Iesu ꞌAriai Emikiri Mue.
24
Hui beraurana kori ꞌuainai raurani ꞌamari ꞌamarinai babiꞌe muramura timikia namokia tebaꞌorunakia haukia teaꞌinakia ꞌariahana teao.
2 ꞌAriahana ikaiabuna piharana aba ehere pare atauꞌai teihana.
Luka 24:1-53
3 Ia ꞌariahana aonai tetoto raninai Iesu Obiapaka hauanina aꞌi teihana.
4 Weiana paunai tekoroti aokia earoꞌari aonai hau rua ekia habuni ꞌimare ꞌimarekia beronai herekia tekoroti.
5 Babiꞌe tetaꞌu kiꞌa tekuti wairakia ꞌano eao,
hau rua babiꞌe tebakainakia tetibaha,
“Taba buonai emauri hauna ꞌari haukia baiatakiai tutabuna.
6 Ia hanona neia ahaꞌi.
Ia aba emikiri mue!
Galileai emiaho oho aonai wai ehina benimi ꞌabina tomoraonana.
7 Etibaha,
‘Maearima Nahuna hanona kiꞌa haukia imakiai kateutana,
matiu ibiri ropo ꞌubiai kateahu ꞌarina haeamona wapu ibaihauna murinai kemikiri mue.’”
8 Weia ia Iesu ena ꞌabi teraona tinanakia.
9 ꞌAriahanai temue temai raninai taba neiakia ikoikiai iꞌabana haukia harauhaea hamomo mai harina baika herekiai tehinanakia.
10 Babiꞌe neiakia Maria Magadala babiꞌena,
Ioana,
Iakobo hinana Maria,
mai babiꞌe baika teꞌabanakia haukia kipokia pou neiana iuhubeau haukia herekia tehinana.
11 Iamo iuhubeau haukia babiꞌe ekia ꞌabi ori ꞌabaeanai tebaona buonai aꞌi tebatohana.
12 ꞌA Petero emikiri ebeau eao ꞌariahana.
Ekuti aona eribana teꞌapana habunikia mo weia kipokia tenoti ꞌabaea eihanakia,
emue ena itu eao aonai kipona aona earoꞌari taba weiana erama hauna paunai.
Iesu Emao Taearanai Ewaira Tina.
13 Rani weiana hamona aonai Iesu iꞌabana haukia rua tiao aiara ha atana Emao,
aiara weiana mai Ierusalema baiatakia ena homaꞌa hanona kilometa harauhaea hamomo ꞌabana.
14 Taearai tekaꞌa aonai taba neiakia ikoikiai terama haukia terarua baiatakiai teꞌabi ꞌabi ainakia.
15 Ba terarua teꞌabi ꞌabi mai terobahu aonai Iesu kipona emai herekia tekaꞌa oioi.
16 ꞌA maearimana teihana ia aꞌi teꞌiobina ia hanona Iesu.
17 Iesu ia ebakainakia etibaha,
“Wai torarua kaꞌamiai taba robana tuahuna?”
Terarua tekori ꞌororo wairakia mai birabirakia.
18 Ha weiana atana Kaleapa ebakai bakai etibaha,
“Ierusalema aonai oi paꞌe ikupaiamu mo taba rani murikai terama haukia aꞌi oꞌiobinakia?”
19 Ia ebakainakia etibaha,
“Aka tabakia?”
Hau rua tetibaha,
“Iesu Nasareta hauna pouna.
Ia hanona mahabanai hauna,
Tirama mai maearima ikoikiai wairakiai ena ꞌabi mai aka tehiabu wairai.
20 Robe haukia apaꞌuakia mai aiara haukia apaꞌuakia ia Roma haukia tebenakia matiu ibiri ropo ꞌubinai teahu ꞌarina.
21 ꞌA ai taraonana ia hanona aika Isaraela hauka kebamaurinaka hauna.
Haeamona taba neiakia terama wapu aihau teore.
22 Babiꞌe baika baiatamai ai tebataꞌu taꞌu hurinamai.
Ia raurani amarinai teao ꞌariahana hanona
23 Iesu hauanina aꞌi tetabu ahina temue temai teꞌabi aneru teihanakia abomo aneru weiakia ia tehina benakia,
‘Iesu hanona aba emauri mue.’
24 Ba ꞌabamai baika teao ꞌariahana teihana hanona babiꞌe teꞌabi ihobonai mo tetabu ahina,
ꞌa Iesu hauanina aꞌi teihana.”
