Tai Keapaꞌua?
18
Rani weianai iꞌabana haukia temai Iesu herena tebakaina tetibaha,
“Tai hanona eapaꞌua kiꞌa baha Tirama ena obia aiarana aonai?”
2 Weiana Iesu miori papana ha eaparina emai baiatakiai ebakorotina.
3 Ba ehina benakia etibaha,
“ꞌAbi tohana au wai nahina benimi,
aomi aꞌi katoba koꞌikoꞌina miori papakia ꞌabakiai aꞌi katoao raninai wai hanona Tirama ena obia aiaranai aꞌi katokatoto.
4 Ua buonai hau ha keꞌaiaunu miori papana neiana ꞌabanai keao hauna,
ia hanona keapaꞌua kiꞌa baha Tirama ena obia aiarana aonai.
5 Hau ha au ataꞌuai miori papana nahomana keaꞌi taeana hanona au aboꞌumo aba eaꞌi taeanaꞌu.
Baihobo Kebabaina Hauna Herenai Kekiꞌa Wairai.
6 Ia hau ha au tiaꞌikakaumanaꞌu miorina nahomana ha behoai kehorotina hauna hanona iata rarina ꞌakonai patetoba ꞌauna ꞌaku kunakunanai patekapo uhuna petono ꞌari hanona penamo.
7 Hanopaka neiana hanona kekiꞌa wairai,
pokina ia kehore maearima keaoainakia kiꞌai kehorotinakia.
Baihobo uahomakia hanona katerama,
ia baihobo kebabaina hauna herenai kekiꞌa wairai.
8 Imamu ꞌao aemu kiꞌai kehorotiniꞌo raninai kokabe hurina koneꞌe ꞌakaumana.
Ba imamu kiꞌa obonai ꞌao aemu kiꞌa obonai mauri banaibanai ꞌekanai kokatoto hanona enamo,
ia aꞌi enamo imamu rua mai aemu rua weiakia kateaoainiꞌo aꞌi niꞌao ꞌapua niꞌara banaibanai irubanai katekapo totoniꞌo.
9 Mahamu kiꞌai kehorotiniꞌo raninai koꞌipa ahina koneꞌe ꞌakaumana.
Mahamu hamonai mauri banaibanai ꞌekai kokatoto hanona enamo,
ia aꞌi enamo mahamu rua namokiai aꞌi niꞌao ꞌapua irubanai katekapo totoniꞌo.
ꞌAbi Ibabataina Mamoe Eꞌakauma.
10 Katoꞌimaꞌima harainimi miori papakia neiakia ha taba ahaꞌiai aꞌi katobaonakia,
pokina ekia aneru kupa ai hanona rani ikoinai Hamaꞌu kupai nemiaho hauna katehinabena ketaina.
11 Au maearima Nahuna hanona teꞌakauma haukia kabamaurinakia paunai amai.
12 Wai aea turaona aihona?
Hau ha ena mamoe hinabu hamomo,
ba hamona peꞌakauma raninai,
imabui bariabui ꞌababani hamomo oeoai pehobonakia ba peao eꞌakauma hauna petabuna.
13 ꞌAbi tohana au wai nahina benimi,
petabu ahina raninai,
aona penamo wairai weiana hamona etabu ahina hauna paunai ba weiakia imabui bariabui ꞌababani hamomo aꞌi teꞌakauma haukia paukiai ahaꞌi.
14 Weiana ihobonai Hamami kupai hauna nenuatae miori papakia neiakia ha aꞌi keꞌakauma.
Uahoꞌabamu Heremuai Beho Ebabaina Hauna Kobaberona.
15 Uahoꞌabamu kiꞌa ebabai heremuai raninai koao herena torarua mo katoꞌabiꞌabi aina ena babai kiꞌa haianai kohinahina haraina,
ba aiamu keaꞌi taeana raninai oi hanona uahoꞌabamu aba nuaꞌi muena.
16 Ia aiamu aꞌi keona raninai maearima ha ꞌao rua koaoainakia herena,
ba maearima weiakia rua ꞌao aihau ꞌabi katoꞌabiꞌabi ainakia haukia ikoikiai katebatohanakia.
