatinimi.
18 Au buoꞌuai wai kateaoainimi poki haukia apaꞌuakia mai obia haukia apaꞌuakia wairakiai katebabakainimi,
aonai ia mai rama haeai haukia herekiai pou namona ihina pouna haumiai katoao.
19 Kateaoainimi bakai ꞌekana raninai aomi aꞌi kearoꞌari ꞌabi tabana katohinana ꞌao aea katoꞌabi aiho.
Rani weianai taba katohinana hauna Tirama kebenimi.
20 Pokina ihinana hanona wai ahaꞌi,
ꞌa Hamami Tirama Aubana aomiai hauna keꞌabi.
21 Uahoꞌaba ha kehore uahoꞌabana kehinahina aina kateahu ꞌarina,
hama kehore nahuna ua kehomana,
nahu katehore hamakia mai hinakia kateꞌoatanakia ꞌari ꞌekanai katehorotinakia.
22 Maearima ikoikiai au buoꞌuai kateaotata ainimi,
ꞌa tai kekori ꞌini keao puanai hauna kemauri.
23 Aiara hai kateꞌoatanimi raninai katoꞌuru katoao aiara ꞌabana ha.
ꞌAbi tohana au wai nahinabenimi,
Isaraela aiarakia ikoikiai aꞌi katokatoto ore bahanakia aonai au maearima nahuna hanona kamai.
24 Marere miorina ena baꞌiobi hauna aꞌi ketara haona ꞌao taꞌaraꞌi hauna ena poki hauna aꞌi ketara haona.
25 Marere miorina ena baꞌiobi hauna ohi kateihobo hanona enamo,
mai taꞌara aꞌi hauna ena poki hauna ohi kateihobo hanona enamo.
Itu poki hauna kateaparina Belesebulo raninai itu maearimakia baika abomo ata kiꞌa obokiai kateaparinakia.
Kahataꞌu aina Hauna.
26 Ua buonai aꞌi katotaꞌu ainakia.
Taba tebahu abunakia haukia ikoikiai hanona kateaꞌi kau mai taba bunikia ikoikiai hanona katebawaira tinanakia kateꞌiobi.
27 Taba wapurai nahina benimi haukia hanona ea aonai katohinanakia mai taba haiamiai abateteai haukia hanona itu kapenai katoiroro ainakia.
28 Weiakia hauani kateahu ꞌarina haukia aꞌi katotaꞌu ainakia pokina auba hanona aꞌi kateahu ꞌarina.
Ia Tirama katotaꞌu aina ia hanona hauani mai auba terarua keaꞌi kiꞌa kiꞌa bahanakia iruba aonai.
29 Komure rua hanona pene hamonai katekawanakia.
Iamo Hamami ena nuatae ahaꞌi raninai ha aꞌi keꞌeho ꞌanoai.
30 Weiana buimi ikoikiai aramiai haukia aba etuabi orenakia.
31 Ua buonai aꞌi katotaꞌu wai hanona komure boꞌona ꞌakina totara haonakia.
Iesu Ihina Pouna Hoana.
32 Hau ha maearima wairakiai keꞌabi ia au niꞌabanaꞌu hauna hanona au abomo Hamaꞌu kupai nemiaho hauna wairanai kaꞌabi ia hanona au iꞌabaꞌu.
33 ꞌA hau ha maearima wairakiai au kebuniai ainaꞌu hauna hanona au abomo Hamaꞌu kupai nemaiho hauna wairanai ia kabuniai aina.
Kareba Amaiaina Hanopakai.
34 Aꞌi katoraonana au amai hanona baibua hanopakai kamaiaina.
Au hanona baibua aꞌi amaiaina ia kareba amaiaina baiꞌoata kerama.
35 Au amai pokina hanona neiana,
‘Hau kehore hamana keꞌoatana,
uaho kehore hinana keꞌoatana,
rawa babiꞌena ꞌaruꞌaruna kehore
rawana babiꞌena kirona keꞌoatana.
36 Maearima ha ena itu haukia
hanona ena ꞌou haukiai kateao.’ Mik 7.6
37 Hau ha hamana ꞌao hinana niraonaꞌauai kiꞌa bahana ba au,
ia hanona aꞌi ketaina hereꞌuai.
Hau ha nahuna hauna ꞌao uahona niraonaꞌauai kiꞌa bahana ba au,
ia hanona aꞌi ketaina hereꞌuai.
38 Hau ha ena matiu ibiri ropo aꞌi nebuana muriꞌuai aꞌi niꞌau hauna,
ia hanona aꞌi ketaina hereꞌuai.
39 Hau ha ena mauri keani kiꞌaina hauna hanona ena mauri kebaꞌakaumana,
hau ha ena mauri kebaꞌakaumana au pauꞌuai hauna hanona ena mauri ketabu ahina.
ꞌAra Namona Kebenakia.
(Mk 9.41)
40 Maearima tabana wai niaꞌi taeanimi hauna hanona au niaꞌi taeanaꞌu,
mai au niaꞌi taeanaꞌu hauna hanona euhunaꞌu Tiramana abomo niaꞌi taeana.
41 Hau ha mahabanai hauna ha niaꞌi taeana pokina ia mahabanai hauna paunai,
ia hanona mahabanai ꞌarana ihobona keaꞌina,
mai hau ha bero hauna ha niaꞌi taeana pokina ia bero hauna paunai,
ia hanona bero hauna ꞌarana ihobona keaꞌina.
42 Hau ha bei ꞌamarina ereai miori neiakia atakia aꞌi teapaꞌua haukia kebenakia pokina ia au iꞌabaꞌu haukia paunai,
ꞌabi tohana au wai nahina benimi,
ꞌara iaꞌina aonai ia aꞌi kekapu.”