Ha Atawana Aꞌi Kebakarahina.
10
Iesu ꞌeka weiana ehabona eao Iuda hanonai ekabanai eao Ioridana taina.
Maearima boꞌona temai Iesu herenai tetoꞌu mue,
haeamona ebaꞌiobinakia rani ikoinai nibabai ihobokia.
Mareko 10.1-31
2 Parisea haukia baika herena teao tehobona tetibaha,
“Eka rauhubuai hau ha atawana kebakarahina hanona mai ena bero,
ꞌao?”
3 Iesu ehina benakia etibaha,
“Mose ena rauhubuai hanona taba ṉa ehoma?”
4 Ia ena ꞌabi tebamuena tetibaha,
“Mose ena rauhubu eꞌabi,
hau ha atawana kebakarahina hanona marerena kererena keao babiꞌe herena,
ba babiꞌe kebakarahina.”
5 Iesu ehina benakia etibaha,
“Pokina emi ao pahihi paunai Mose rauhubu neiana ebenimi.
6 Ia Tirama hanopaka ebaramana raninai,
maearima ebabainakia hau mai babiꞌe.
7 Ua buonai hau hanona hamana hinana nihabonakia,
ia atawana ohi katemiaho haeamo.
8 Ia terarua hauanikia hanona hamona ꞌabana.
Ua buonai terarua hauanikia hanona hamona,
ia rua ahaꞌi.
9 Tirama ehore ebahamomonakia hauna maearima aꞌi katebapaꞌana.”
10 Teao itu ha aonai,
iꞌabana haukia hanona Iesu herenai ꞌabi weiana anina tebakai bakai muena.
11 Iesu ehina benakia etibaha,
“Hau ha atawana kebakarahina haeamona babiꞌe ha keatawa muena ia hanona nabau kiꞌa hauna.
12 Babiꞌe abomo atawana kehabona hau ha keatawana reꞌa ia hanona nabau kiꞌa babiꞌena.”
Iesu Miori Papakia Ebanamonakia.
13 Maearima baika nahukia teaoainakia Iesu herena ahakiai kehaoꞌau kebanamonakia,
ia iꞌabana haukia tehore tebatanakia.
14 Iesu babai weiana eihana raninai eopuere,
etibaha,
“Miori papakia naiakia tomohabonakia,
temai au hereꞌu,
aꞌi tomouꞌunakia,
pokina ṉahomakia hanona Tirama ena obia aiarana haukia.
15 ꞌAbi tohana au wai nahina benimi,
hau ha Tirama ena obia aiarana iaꞌinai miori papana ꞌabanai aꞌi keao raninai,
ia hanona aꞌi kekatoto ꞌapua.”
16 Weiana Iesu miori eaꞌinakia,
imana ahakiai ehaoꞌau ebanamonakia.
Kepu hauna.
17 Iesu taearai ekaꞌa eao aonai,
hau ha ebeau turina eao wairanai ekaipehu ebakaina etibaha,
“Baꞌiobi haumu namomu e,
au aea kahoma mauri banaibanai kaꞌina?”
18 Iesu ehore ehina bena etibaha,
“Taba buonai au namoꞌu ohinana?
Hau ha aꞌi enamo,
ia Tirama ikupaiana mo enamo.
19 Rauhubu aba oꞌiobina.
Aꞌi koahuahu,
aꞌi konabau,
aꞌi kobainao,
aꞌi kohinau baiꞌoi,
aꞌi kobaiꞌoi,
hamamu hinamu komariki ainakia.”
20 Hau weiana eꞌabi etibaha,
“Baꞌiobi haumu e,
rauhubu naiakia hanona koꞌikoꞌiꞌu raninai aꞌima harainakia emai mo bariu.”
21 Weiana Iesu ia eiha ꞌiniꞌinina mai raonaꞌauna ba eꞌabi etibaha,
“Taba hamona okapu aina hanona neiana,
emu kepu kokawa kawainakia,
monikia uraru haukia kobenakia weiana kupai ꞌaramu koaꞌina,
ba komai muriꞌuai kokaꞌa.”
22 ꞌAbi weiana eona raninai,
wairana ebirabira ekaobo mai ao haiarana,
pokina ia hanona kepu hauna.
Kepu haukia Kupa Katetoto Hanona Kepahihi.
23 Iesu eihao ihao,
iꞌabana haukia ehina benakia etibaha,
“Taba herekia teboꞌo haukia Tirama ena obia aiarana aonai katetoto hanona epahihi kiꞌa baha.”
24 Iꞌabana haukia ꞌabi weiana teona hanona tetaꞌu taꞌu huri,
haeamona ehinabe muenakia etibaha,
“Nahaꞌu e,
Tirama ena obia aiarana ikatotona hanona epahihi kiꞌa baha.
25 Kamela kopi ererenai kekuri banai hanona ketaina,
ꞌa obia hauna Tirama ena obia aiaranai ketoto hanona epahihi kiꞌa baha.”
26 Iꞌabana haukia tetaꞌu taꞌu huri,
kipokia baiatakiai teꞌabiꞌabi tetibaha,
“Tai hanona mauri keaꞌina?”
27 Iesu eiha ꞌiniꞌininakia,
ba etibaha,
“Taba ibabaikia maearima herekiai aꞌi ketaina,
ia Tirama herenai hanona etaina.
Pokina taba ikoikiai ibabaikia Tirama herenai hanona etaina.”
28 Weiana Petero ehore Iesu ehina bena etibaha,
“Ai hanona emai taba ikoikiai tahabonakia,
oi murimuai ṯakaꞌa.”