17 Ia keubo aiami aꞌi keona raninai,
robe haukia aꞌiaꞌi harainai kohina karahina,
ba kebakiꞌa aiakia aꞌi keona raninai rama haeai haunai ꞌao kiꞌa haunai katobaona.
Ibiri ꞌIni, Mai Irubu Taꞌi.
18 ꞌAbi tohana au wai nahina benimi,
taba hanopakai katobirinakia hanona kupai abomo kebirinakia ꞌa taba hanopakai katorubunakia hanona kupai abomo kerubunakia.
19 Haeamona nahinabe muenimi,
hanopakai torarua taba ha aomi hamonai katonoi aina hauna Hamaꞌu kupai nemiaho hauna kebabaina ꞌeumi.
20 Maearima rua ꞌao aihau au ataꞌuai titoꞌu,
au hanona weia ia herekiai.”
ꞌAbi Ibabataina Taꞌaraꞌi Hauna Ena Kiꞌa Aꞌi Ehinahao.
21 Weiana Petero eao Iesu herena ebakaina etibaha,
“Obiapaka e,
uahoꞌabaꞌu kebabai kiꞌa hereꞌuai hanona rani bita ena kiꞌa kahina haona?
Rani ꞌabaihau hamomo,
ꞌu?”
22 Iesu eꞌabi etibaha,
“Rani ꞌabaihau hamomo ahaꞌi,
ia rani imabui haraurua ikoinai rani ꞌabaihau hamomo ꞌabana kohina haonakia.
23 Weiana Tirama ena obia aiarana hanona matoha obia arana ha ꞌabana,
ena taꞌaraꞌi haukia herenai taba bita teaꞌi haukia kebaberonakia.
24 Ua buonai ena aka eaꞌi ramana hanona ia herenai Kina kerepua harau haea eaꞌina hauna temaiaina ia wairanai.
25 Ia poki hauna ena moni ꞌarana kehorena hanona imanai aꞌi etaina,
ba poki hauna ia ehinabena etibaha,
‘Oi mai atawamu,
nahumu mai emu taba ikoikiai katekawa kawainakia monikiai moni oaꞌina hauna ꞌarana kohorena.’
26 Weiana taꞌaraꞌi hauna ena poki hauna wairanai ekai pehu ebaꞌamena,
‘Rani papana mobaiꞌima,
ba aꞌina hauna ꞌarana maikoina kahorena.’
27 Poki hauna taꞌaraꞌi hauna eaokoꞌoaina,
ba moni eaꞌina hauna ekakina ba euhuna ekaꞌa.
28 Ba taꞌaraꞌi hauna ekarahi eao raninai ꞌabana ha etabu ahina hau weiana hanona ia herenai Kina harau rua eaꞌina,
emikiri hau weiana eaꞌi ꞌinina ꞌakona ebebena eꞌabi etibaha,
‘Eꞌu moni oaꞌina hauna ꞌarana mohorena.’
29 Ba ia ꞌabana ekai pehu ebaꞌamena,
‘Rani papana mobaiꞌima ꞌarana aba kahorena.’
30 ꞌA ia aꞌi enuatae,
hau weiana eaoaina wapura ꞌekanai ehorotina weia kemiaho keaomo ꞌara kehore obona.
31 Taꞌaraꞌi haukia baika hoa weiana teihana raninai aokia ehaiara,
teao ekia poki hauna herena taba erama hauna pouna tehinana.
32 Ba poki hauna taꞌaraꞌi hauna weiana eaparina emai,
ehinabena etibaha,
‘Oi taꞌaraꞌi haumu kiꞌa obomu,
onoinaꞌu paunai moni oaꞌina hauna maikoina akakinakia.
33 Ia aehoma buonai ꞌabamu aꞌi oaokoꞌo aina ihobona au aokoꞌo ainiꞌo ꞌabana?’
34 Poki hauna eopuere kiꞌa taꞌaraꞌi hauna eba wapurana haiara katebahoaina keaomo moni weiana eaꞌina hauna ꞌarana maikoina kehore obona.
35 Weiana paunai wai ha ha uahoꞌabami aomi tohakiai ekia kiꞌa aꞌi katohina haonakia raninai Hamaꞌu kupai nemiaho hauna abomo ua kehomanimi.”