Ori Ibabataina Kohu ꞌIma Hauna Kiꞌa Obona Ena Aotipa.
16
Iesu ehore iꞌabana haukia ehina benakia etibaha,
“Obia hauna ha mai ena kohu iꞌimana hauna ha,
ba maearima baika tehore tehinau aina ꞌima hauna hanona ena poki hauna ena kohu nipapura ainakia.
2 Ba obia hauna emikiri eaparina emai ehina bena etibaha,
‘Emu aka aonai hanona taba ha ꞌuruna aona,
emu baiꞌima akakia kobaꞌiobinaꞌu pokina oi eꞌu kohu iꞌimakiai hanona aꞌi ketaina.’
3 “Kohu ꞌima hauna aonai eꞌabi etibaha,
‘Au bariu aea kababai aiho?
Eꞌu poki hauna aka neianai aba kebaꞌokonaꞌu,
kaꞌani ia aꞌi mo atabura kanoi ia eꞌu haumaeamo eabu.
4 Au taeara ha aba naraonana aea kababai aiho.
Eꞌu akai keaꞌi obonaꞌu raninai eꞌu hau baika katehore kateaꞌi taeanaꞌu ekia ituai.’
5 Weiana ena poki hauna herenai teaꞌi ꞌabaea ꞌuai haukia ha ha eaparinakia.
Eꞌuai hauna ebakaina etibaha,
‘Oi eꞌu poki hauna herenai oaꞌi ꞌabaea hanona bita?’
6 Ia etibaha,
‘Tehoro puoukia hinabu hamomona.’
Ba ꞌima hauna ehina bena etibaha,
‘Oaꞌi ꞌabaea ꞌuai pepana neiana,
momiati,
naia pepai imabui korerena.’
7 Haeamona hau ibaruana ebakaina etibaha,
‘Oi oaꞌi ꞌabaea ꞌuai hanona bita?’
Ia etibaha,
‘Witi pute taha hamomona.’
Ia ehina bena etibaha,
‘Oaꞌi ꞌabaea ꞌuai,
pepana neiana,
momiati,
pepai hinabu ꞌababani korerena.’
8 “Poki hauna ehore ꞌima hauna ena baiꞌoi akana eaꞌi taeana,
pokina aka weiana mai aotipana ebabaina.
Bariu hanopaka neiana haukia ekia aotipa tehore ea haukia ekia aotipa tetara haonakia.
9 Au wai nahina benimi,
hanopaka ena obia tabakiai maearima kipokia katobaihau,
ba wai heremiai kekaobo raninai miaho banai banai itunai kateaꞌi taeanimi.
10 “Aka papana ha ebabai haraina hauna kehore aka apaꞌuana abomo kebabai haraina,
ba aka papana aꞌi ebabai haraina hauna kehore aka apaꞌuana abomo aꞌi kebabai haraina.
11 Hanopaka ena kohu kiꞌa obokia aꞌi katoꞌima harainakia raninai,
tai kehore kupa kohu namokia kebenimi katoꞌimanakia?
12 Maearima haeai ekia kohu aꞌi katoꞌima harainakia raninai,
tai kehore emi kohu tohakia kebenimi?
13 “Taꞌaraꞌi hauna ha poki rua taꞌarakia aꞌi keaꞌina,
pokina ha keꞌoatana ha keraonaꞌau aina,
ꞌa ha keꞌini bena ha kebaoaoaina.
Tirama mai kepu rani hamonai taꞌarakia aꞌi katoaꞌina.”
14 Parisea haukia aia weiana teona raninai Iesu tebatae aina,
pokina ia hanona moni ꞌarikia tiꞌari paunai.
15 Iesu ehina benakia etibaha,
“Wai hanona maearima wairakiai kipomi tobero ṉa tuho,
ꞌa Tirama hanona wai aomi eꞌiobinakia,
pokina maearima tiaonamo ai tabakia hanona Tirama nibaoao ainakia.
Rauhubu Mai Tirama Ena Obia Aiarana.
16 “Rauhubu ꞌabikia mai mahabanai haukia ekia ꞌabi hanona teiroro ainakia,
emai mo Ioane Baꞌuere Robe hauna ena raniai.
Weiana murinai hanona Tirama ena obia aiarana pouna namona ṯeiroro aina,
maearima ikoikiai taburakiai taeara tetabu katetoto.
17 Kupa mai hanopaka kate ꞌakauma hanona eꞌamaꞌama ia rauhubu ꞌabina puana papana ha aꞌi keꞌakauma ꞌapua.
18 “Hau ha atawana kebakarahina haeamona babiꞌe mahamahana ha eatawana hanona nabau hoana ebabaina.
Mai hau ha babiꞌe ibakarahi eatawana hauna abomo nabau hoana ebabaina.
Ori Ibabataina Obia Hauna Ha Mai Noi Baꞌame Hauna Lasaro.
19 “Kepu hauna ha weia habuni namoabukia ebatotonakia abomo rani ikoikiai aonamo tatukia ebabai.
20 Ena paꞌabi ꞌakonai hanona uraru hauna ha enoti atana Lasaro,
ia hauna etua tua obo,
21 ena nuatae hanona kepu hauna ena itara ai aniani puapuakia tiꞌeho haukia ha peani.
Waeha temai hauna tuakia tetemanakia.
22 “Rani emai aonai uraru hauna eꞌari hanona aneru teaoaina Aberahamo herenai.
Kepu hauna abomo eꞌari tehorena.
23 Kepu hauna ꞌari ꞌekanaia weia haiara rarina ꞌakina aonai emiaho,
eaꞌa taea atauꞌa ꞌakinai Aberahamo eihana,
Lasaro hanona ia herenai.
24 Ia eapari etibaha,
‘Hamaꞌu Aberahamo e,
moaokoꞌo ainaꞌu,
Lasaro mouhuna imana kiriꞌuna beiai mekaihuna emai maeaꞌu mebaꞌamarina,
pokina au hanona nahaiara kiꞌa baha iruba neiana aonai.’
25 “Ia Aberahamo eꞌabi etibaha,
‘Nahaꞌu e,
koraonana emu mauri beraurakiai oi hanona taba namokia oaꞌi ia Lasaro hanona taba kiꞌa obokia eaꞌi.
ꞌA bariu ia hanona niaonamo ia oi hanona nuhaiara.
26 Abonamo aika baiatakai hanona ꞌoura rarina ꞌakina ha nemiaho,
neia haukia ṉa aꞌi katewahi,
naia haukia abomo ha aꞌi kemai neia.’
27 “Kepu hauna eꞌabi etibaha,
‘Hamaꞌu Aberahamo e,
enamo,
nanoiniꞌo Lasaro mouhuna meao hamaꞌu ena itu.
28 Pokina au uahoꞌabaꞌu ima weia,
kebaꞌiobinakia ia abokiamo haiara ꞌekana neiana aꞌi tememai.’
29 Aberahamo eꞌabi etibaha,
‘Mose mai mahabanai haukia hanona weia ia herekiai aiakia temeona.’
30 ꞌA ia eꞌabi etibaha,
‘Ahaꞌi,
hamaꞌu Aberahamo e,
ia hau ha ꞌariai pemikiri peao herekia raninai aba kateraona kabe.’
31 “Aberahamo eꞌabi etibaha,
‘Weia Mose mai mahabanai haukia aiakia aꞌi tiona raninai,
neia ꞌari hauna ha keao hanona aiana abomo aꞌi kateona.’”