ꞌAbi Ibabataina Bakai Hauna Mai Wapu.
18
Iesu iꞌabana haukia ꞌabi ibabatai ha ehinana kateraonana rani ikoinai kate bahubaꞌari ia aꞌi katehau hororo.
2 Etibaha,
“Aiara ha aonai bakai hauna ha emiaho,
ia Tirama aꞌi etaꞌu aina haeamona maearima aꞌi eraonanakia.
Luka 18:1-43
3 Aiara weiana aonai wapu ha abomo emiaho,
rani ikoinai eao bakai hauna herena enoina etibaha,
‘Mobarainaꞌu,
eꞌoatanaꞌu hauna herenai kobaberona.’
4 Rani ehomaꞌa bakai hauna hanona eubo taba ha aꞌi ebabaina,
muriai hanona kipona eꞌabi etibaha,
‘Au hanona Tirama aꞌi nataꞌu aina abomo maearima aꞌi naraonanakia.
5 Iamo wapu neiana nibaro ꞌarinaꞌu paunai ena bakai ibaberona akana mababaina,
aꞌi memue aꞌi mebaro ꞌarinaꞌu.’”
6 Obiapaka etibaha,
“Bakai hauna kiꞌa obona ena ꞌabi uruna tomoꞌona.
7 Tirama eaꞌi taeanakia haukia tiapari rabina tiapari ranina haukia ekia nuatae aꞌi kebaberonakia,
u?
Turaonana aꞌi kebarai noanoanakia, u?
8 Au wai nahina benimi,
Tirama kehore ekia nuatae kebabero noanoanakia.
Ia Maearima Nahuna kemai raninai hanopakai aꞌikakauma haukia aba ketabu ahinakia?
Ahaꞌi.”
Parisea Hauna Mai Takiti Aꞌi Hauna Tebahubaꞌari.
9 Abomo Iesu ꞌabi ibabatai neiana ehinana maearima weiakia kipokia ekia aka bero Tiapa ainakia haeamona maearima haeai ṯeiha hahanakia haukia herekia.
10 “Hau rua teao Marea Robe aonai katebahubaꞌari,
ha Parisea hauna ha moni bararo hauna.
11 Parisea hauna hanona ekoroti kipona ahanai ebahubaꞌari,
‘Tirama e,
au hanona oi nabanamoniꞌo,
pokina au hanona hau baika ꞌabakia ahaꞌi,
kakikaki haukia,
babai kiꞌa haukia,
nabau haukia ꞌao moni bararo hauna neiana ꞌabana ahaꞌi.
12 Au hui hamona aonai wapu rua ṉani robe,
abomo eꞌu tabu ahi ikoikiai harauhaea aonai hamomona nabaibeni oi ꞌeumu.’
13 ꞌA moni bararo hauna hanona atauꞌai ekoroti,
aꞌi eaꞌa taea kupa ia eraꞌu tiꞌou ekuti etibaha,
‘Tirama e,
moaokoꞌo ainaꞌu,
au hanona kiꞌa hauꞌu.’”
14 Iesu eꞌabi etibaha,
“Au wai nahina benimi,
moni bararo hauna hanona Tirama wairanai ebero ba ena itu eao,
ꞌa Parisea hauna hanona ahaꞌi.
Pokina kipona ebapaꞌuana hauna Tirama kehore kebaririna,
ꞌa kipona ebaririna hauna Tirama kehore kebapaꞌuana.”
Iesu Miori Papakia Ebanamonakia.
15 Maearima baika tehore nahukia papakia teaoainakia Iesu herena ahakiai kehaoꞌau,
ia iꞌabana haukia teihanakia aonai terikenakia.
16 Ia Iesu hanona miori papakia eaparinakia temai herena ba eꞌabi etibaha,
“Miori papakia hanona au hereꞌu temai aꞌi tomo kaiabunakia,
pokina Tirama ena obia aiarana hanona nahomakia haukia ꞌeukia.
17 ꞌAbi tohana au wai nahina benimi,
hau ha Tirama ena obia aiarana iaꞌina miori papana ꞌabanai aꞌi keao raninai,
ia hanona aꞌi kekatoto ꞌapua.”
Kepu Hauna Iesu Ohi Teꞌabiꞌabi.
18 Iuda haukia ekia poki hauna ha Iesu ebakaina etibaha,
“Baꞌiobi haumu namomu e,
au taba kababaina hanona mauri banai banai kaꞌina?”
19 Iesu eꞌabi etibaha,
“Taba buonai au namoꞌu ohinana,
tai ha aꞌi enamo Tirama mo ikupaiana.
