Kebabehonakia Hauna Kekiꞌa Wairai.
17
Iesu iꞌabana haukia ehina benakia etibaha,
“Taba maearima kebabehonakia hanona aba timai,
ꞌa hau weiana maearima behoai nihorotinakia hauna kiꞌana.
2 Penamo ꞌakonai iata rarina patetoba ꞌauna ꞌakuai patekapo uhuna,
pokina papakia neiakia ha aꞌi meaꞌi kiꞌana.
3 Kipomi katoꞌima ꞌima harainimi,
uahoꞌabamu kiꞌa kebabaina raninai,
koao herena korobe haraina.
Ia keraona kabe raninai,
ena kiꞌa kohina hao.
4 Beraura hamonai rani ꞌabaihau hamomo heremuai kiꞌa kebabaina,
haeamona kemue heremuai rani ꞌabaihau hamomo keꞌabi ‘Au naraona kabe.’
raninai,
ena kiꞌa kohina haonakia.”
Taꞌaraꞌi Hauna Ena Aka.
5 Iuhubeau haukia Obiapaka tehina bena tetibaha,
“Emai aꞌikakauma pobapaꞌuanakia.”
6 Obiapaka ekia ꞌabi ebamuena etibaha,
“Pe wai emi aꞌikakauma matoha sinapi uhona papana ꞌabana raninai matiu rarina neiana patohina bena,
bariu mounu ꞌauniꞌo moao ꞌakuai moꞌomu hanona aiami peaꞌi taeana.
7 “Turaonana,
wai ha emu taꞌaraꞌi hauna ꞌani ꞌao mamoe ꞌima ꞌekanai pemai raninai,
pohina bena potibaha,
‘Omai biai momiati moaniani’?
8 Ahaꞌi,
ua aꞌi poꞌabi aiho,
ia poꞌabi,
‘Eꞌu aniani kokaiꞌauna kobaꞌoruna,
koaꞌiaꞌi harai koꞌimanaꞌu,
au kaniani eꞌu arera kainu kepua murinai,
ba oi koaniani emu arera koinu.’
9 Ehina bena akakia ebabainakia paunai ena taꞌaraꞌi hauna banamona kebena?
Ahaꞌi.
10 Ihobonai wai abomo ehina benimi akakia ikoikia tobaorenakia raninai katoꞌabi katotibaha,
‘Ai hanona taꞌaraꞌi ꞌabaeamai,
emai aka ohina benamai hauna mo tababai.’”
Iesu Morumoru Haukia Harau Haea Ebanamonakia.
11 Iesu taearai ekaꞌa eao Ierusalema aonai,
Samaria mai Galilea baihoakiai ekabanai.
12 Aiara papana ha ai ekatoto aonai,
morumoru haukia harauhaea kipokia tebaitabu ahi.
Ia atauꞌa tainai tekoroti,
13 Iesu teaparina teio aota tetibaha,
“Iesu poki haumu e,
moaokoꞌo ainamai.”
14 Iesu eihanakia raninai ehina benakia etibaha,
“Tomoao,
robe haukia herekia haumi katobaihanakia.”
Ba tiao herekia aonai hanona haukia tenamo.
15 Baiatakiai hau hamona hauna eihana aba enamo hanona emue emai Tirama ebanamona aiana ꞌubi tohanai.
16 Hau weiana Iesu wairanai ekai pehu ebanamona,
ia hanona Samaria hauna.
17 ꞌA Iesu ebakaina etibaha,
“Haumi harauhaea tonamo,
u?
Ia ꞌababani hamomo hanona aeꞌe?
18 Taba buonai rama haeai hauna neiana mo emue emai Tirama ebanamona?”
19 Iesu Samaria hauna ehina bena etibaha,
“Momikiri moao,
emu aꞌikakauma ehore aba ebamauriniꞌo.”
Tirama Ena Obia Aiarana Ena Mai Ranina.
(Mt 24.23-28, 37-41)
20 Parisea haukia baika Iesu tebakaina tetibaha,
“Tirama ena obia aiarana aita kemai?”
Ia ekia ꞌabi ebamuena etibaha,
“Tirama ena obia aiarana hanona matoha taba ha nahaihana hauna ꞌabanai aꞌi kemai.
21 Hau ha aꞌi ketibaha,
‘Moihana taba mo neiana’ ꞌao ‘taba mo weiana,’
pokina Tirama ena obia aiarana hanona wai aomiai.”
22 Iesu iꞌabana haukia ehina benakia etibaha,
“Rani hanona nimai,
emi nuatae Maearima Nahuna ena beraura ha hamona patoihana,
ia mo aꞌi katoihana.
23 Maearima baika katehina benimi katetibaha,
‘Tomoihana,
hauna neiana.’
ꞌao ‘Tomoihana,
hauna weiana.’
Ia aꞌi katoao,
murikiai aꞌi katokaꞌa.
24 Maearima Nahuna ena mai ranina hanona matoha kupa neꞌimare ꞌabana,
bariu mo kupa abiranai neꞌimare abamo niao kupa maikoina nibaeana.
25 Ia bariu kori ꞌuaina hanona katebahaiara kiꞌa baha,
abomo uru neiana haukia katebakiꞌana.
26 “Ihobona Noa ena raniai erama ꞌabana Maearima Nahuna ena raniai abomo ua kehoma.
27 Maearima hanona teani ani teinu inu hau mai babiꞌe tehawainibe eao mo Noa aunohi ai etoto,
abara etibo tou ekarahi maearima maikoina tetono ore.
28 Lota ena raniai abomo uahomana,
maearima hanona teani ani teinu inu tekawa kawa tebato bato mai itu terobe.
29 Rani weianai Lota Sodoma aiarana ehabona ekarahi murinai iruba mai pihara hiabukia kupa ꞌubinai teꞌeho,
maikoikiai tebaꞌari orenakia.
30 Maearima Nahuna kewaira tina ranina abomo ua kehoma.
31 “Rani weianai,
hau ha itu kapenai raninai ia aꞌi keriri itu aonai ena kohu aꞌi keaꞌi parenakia,
ihobonai mo hau ha umai raninai ia aꞌi kemue ena aiara.
32 Lota atawana katoraonana!
33 Hau ha nenuatae ena mauri keaꞌi ꞌinina hanona ena mauri kebaꞌakaumana,
ꞌa ena mauri keneꞌena raninai ena mauri keaꞌina.
34 “Au wai nahina benimi,
rabi weianai maearima rua ꞌire hamonai kateparua,
hamona keaꞌi taeana ꞌabana kehabona.
35 Babiꞌe rua ꞌeka hamonai witi ibaꞌiti ꞌitina piharana katebaherena,
ha keaꞌi taeana ꞌabana kehabona.
36 Hau rua umai kateaka,
ha keaꞌi taeana ꞌabana kehabona.”
37 Iꞌabana haukia tehore tebakaina tetibaha “Obiapaka e,
aeꞌeai?”
Obiapaka ekia ꞌabi ebamuena etibaha,
“ꞌAri tabakia aeꞌeai hanona poꞌi abomo weia titoꞌu.”