13 Wai hanona maearima ekia kikimaru.

Ia kikimaru ena ꞌakuꞌaku keꞌakauma raninai,

aea keibaꞌakuꞌaku mue aiho?

Taba baika herekiai ena aka ahaꞌi buonai,

kahaneꞌe ahina maearima ahanai kateꞌehe hai ꞌehe haina.

14 Wai hanona maearima ekia ea.

Aiara oeo ꞌubinai tebabaina hauna hanona kebuni aꞌi ketaina.

15 Hau ha ramepa kebaꞌarana raninai uro baꞌanai aꞌi kehorotina.

Ia ihaoꞌauna ꞌekanai kehaoꞌauna,

ba maearima ikoinai itu aonai haukia ea kebenakia.

16 Taeara neiana ihobonai,

emi ea maearima wairakiai tomobawaira tinana,

weiana aka namokia tubabai hanona temeiha Hamami kupai hauna temebanamona.

17 Ṉa aꞌi katoraona aiho au amai hanona Mose ena Rauhubu mai mahabanai haukia ekia baꞌiobi kaꞌi parenakia paunai.

Au amai hanona aꞌi kaꞌi parenakia,

ia ekia baꞌiobi kabatohanakia.

18 ꞌAbi tohana au wai nahinabenimi,

hanopaka mai kupa katepua,

ia rererere puapuana ꞌaki ha ꞌao ꞌabi papana ꞌaki ha rauhubu aonai aꞌi keꞌakauma keao mo taba ikoinai katerama ore.

19 Weiana buonai hau ha rauhubu papana ꞌaki aꞌi nikaꞌaina ba maearima baika baꞌiobi weiana ihobona kebenakia hanona Tirama ena obia aiaranai ia hanona keꞌaera ꞌaera ꞌaki.

Ia tai rauhubu nikaꞌai haraina mai baꞌiobi weiana ihobona nibenakia hanona Tirama ena obia aiaranai ia hanona keapaꞌua.

20 Au wai nahinabenimi,

wai emi bero akakia katehore weiakia Parisea haukia mai rauhubu poki haukia ekia bero akakia aꞌi katetara haonakia raninai Tirama ena obia aiaranai aꞌi katokatoto ꞌapua.

21 ꞌUainai ꞌabaꞌabami herekiai tehinana ꞌabina aba tona.

“Aꞌi koahuahu,

ia hau ha keahuahu hauna hanona bakai ꞌekanai kehoroti.”

22 Ia bariu au nahinabenimi.

Hau ha uahoꞌabana niopuereaina hanona kateaoaina bakai ꞌekana.

Haeamona hau ha uahoꞌabana poꞌona kehinana hanona kateaoaina bakai apaꞌuana ṯeꞌimana haukia herekia.

Ia hau ha uahoꞌabana kehinabena ketibaha,

“Ao ꞌabaea tohamu.”

hanona kateaoaina ꞌeka kiꞌa obona iruba aꞌi niꞌao ꞌapua ꞌekana.

23 Weiana paunai emu ibeni tabana itara robena ahanai nubaibeni aonai uahoꞌabamu herenai emu beho ha nemiaho hauna oraona tinana raninai,

24 emu ibeni tabana weia itara robena wairanai kohabona.

Koao ꞌuai uahoꞌabamu herenai torarua katoꞌabi oioi,

ba komue emu ibeni tabana kobaibeni.

25 Hau ha oi beho ꞌekanai ehorotiniꞌo hauna bariu torarua bakai ꞌekana tuao aonai mobaꞌamena beho weiana tomobabero biaina,

ba bakai wairanai kokoroti.

Weiana aꞌi kobabaina raninai,

oi niꞌoataniꞌo hauna bakai neꞌimana hauna imanai keutaniꞌo,

bakai neꞌimana hauna habuni hauna imanai keutaniꞌo,

ba oi hanona wapura ꞌekanai kate horotiniꞌo.

26 ꞌAbi tohana au nahina beniꞌo,

oi hanona aꞌi kokarahi ꞌapua keaomo emu beho ꞌarana pene orena kobaibeni.

27 Wai ꞌabi ꞌuruna aba tona ṉa eꞌabi aiho,

‘Oi hau ha atawana aꞌi konabau aina.’

28 Ia au wai nahina benimi hau ha babiꞌe neihana ba niraona kiꞌa hanona aonai aba nabau hoana ebabaina ia herenai.

29 Mahamu itipana kiꞌai nihorotiniꞌo raninai,

koꞌipa ahina koneꞌena.