29 Iesu eꞌabi etibaha,
“ꞌAbi tohana au wai nahina benimi,
hau ha kehore au pauꞌuai ꞌao pou namona paunai ena itu,
uahoꞌabana,
haibuna,
hinana,
hamana,
nahuna,
ꞌao ena hano kehabonakia,
30 bariu rani neianai ia hanona taba boꞌokia keaꞌi,
ena itu,
uahoꞌabana,
haibuna,
hinana,
hamana,
nahuna ꞌao ena hano ikoikiai hinabu hinabu keaꞌi,
abomo kateba haiarana,
ba rani kemai aonai ia hanona mauri banaibanai keaꞌina.
31 Bariu boꞌokia ṯeꞌuai haukia hanona katemurihai,
ia ṯemurihai haukia hanona kateꞌuai.”
Iesu Ibaihaunai Ena ꞌAri Pouna Ehinana.
32 Taearai tekaꞌa Ierusalema teao aonai Iesu hanona eꞌuai iꞌabana haukia aokia earo ꞌari,
abomo murinai tekaꞌa haukia tetaꞌu,
weiana Iesu ehore iꞌabana haukia eapari parenakia,
herenai taba kerama hauna pouna wairakiai ehinana.
Mareko 10.32-52
33 Etibaha,
“Aika bariu nahakaraꞌau Ierusalemai weia hau ha au Maearima Nahuna hinahinaꞌu kehinahina Robe haukia mai Rauhubu poki haukia herekiai,
iahuꞌariꞌu ꞌabina katebatohana,
rama haeai haukia katebenakia.
34 Maearima weiakia au katebatae ainaꞌu kateꞌatotinaꞌu kateꞌatinaꞌu ba kateahu ꞌarinaꞌu,
ia wapu ibaihaunai kamikiri mue.”
Iakobo Mai Ioane Ekia Nuatae Ha Iesu Herenai.
35 Sebedeo nahuna rua Iakobo mai Ioane ohi temai Iesu herena,
tehina bena tetibaha,
“Baꞌiobi haumu e,
emai nuatae tabana ha heremu ai katanoiaina hanona kobabaina.”
36 Iesu eꞌabi etibaha,
“Taba ṯonuatae aina heremiai kababaina?”
37 Ia teꞌabi tetibaha,
“Emu nuabi koaꞌina raninai,
ai tararua ha oi itipamuai ha awarimuai patamiati.”
38 ꞌA Iesu ia ehina benakia etibaha,
“tunoiaina tabana hanona aꞌi ṯoꞌiobina.
Au kainu ꞌerena wai katoinu ketainimi?
Abomo au katebaꞌuere robenaꞌu ꞌuere robena wai katebaꞌuere robenimi ketaina?”
39 Terarua teꞌabi tetibaha,
“ꞌE,
ketainamai.”
Ba Iesu ehina benakia etibaha,
“Au kainu ꞌerena hanona wai abomimo katoinu,
abomo au katebaꞌuere robenaꞌu ꞌuere robena wai abomimo katebaꞌuere robenimi.
40 ꞌA itipaꞌuai mai awariꞌuai katemiati haukia hanona au aꞌi katinaꞌanakia.
Miati ꞌekakia weiakia hanona Tirama aba ebaꞌorunakia,
ia ena nuatae haukia mo ꞌeukia.”
41 Iꞌabana haukia harau haea ꞌuru weiana teona hanona Iakobo mai Ioane ohi teopuere ainakia.
42 Iesu eaparinakia temai herena ehina benakia etibaha,
“Wai toꞌiobina.
Rama haeai haukia ekia maearima tiobia ainakia,
ia hanona taburai maearima ṯeꞌuai ainakia,
haeamona ekia hiabuai maearima ṯeꞌimanakia.
43 ꞌA wai baiatamiai hanona ua homana ahaꞌi,
tai apaꞌua keraonana hauna hanona taꞌarami iaꞌinai keao.
44 Tai nenuatae keꞌuai hauna hanona wai ikoimiai taꞌarami iaꞌina haunai keao.
45 Pokina au Maearima Nahuna amai hanona taꞌaraꞌu aꞌi kateaꞌi,
ꞌa taꞌara kaꞌi paunai amai,
abonamo eꞌu mauri kabaibeni maearima boꞌona kakawanakia katemauri.”
Iesu Batimeo Mahana Ebanamonakia.
46 Ia Ierikoai tekaraꞌau.
Iesu haeamona iꞌabana haukia mai maearima boꞌona kipokia Ieriko tihabona,
taeara haianai maha kiꞌa hauna atana Batimeo (anina hanona Timeo nahuna) emiati weia enoi baꞌame.
47 Hau weiana Iesu Nasareta hauna atana tehinana ꞌuruna eona raninai,
beronai eapari etibaha,
“Iesu Davida nahuna e!
Moaokoꞌo ainaꞌu.”
48 Maearima tehore terikena ꞌuruna keahaꞌi,
ꞌa ia hanona eapari hao apari hao eapari ꞌaota etibaha,
“Davida nahuna e!
Moaokoꞌo ainaꞌu.”
49 Iesu ekoroti,
ehina benakia etibaha,
“Tomoaparina.”
Ua buonai ia tehore maha kiꞌa hauna tehina bena,
“Aomu menamo,
momikiri,
ia hanona oi niapariniꞌo.”
50 Beronai ena habuni iroꞌabuna eneꞌena,
emikiri ekaꞌa eao Iesu herena.
51 Iesu ia ebakaina etibaha,
“Taba nonuatae aina kababaina heremuai?”
Maha kiꞌa hauna eꞌabi etibaha,
“Baꞌiobi haumu e.
Nanuatae mahaꞌu pobanoꞌanakia.”
52 Iesu ehina bena etibaha,
“Moao,
emu aꞌikakauma ehore aba eba mauriniꞌo.”
Mahana aba tenoꞌa,
weiana Iesu murinai ekaꞌa.