20 Rauhubu aba oꞌiobina,
‘aꞌi konabau,
aꞌi koahu ahu,
aꞌi kobainao,
aꞌi kohinau baiꞌoi,
hamamu hinamu komariki ainakia.’”
21 Ia eꞌabi etibaha,
“Rauhubu naiakia hanona mioriꞌu ai raninai aꞌima harainakia emai mo bariu.”
22 Iesu aia weiana eona raninai ehina bena etibaha,
“Taba hamona okapu aina hanona neiana.
Emu taba ikoikiai kokawa kawa ainakia monikia uraru haukia kobenakia.
Weianai kupa kohuna koaꞌina,
ba komai muriꞌu ai kokaꞌa.”
23 ꞌA hau weiana ꞌabi eona raninai aona earoꞌari pokina ia hanona eobia kiꞌa baha.
24 Iesu hau weiana ena ao aroꞌari eihana ba eꞌabi etibaha,
“Herekiai kepu teboꞌo haukia Tirama ena obia aiaranai katekatoto hanona epahihi kiꞌa baha.
25 Herenai kepu teboꞌo hauna Tirama ena obia aiaranai kekatoto hanona epahihi kiꞌa baha ba kamela kopia ererenai kekuri banai.”
26 Aiana teona haukia tebakaina tetibaha,
“Ba tai hanona mauri keaꞌina?”
27 Iesu ekia ꞌabi ebamuena etibaha,
“Taba katebabaina maearima herekiai aꞌi ketaina hauna Tirama herenai hanona ketaina.”
28 Petero,
Iesu ehina bena etibaha,
“Ai hanona emai taba ikoikiai tahabonakia,
oi murimuai ṯakaꞌa.”
29 Iesu ehina benakia etibaha,
“ꞌAbi tohana mo au wai nahina benimi,
hau ha ena itu,
atawana,
uahoꞌabana,
hamana,
hinana ꞌao nahuna ehabonakia Tirama ena obia aiarana paunai,
30 ia hanona bariu rani neianai taba boꞌokia keaꞌi abomo wairanai rani kemai aonai hanona mauri banai banai keaꞌina.”
Rani Ibaihauna Iesu Ena ꞌAri Pouna Ehinana.
31 Iesu iꞌabana haukia harauhaea rua ebakaparenakia haia haiai ehina benakia etibaha,
“Aika hanona bariu kahakaraꞌau Ierusalema,
mahabanai haukia tererenakia haukia ikoikiai bariu Maearima Nahuna herenai katetoha.
32 Ia hanona rama haeai haukia imakiai kateutana,
katebapoꞌona,
kateba opuerena,
kateꞌatotina,
kateꞌatina,
mai kateahu ꞌarina.
33 ꞌA wapu ibaihaunai ia hanona kemikiri mue.”
34 Ia iꞌabana haukia taba neiakia obokia aꞌi teobo ꞌapua.
ꞌAbi weiana anina ebuni ia herekiai,
haeamona aꞌi teꞌiobina ia hanona ꞌabi tabana nehinana.
Iesu Maha Kiꞌa Hauna Mahana Ebanoꞌanakia.
35 Iesu Ieriko aiaranai aba kekaraꞌau aonai ꞌiau hauna ha taeara haianai emiati ninoi baꞌame,
36 maearima boꞌona tekaꞌa urukia eona,
ba ebakai bakai weiana taba nirama.
37 Tehina bena tetibaha,
“Iesu Nasareta hauna nikabanai.”
38 ꞌIau hauna eapari,
“Iesu Davida Nahuna e,
moaokoꞌo ainaꞌu!”
39 Maearima wairai tekaꞌa haukia terikena tetibaha,
“Oi ꞌurumu.”
ꞌA ia hanona eapari aota,
“Davida nahuna e,
moaokoꞌo ainaꞌu!”
40 Iesu ekoroti ehina benakia hau weiana katemaiaina herena.
Ia emai herena raninai Iesu ia ebakaina etibaha,
41 “Taba nonuatae oi heremuai kababaina?”
Ia eꞌabi etibaha,
“Obiapaka e,
au eꞌu nuatae kaiha iha.”
42 Iesu ia ehina bena etibaha,
“Mahamu temenoꞌa,
emu aꞌikakauma ehore ebanamoniꞌo.”
43 Beronai mo mahana tenoꞌa,
Tirama ebanamona,
Iesu murinai ekaꞌa,
maearima ikoinai teihana haukia abomo Tirama tebanamona.