Ori Ibabataina Mamoe Ekaꞌa ꞌAkaumana.
15
Moni bararo haukia mai aka kiꞌa haukia ikoikiai temai Iesu herena aiana kateona.
2 ꞌA Parisea haukia mai Rauhubu poki haukia hanona teururu tetibaha,
“Hau neiana hanona aka kiꞌa haukia niaꞌi taeanakia mai kipokia ꞌeka hamonai tianiani.”
Luka 15:1-32
3 Weianai Iesu ehore ꞌabi ibabatai neiana ehinana ia herekiai eꞌabi etibaha,
4 “Hau ha wai baiatamiai ena mamoe hinabu hamomona.
Ia hamona peꞌakauma raninai,
imabui baria bui ꞌababani hamomo ꞌeka ꞌabaeanai pehabonakia,
ia weiana eꞌakauma hauna murinai peao petabuna petabu ahina.
5 Petabu ahina raninai aronai pebuana mai aonamona,
6 peaoaina ena aiara.
Ena hau mai herenai ṯemiaho haukia pebeaunakia,
patemai herena pehina benakia petibaha,
‘Hamaonamo haeamo,
pokina eꞌu mamoe eꞌakauma hauna aba atabu ahina.’
7 Au wai nahina benimi.
Ihobonai mo weia kupai aonamo keapaꞌua,
pokina neia kiꞌa hauna hamona eraona kabe paunai,
ia bero haukia weiakia imabui bariabui ꞌababani hamomo raona kabe aꞌi ṯenuatae aina haukia paukiai ahaꞌi.
Ori Ibabataina Koini Eꞌakauma.
8 “Babiꞌe ha ena Kina harau haea,
ba hamona pebaꞌakaumana raninai,
ramepa pebaꞌarana,
ena itu aona petarona,
ꞌeka maikoina peiha haraina peaomo petabu ahina.
9 Petabu ahina raninai,
ena hau mai herenai ṯemiaho haukia pebeaunakia,
patemai herena,
peꞌabi petibaha,
‘Hamaonamo,
pokina eꞌu koini hamona eꞌakauma hauna aba atabu ahina.’
10 Au wai nahina benimi.
Ihobonai mo,
kiꞌa hauna hamona keraona kabe raninai,
Tirama ena aneru wairakiai aonamo keapaꞌua.”
Ori Ibabataina Miori Ekaꞌa ꞌAkaumana.
11 Iesu haeamona etibaha,
“Hau ha nahuna rua.
12 Miori iꞌirina hamana ehina bena etibaha,
‘Hamaꞌu e,
emu kohu powatenakia,
au ꞌeuꞌu hanona kobenaꞌu.’
Weiana hamana ehore ena kohu ewatenakia terarua herekiai.
13 Wapu baika teao murinai,
miori iꞌirina ena taba eaꞌi aꞌi harai,
emikiri eao hanopaka haeai ha,
weia mauri kiꞌa obonai ena kohu epapurai ꞌabaeanakia.
14 Ena kohu ikoikiai ebaorenakia murinai,
hano weianai arobo rarina ekaraꞌau,
ia hanona aba neuraru.
15 Ba emikiri eao hano weiana hauna ha herenai emiaho,
hau weiana ehore euhuna eao aiporo ꞌima ꞌekanai aiporo eꞌimanakia.
16 Mareꞌa eꞌari buonai aiporo ekia aniani harua peani nuana keꞌini hauna eraonana,
ia tai ha aniani aꞌi ebena.
17 “Weiana ia eraona raona harai aonai etibaha,
‘Hamaꞌu hanona mai ena aka haukia teboꞌo,
mai ekia aniani harikia,
ꞌa au neia mareꞌa kebaꞌarinaꞌu.
18 Au kamikiri kaeao hamaꞌu herena kahina bena katibaha,
Hamaꞌu e,
Tirama wairanai mai oi wairamuai aba aka kiꞌa.
19 Nahumuai kaeao hanona aꞌi ketaina,
ia emu aka hauna ha ai kobaonaꞌu.’
20 Weiana emikiri keao hamana herena.
Taearai nikaꞌa oho aonai,
hamana atauꞌai mahana eao nahuna nimai eihana eaokoꞌo aina ebeau eao nahuna huanai eraꞌuna epauna.
21 ꞌA miori etibaha,
‘Hamaꞌu e,
Tirama wairanai mai oi wairamuai aba aka kiꞌa.
Nahumuai kobaonaꞌu hanona aꞌi ketaina.’
22 ꞌA hamana hanona ena taꞌara aꞌi haukia ehina benakia etibaha,
‘Tomoao,
habuni namoabuna ha tomaiai biaina katobabatotona,
imana kiriꞌunai rini ha katohorotina,
mai tamaka abomo ha aenai katobabaꞌauna.
23 Aniani poromakauna nahu namona ha katomaiaina katoahu ꞌarina,
kahatatu kahaonamo.
24 Pokina nahaꞌu neiana hanona eꞌari ia emauri mue,
eꞌakauma ia atabu ahi muena.’
Ba aonamo teaꞌi ramana.
25 “Beraura weianai hau pakana hanona uaꞌa umai.
Ena mueai,
eao itu herenai hanona hui mai ewa ꞌurukia eoꞌo.
26 Ba emikiri taꞌara aꞌi hauna ha eaparina ebakaina,
‘Weiana taba nirama?’
27 Taꞌara aꞌi hauna eꞌabi etibaha,
‘Oi hatimu aba emai,
hamamu ehore aniani poromakauna nahu namona ha eahu ꞌarina,
pokina ia hanona maurina abomo namona emue etabu ahina.’
28 Hau pakana aona eopuere,
ebakiꞌa aꞌi ekatoto.
Ba hamana ekarahi eao herena ebaꞌamena.
29 ꞌA ia hamana ehina bena etibaha,
‘Moihana!
Ihau neiakia ikoikiai au oi taꞌaramu aꞌi emu ꞌabi ha aꞌi abakiꞌana.
Ia oi nani nahu ha aꞌi obenaꞌu,
eꞌu hau kipokia aꞌi taonamo.
30 ꞌA nahumu naiana hanona rea babiꞌekia herekiai emu kohu ebaorenakia hauna,
emai aiara raninai omikiri aniani poromakauna nahu namona oahu ꞌarina ia ꞌeuna.’