Hauanimu puana keꞌakauma hanona enamo ba haumu maikoina iruba aꞌi niꞌao ꞌapua ꞌekana aonai aꞌi mekapo totoniꞌo marikina.

30 Mai imamu itipana kiꞌai nihorotiniꞌo raninai,

kokabe hurina koneꞌena.

Haumu puana hamona keꞌakauma hanona enamo ba haumu maikoina iruba aꞌi niꞌao ꞌapua ꞌekana aonai aꞌi mekapo totoniꞌo marikina.

31 Abomo ṉa eꞌabi aiho,

‘Hau ha atawana nibakarahina raninai bakarahi marerena ha kererena kebena.’

32 Ia au wai nahinabenimi,

hau ha atawana aꞌi nimaha porepore ia nibakarahi ꞌabaeana hanona ena behoai atawana nabau ꞌekanai ehorotina,

mai hau ha kehore tebakarahina babiꞌena weiana keatawana hanona ia abomo nabau hoana ebabaina.

33 Haeamona ꞌuainai ꞌabaꞌabami herekiai tehinana ꞌabina aba tona,

‘Emi ꞌabiꞌuai hanona aꞌi katokabena.

Ia emi ꞌabiꞌuai pahihina Obiapaka herenai hanona katobabaina.’

34 Ia au wai nahinabenimi.

ꞌAbiꞌuai pahihina aꞌi katobabaina.

Kupa ahanai ꞌabiꞌuai pahihina aꞌi katohinana,

pokina ia hanona Tirama ena imiaꞌau.

35 ꞌAo hanopaka ahanai ꞌabiꞌuai pahihina aꞌi katohinana,

pokina ia hanona Tirama ꞌapuna ihorotina ꞌekana,

ꞌao Ierusalema ahanai ꞌabiꞌuai pahihina aꞌi katohinana,

pokina ia hanona Obia ꞌarana apaꞌuana ena aiara.

36 Mai oi ꞌaramu ahanai ꞌabiꞌuai pahihina aꞌi kohinana,

pokina oi buimu ha hamona kobaporena ꞌao kobaꞌumuna hanona aꞌi oꞌiobina.

37 Oi mo emu ꞌabi,

ꞌE reꞌa ꞌE,

ꞌao Ahaꞌi reꞌa Ahaꞌi.

Taba neiakia waira ꞌakinai nohinanakia hanona hau kiꞌa obona herenai timai.

38 Wai ꞌabi neiana aba tona eꞌabi etibaha,

‘Maha ꞌarana hanona maha,

mai nihe ꞌarana hanona nihe.’

39 Ia au wai nahinabenimi,

maearima ena kiꞌa ꞌarana hanona aꞌi kobamuena.

Hau ha mekemu itipana keboꞌana raninai,

kokeꞌe banai awarimu abomo kobena.

40 Hau ha nenuatae emu ibatoto keaꞌina paunai bakai ꞌekanai kehorotiniꞌo raninai,

emu iroꞌabu abomo kobena.

41 Hau ha kebahi ahiniꞌo maela hamona kokaꞌaina raninai,

torarua maela rua katokaꞌaina.

42 Maearima tinoiniꞌo tabana hanona kobenakia,

mai heremuai taba ha nenuatae aina keaꞌi ꞌabaeana hanona aꞌi koubo aina.

43 Wai ꞌabi ꞌuruna aba tona ṉa eꞌabi aiho,

‘Heremiai haukia katoraonaꞌau ainakia mai emi ꞌou haukia katobakiꞌanakia.’

44 Ia au wai nahinabenimi,

emi ꞌou haukia katoraonaꞌau ainakia mai weiakia tiꞌoatanimi haukia paukiai kato bahubaꞌari.

45 Weianai wai hanona Hamami kupai hauna nahunai katoao.

Ia ena beraura ihobonai mo nibararana kiꞌa haukia mai namo haukia herekiai,

mai abara ihobona mo nibatibona babai bero haukia mai babai kiꞌa haukia herekiai.

46 Wai maearima weiakia tiraonaꞌau ainimi haukia mo turaonaꞌau ainakia raninai ꞌarami hanona taba katoaꞌina?

Moni bararo haukia abomo ua tibabai aiho.

47 Wai uahoꞌabami mo tubaonakia raninai,

emi namo hanona taba maearima baika herekiai?

Aꞌi tiaꞌikakauma haukia abomo ua tibabai aiho.

48 Ua buonai wai katobero harai ihobona Hamami kupai nemiaho hauna ebero harai ꞌabana.”