Iesu Beraura Robeai Hau Ha Ebanamona.
14
Beraura robena ha ai Iesu eao Parisea ekia poki hauna ha ena ituai kateaniani haeamo,
ba baika hanona ia teiha ꞌini haraina.
2 Weia bua haiarana hauna ha Iesu wairanai emiati.
Luka 14:1-35
3 Iesu emikiri Parisea haukia mai rauhubu poki haukia ebakainakia etibaha,
“Kahabamauri Beraura robenai hanona mai rauhubuna ꞌao ahaꞌi?”
4 ꞌA ia ꞌabi haꞌi tehinana.
Ba Iesu emikiri hau weiana eaꞌina ebamaurina euhuna ekaꞌa.
5 Haeamona ehina benakia etibaha,
“Wai ha beraura robenai nahumu ꞌao emu poromakau ꞌuriai petoa raninai,
aꞌi ponoanoa ia aꞌi poberi ꞌauna,
u?”
6 Ena ꞌabi katebamuena taearana ahaꞌi.
Kipomu Aꞌi Kobapaꞌuaniꞌo.
7 Iesu baki haukia ekia miati ꞌekakia namokia tetinaꞌanakia eihanakia raninai,
ꞌabi ibabatai neiana ehinabenakia.
8 “Hau ha ena beaubeau kemai heremu ena hawainibe tatuna koao raninai,
miati ꞌekana namona ꞌakinai aꞌi komiati,
pokina aꞌi oꞌiobina tatu poki hauna oi aramuai hauna ha aba ehina bena.
9 Tatu poki hauna torarua ebeaunimi hauna kemai heremu kehina beniꞌo ketibaha,
‘Imiaꞌau naiana mohabona,
hau neiana naia kemiaꞌau.’
Ba oi hanona mai haumaeamu koao muriai ṯemiati haukia herekiai waꞌa katomiati.
10 ꞌA beaubeau kemai heremu raninai koao muriai komiati,
ba ebeauniꞌo hauna kemai heremu ketibaha,
‘Eꞌu hau e,
oi emu imiaꞌau hanona neiana ꞌubiai.’
Tatu weiana aonai tetoto haukia ikoikiai oi mo katebanamoniꞌo.
11 Hau ha kipona kebapaꞌuana hanona katebaririna,
ꞌa kipona kebaririna hauna hanona katebapaꞌuana.”
Emu Tatu Aonai Uraru Haukia Kobeaunakia.
12 Iesu tatu poki hauna ehina bena etibaha,
“Atiaha ꞌao rabirabi anianina kobaꞌoruna raninai,
emu hau,
uahoꞌabamu,
hatiaꞌamu ꞌao obia haukia aꞌi kobeaunakia,
pokina ia abokiamo oi katebeauniꞌo ꞌeumu ꞌarana katehorena.
13 ꞌA oi tatu ha kobabaina raninai,
uraru,
kaiti,
ꞌome mai ꞌiau haukia kobeaunakia.
14 Weianai oi banamo koaꞌina,
pokina ꞌeumu ꞌarana aꞌi katehorena,
ia aka bero haukia ibamikiri muekiai ꞌaramu koaꞌina.”
Ori Ibabataina Tatu Rarina Ha.
15 Weia kipokia tianiani haeamo hauna ha aia neiana eona,
ba ia Iesu ehina bena etibaha,
“Tirama ena obia aiaranai kateaniani haukia hanona katenamo.”
16 Iesu ena ꞌabi ebamuena etibaha,
“Hau ha tatu rarina ꞌakina ha ebabaina,
ba maearima boꞌokia ebeaunakia.
17 Tatu anianikia tebaꞌorunakia aonai,
ena taꞌara aꞌi hauna euhuna enuatae ainakia haukia kehina benakia etibaha,
‘Tomai taba ikoikiai aba teꞌoru.’
18 ꞌA ia ikoikiai teubo.
Ba koriꞌuaina hauna taꞌara aꞌi hauna ehina bena etibaha,
‘Au hanona hano ha akawana,
ua buonai kaeao kaihana.
Emu poki hauna kohina bena,
aꞌi kawahi.’
19 Ha etibaha,
‘Au hanona bariumo eꞌu poromakau harau haea akawanakia,
ba aba ṉaeao kabahobonakia,
emu poki hauna kohina bena,
aꞌi kawahi.’
20 Haeamona ha etibaha,
‘Au hanona bariu mo ahawainibe,
buonai aꞌi kawahi.’
21 “Taꞌara aꞌi hauna emue emai ena poki hauna ebaꞌiobina,
ba poki hauna eopuere wairai,
ena taꞌara aꞌi hauna euhuna etibaha,
‘Moao biai aiara ibuakiai mai ikariri ꞌekakiai,
uraru haukia,
kaiti haukia,
ꞌiau haukia,
ꞌome haukia komaiainakia.’
22 “Ba taꞌara aꞌi hauna eao aka weiana ebabaina emue emai ia ehina bena etibaha,
‘Poki haumu e,
ohina benaꞌu akana aba ababaina,
ia miati ꞌekana mo aꞌi ebonu.’
23 Ba poki hauna haeamona ena taꞌara aꞌi hauna ehina bena etibaha,
‘Moao aiara aokiai mai ara pokikiai ṯemiati haukia komaiainakia,
eꞌu itu katemia bonuna.
24 Au wai nahina benimi.
Abeau ꞌuainakia haukia ha au eꞌu tatu anianina ha aꞌi kateani ꞌapuana.’”
Koraona Harai ꞌUaina Ba Iesu Murinai Koꞌau.
25 Mako rarina Iesu kipokia teao,
ba ekori kabe ehina benakia etibaha,
26 “Hau ha hereꞌu kemai raninai ia hamana ꞌao hinana,
atawana ꞌao nahuna,
uahoꞌabana ꞌao haibuna,
abomo ia kipona ena mauri keraona apaꞌuana hauna au iꞌabaꞌu ai aꞌi keao.
27 Abomo hau ha kipona ena matiu ibiri ropo aꞌi kebuana muriꞌu aꞌi kemai hauna hanona au iꞌabaꞌu haunai aꞌi keao.
28 “Wai ha nonuatae itu roꞌena ha kobakorina raninai,
oi komiati ꞌarana bita hanona kobahu ꞌuaina,
itu weiana kobaorena monina aba ketaina,
ꞌao?
29 Itu weiana ebabai ramana,
hoborona ebakoroti ia ꞌubina aꞌi kebaorena raninai kateihana haukia ikoikiai kateiriri aina,
30 kateꞌabi katetibaha,
‘Hau neiana ena itu akana eaꞌi ramana,
ia kebaorena hanona aꞌi etaina.’
31 “Ihobona obia ꞌarana ha pemikiri obia ꞌarana ha pehuari bena raninai,
pemiati ꞌuai peraona raona ia ena huari haukia taha harau haea ai kehore huari haukia weiakia taha harau rua timai haukia kehuari benakia hanona aba ketaina ꞌao?
32 Aꞌi ketaina raninai,
weia atauꞌai ṯemiaho oho aonai,
ena iuhubeau hauna ha keuhuna keao,
baibua ꞌabina katerobahu aina.
33 Ihobonaimo wai ha emu taba ikoikiai aꞌi kohabonakia raninai,
oi hanona au iꞌabaꞌu haumuai aꞌi koao.
Kikimaru Ena ꞌAkuꞌaku Aꞌi Meꞌakauma.