25 Iesu ehina benakia etibaha,
“Hama ṉa topoꞌo aiho abomo mahabanai haukia taba tehina haukia ibatohakiai aomi temahari.
26 Keriso ṉa kehaiara aiho ꞌuai ba ena nuabi aonai ketoto,
weiana aꞌi ṯoꞌiobina,
u?”
27 Iesu hanona Mose mai mahabanai ekia rere rereai eaꞌi ramana Puka Robena aonai ia kipona ꞌabina maikoinai hau rua ebaꞌiobinakia.
28 Aiara tiao hauna aba herekiai ba Iesu hanona kekabero ṉa ehoma.
29 ꞌA terarua tebamuena teꞌabi tetibaha,
“Beraura aba kekaihuna abomo aba kerabi,
kipokia pahamiaho.”
Ba ia ekatoto kipokia katemiaho.
30 Weiana aniani ꞌekanai kipokia temiati raninai Iesu ehore parawa eaꞌina ebanamona ehobina terarua ebenakia.
31 Ba mahakia tenoꞌa aokia tea weia teꞌiobina ia hanona Iesu,
haeamona wairakiai eꞌakauma ꞌabaea.
32 Ia terarua kipokia teꞌabi tetibaha,
“Taearai ehina benaka abomo Puka Robena ꞌabikia ebaꞌiobinaka raninai matoha iruba aokai eara,
uhe?”
33 Terarua beronai temikiri temue Ierusalema teao,
iꞌabana haukia harauhaea hamomo ꞌabakia kipokia titoꞌu haukia tetabu ahinakia.
34 Ia hau rua tehina benakia tetibaha,
“Obiapaka hanona emikiri toha,
Simona herenai ewaira tina.”
35 Weiakia terarua taearai taba erama pouna abomo parawa ehobina aonai aokia ea Iesu teꞌiobina pouna tehinanakia.
Iesu Iꞌabana Haukia Iesu Teihana.
36 ꞌAbi weiakia tehina oho mo aonai Iesu tohana ia baiatakiai ekoroti abomo eꞌabi etibaha,
“Baibua wai heremiai!”
37 Ia ikoikiai tetaꞌukia mai ubo eaꞌinakia,
teraonana biriua teihana.
38 ꞌA Iesu ehina benakia etibaha,
“Ae homa buonai tutaꞌu mai aomi tikaiꞌau kaiꞌau.
39 Imaꞌu mai aeꞌu tomoihanakia tomoaꞌi hobonaꞌu tomoꞌiobinaꞌu,
Ṉahuna au tohaꞌu pokina auba hanona bitiona mai huriana ahaꞌi ia au hanona mai euꞌu.”
40 ꞌAbi weiana ehinana murinai imana mai aena ebaihanakia.
41 Ia teaonamo kiꞌa baha paunai Iesu aꞌi tebatoha bahana aokia raona raona ebonu buonai ia ebakainakia etibaha,
“Wai taba katoani hauna ha ṉaꞌa?”
42 Ia maia ha aba eawati hauna hana papana tebena.
43 Weiana ia eaꞌina wairakiai eana.
44 Ba Iesu ia ehina benakia etibaha,
“Au wai heremiai amiaho oho aonai taba robakia ahu haukia neiakia,
Au pouꞌu tererenakia Mose ena rauhubuai mahabanai haukia ekia rere rereai mai Salamo aonai haukia ikoikiai katetoha.”
45 Weiana aokia ebaeanakia Puka Robena obona kateobo.
46 Haeamona Iesu ia ehina benakia etibaha,
“Puka Robenai ṉa terere aihona.
Bamauri hauna hanona kehau haiara abomo ꞌariai kemikiri mue wapu ibaihaunai.
47 Ia atanai raona kabe mai kiꞌa ihina haokia poukia kateiroro ainakia Ierusalema ai kateaꞌi ramana keaomo hanopaka ikoikiai aokiai.
48 Wai hanona taba neiakia poukia ibatohakia haumi.
49 Aiaꞌu tomona.
Hamaꞌu Auba Robe eꞌuahi ꞌuaina hauna au kipoꞌu kauhuna kemai ahamiai,
ꞌa wai hanona Ierusalema aonai katobaiꞌima keao mo hiabu ꞌubiai kemai hauna katoaꞌina.”
Iesu Eaꞌitaeana Kupa Eao.