Pou namona neiana Ioane ererena aonai ebaihanaka, Iesu hanona Tirama ena ꞌabi banaibanai hauna, ia hanona maearima hauaninai emai haeamona maearima baiatakiai emiaho (1.14). Ioane ena nuatae hanona maearima Iesu kateaꞌikakaumana ia Tirama Nahuna, kateꞌiobina Iesu hanona Tirama eꞌabiꞌuai keuhuna kemai kebamaurinaka hauna. Ioane hanona eꞌiobina maearima Iesu tiaꞌikakaumana haukia hanona mauri banaibanai titabu ahina, ua buonai puka neiana ererena (20.31).

Koriꞌuaina hanona Ioane nehina benaka Iesu hanona Tirama ena ꞌAbi, ba bataꞌu taꞌu huri akakia ebabai robana eahuna. ꞌAbi tohana, maearima baika hanona Iesu teaꞌikakauma mai murinai teꞌau, iamo baika hanona ia iaꞌikakaumana teubo aina. Puka iroꞌana 13–17 aonai hanona iꞌoata haukia taearana titabu rabinai robana eahuna, Iesu hanona iꞌabana haukia kipokia temiaho, ia ehore baꞌiobi namokia ebenakia. Puanai hanona Iesu ꞌariai emikiri mue mai iꞌabana haukia ia teihana mai teaꞌikakaumana.

Taba hamona puka neiana aonai kahaiha toꞌona hanona ena hoahoa weiana maearima ekia mauri aonai tabakia niaꞌinakia ꞌabi ibabataikiai nibaonakia aꞌikakauma haukia rani ikoikiai katemauri ainakia, matoha bei, parawa, ea, bine buabuana, mamoe mai ꞌima hauna ꞌabakia.