Hau Ha Atawana Kebakarahina.
19
Iesu ꞌabi weiakia ebaorenakia murinai,
Galilea ehabona eao Iuda hanonai Ioridana ate abihana tainai.
2 Mako rarina ꞌakina ia murinai teao weia ekia inawa ebanamonakia.
3 Weiana Parisea haukia baika temai Iesu herena tehobona tebakaina tetibaha,
“Hau ha ena raona baika buonai atawana kebakarahina hanona mai ena bero ha ꞌao ahaꞌi?”
4 Iesu ekia ꞌabi ebamuena etibaha,
“Wai Puka Robena aꞌi totuabina,
u?
Bahabana ꞌakinai barama Tiramana ehore maearima ebabainakia hau mai babiꞌe ohi.
5 Ba eꞌabi etibaha,
‘Weiana buonai hau kehore hamana mai hinana kehabonakia,
ia atawana ohi katebahamomo,
terarua hanona hauani hamona.’
6 Ua buonai ia hanona hamona ia rua ahaꞌi.
Weiana paunai Tirama ehore eba hamomonakia hauna hau ha aꞌi keboa ꞌapuana.”
7 Parisea haukia tebakai muena tetibaha,
“Aehoma buonai Mose ehinabenamai,
hau kenuatae raninai bakarahi marerena kererena atawana kebena ba kebakarahina?”
8 Iesu ekia ꞌabi ebamuena etibaha,
“Wai emi ao pahihi paukiai Mose bero ebenimi atawami katoba karahinakia,
ia popouna ꞌakinai hanona ua homana ahaꞌi.
9 Au wai nahinabenimi,
hau ha atawana aꞌi enabau ia ebakarahi ꞌabaeana ia haeamona babiꞌe mahamahana ha eatawana,
hau weiana hanona nabau hoana ebabaina.”
10 Iꞌabana haukia Iesu tehinabena tetibaha,
“Hau mai babiꞌe baiatakiai ua niho raninai,
hau aꞌi pehawainibe hanona penamo.”
11 Iesu ekia ꞌabi ebamuena etibaha,
“ꞌAbi naiana maearima ikoikiai herekiai hanona aꞌi ketaina,
ia weiakia Tirama eaꞌi taeanakia haukia herekiai hanona ketaina.
12 Maearima baika hanona aꞌi katehawainibe,
hau baika hanona uahomanai terama aꞌi katehawainibe,
hau baika hanona maearima tehore teuanakia aꞌi katehawainibe,
hau baika hanona Tirama ena obia aiarana paunai hawainibe aꞌi tiraonana.
Tai herenai etaina hauna ꞌabi neiana keaꞌi taeana.”
Iesu Miori Papakia Ebanamonakia.
13 Rani weianai maearima baika nahukia temaiainakia Iesu herena ahakiai kehaoꞌau kebahubaꞌari,
ia iꞌabana haukia tehore maearima weiakia terikenakia,
14 Iesu eꞌabi etibaha,
“Miori papakia tomo habonakia,
temai hereꞌu aꞌi kato kaiabunakia,
pokina Tirama ena obia aiarana hanona nahomakia haukia ꞌeukia.”
15 Iesu miori papakia ahakiai imana ehaoꞌau ebanamonakia,
murinai ꞌeka weiana ehabona.
Iesu Kepu Hauna ꞌAruꞌaruna Ohi Teꞌabiꞌabi.
16 Weiana hau ha emai Iesu herena ebakaina etibaha,
“Baꞌiobi haumu e,
aka namona tabana kababai hanona mauri banaibanai kaꞌina?”
17 Iesu ia ena ꞌabi ebamuena etibaha,
“Aehoma buonai au hereꞌuai aka namona nubakaibakai aina?
Weiana Tirama mo ikupaiana enamo,
oi konuatae mauri banaibanai koaꞌina raninai,
rauhubu ꞌabikia koꞌima harainakia.”
18 Ia eꞌabi etibaha,
“Rauhubu ꞌabikia aeakia?”
Iesu etibaha,
“Rauhubu neiakia,
aꞌi koahuahu,
aꞌi konabau,
aꞌi kobainao,
aꞌi kohinau baiꞌoi.
19 Hamamu mai hinamu komariki ainakia,
abomo heremu hauna koraonaꞌau aina matoha oi kipomu nuraonaꞌau ainiꞌo ꞌabana.”
20 Hau ꞌaruꞌaruna eꞌabi etibaha,
“Naiakia ikoikiai aba aꞌima harainakia,
ba taba akapu aina?”
21 Iesu ia ehinabena etibaha,
“Konuatae konamo harai kiꞌa baha raninai moao emu kohu ikoikiai kokawa kawainakia monikia uraru haukia kobenakia,
weiana emu kepu hanona aba waꞌa kupai koaꞌina,
ba komai muriꞌuai mokaꞌa.”
22 Hau ꞌaruꞌaruna aia weiana eona raninai aona earoꞌari ekaobo,
pokina ia herena kepu eboꞌo.
Kepu Haukia Kupa Katekatoto Hanona Kepahihi.
23 Ba Iesu iꞌabana haukia ehina benakia etibaha,
“ꞌAbi tohana au wai nahina benimi.
Kepu hauna Tirama ena obia aiaranai kekatoto hanona kepahihi kiꞌa baha.
24 Haeamona nahinabe muenimi.
Mahi atana Kamela kopi ererenai kekuri banai hanona epahihi,
ba kepu hauna Tirama ena obia aiaranai kekatoto hanona kepahihi kiꞌa baha.”
25 Iꞌabana haukia ꞌabi weiana teona raninai tetaꞌu taꞌu huri tebakai bakai tetibaha,
“Ba tai hanona mauri keaꞌina?”
26 Iesu eiha ꞌini ꞌininakia eꞌabi etibaha,
“Maearima herekiai neiana katebabaina hanona aꞌi ketaina,
ia Tirama herenai taba ikoikiai kebabai hanona ketaina.”
27 Ba Petero Iesu ebakaina etibaha,
“Ai taba ikoikiai tahabonakia oi mo murimuai ṯakaꞌa,
ba murimuai ṯakaꞌa hanona taba kataꞌina?”
28 Iesu ehina benakia etibaha,
“ꞌAbi tohana au wai nahina benimi.
Taba ikoikiai ekia mahamaha raninai,
au Maearima Nahuna eꞌu imiaꞌau nuabina ahanai kamiaꞌau aonai,
wai harauhaea rua muriꞌuai tukaꞌa haumi abomo imiaꞌau harau haea rua ahakiai katomiaꞌau,
Isaraela itubukia harau haea rua maearimakia kato bakainakia.
29 Hau ha au pauꞌuai ena itu ꞌao uahoꞌabana haibuna hamana hinana nahuna ꞌao ena hano kehabonakia hauna hanona hinabu hinabu ketabu ahi muena,
abomo mauri banai banai keaꞌina.
30 Ia boꞌokia teꞌuai haukia hanona murihai katetoto,
ba boꞌokia temurihai haukia hanona katetoto ꞌuai.”