Iesu ꞌAriai Emikiri Mue.
20
Wapu koriꞌuaina Hui raurani wapuranai Maria Magadala babiꞌena eao ꞌariahana keihana,
mahana eao ꞌuri tekaiabuna piharana aba teaꞌi parena eihana.
2 Ia ebeau emue Simona Petero mai iꞌabana ha Iesu eraonaꞌau aina hauna herekia eꞌabi etibaha,
“Weiakia Obiapaka ꞌariahanai aba teaꞌi parena,
ai aꞌi taꞌiobina ꞌeka tabanai tehorotina.”
3 Weiana Petero mai iꞌabana hauna ha temikiri ꞌariahana teao.
4 Terarua tebeau haeamona teao ba ha ehore Pereto ebeau haona eꞌuai eao ꞌariahana.
5 Ia aꞌi etoto iamo ꞌuri ꞌakonai eriba toto,
habuni namokia ꞌanoai tenoti haukia eihanakia.
6 Simona Petero murihai ebeau emai beronai eao ꞌariahana ꞌurina aonai etoto,
habuni namokia tenoti haukia eihanakia.
7 Abomo habuni ha Iesu ꞌarana teꞌapana hauna hanona iou harai habuni namokia kipokia aꞌi tenoti haeamo,
ia ꞌeka haeai enoti.
8 Weiana aonai iꞌabana ha ꞌariahanai ekaraꞌau ꞌuai hauna etoto eao eihanakia ba eaꞌikakauma.
9 Iamo Puka robena ꞌabina ‘Ia hanona ꞌariai kemikiri mue’ hauna obona aꞌi tiobo baha.
Iesu Hanona Maria Magadala Herenai Ewaira Tina.
10 Ba iꞌabana haukia rua temue ekia itu teao.
11 Maria hanona ꞌariahana haianai ekoroti ehai,
ehai aonai eriba toto ꞌariahana aona eihana.
12 Weiana ia aneru rua habuni porekia tebatotonakia eihanakia,
Iesu hauanina tehorotina ꞌekanai temiati,
ha hanona aena tainai ha hanona ꞌarana tainai.
13 Ia tebakaina tetibaha,
“Babiꞌe e,
taba nuhai aina?”
Ia eꞌabi etibaha,
“Eꞌu Obiapaka aba teaꞌi parena,
ꞌekana aꞌi aꞌiobina aeꞌeai tehorotina.”
14 Ua eꞌabi aiho ba ekori kabe hanona Iesu weia ekoroti eihana,
ia aꞌi eꞌiobina weiana hanona Iesu.
15 Iesu ia ebakaina etibaha,
“Babiꞌe e,
taba nuhai aina?
Tai nutabuna?”
Maria eraonana ia hanona haharua iꞌimana hauna ha,
ba eꞌabi etibaha,
“Obiamu e,
oi ia oaoaina aeꞌeai ohorotina hanona au mobaꞌiobinaꞌu.
Ba au kaeao kaꞌina.”
16 Iesu eapari,
“Maria e!”
Maria ekori kabe,
Heberu maeanai eꞌabi etibaha,
“Raboni!”
(ꞌAbi neiana anina hanona ‘baꞌiobi haumu.’)
17 Iesu Maria ehina bena etibaha,
“Aꞌi koaꞌi ꞌininaꞌu,
pokina aꞌi nakaraꞌau baha hamaꞌu herena.
Ia koao ꞌuahoabaꞌu kohina benakia,
au hanona kakaraꞌau au hamaꞌu mai wai hamami abomo eꞌu Tirama mai emi Tirama herena kaeao.”
18 Weiana Maria Magadala babiꞌena eao iꞌabana haukia ehina benakia ia Obiapaka eihana,
haeamona Iesu ꞌabi ehinana haukia ia ehina benakia.
Iesu Iꞌabana Haukia Herekiai Ewaira Tina.
19 Rani weiana hamonai wapu koriꞌuaina Huiai beraura ekaihuna aonai,
iꞌabana haukia ikoinai ꞌeka hamonai tetoꞌuna,
itu paꞌabina tekaiabunakia,
pokina Iuda haukia apaꞌuakia tetaꞌu ainakia.
Ba Iesu eao baiatakiai ekoroti ehina benakia etibaha,
“Baibua heremiai kemiaho.”
Jesus appears to the disciples (Ioane 20:19-31)
20 ꞌAbi neiana ehinana murinai imana rua mai robuna ebaihanakia.
Iꞌabana haukia Obiapaka teihana buonai teaonamo kiꞌa.
21 Iesu haeamona ehina benakia etibaha,
“Baibua heremiai kemiaho.
Hamaꞌu au euhunaꞌu ihobonai,
au abomo wai nauhunimi.”
22 Ua eꞌabi aiho murinai maeabuna ebahi benakia,
eꞌabi etibaha,
“Wai Auba Robe tomoaꞌina.
23 Maearima ekia kiꞌa katohina hao raninai ekia kiꞌa hanona ihina haoai kateao,
ia ekia kiꞌa aꞌi katohina hao raninai ekia kiꞌa ihina hao ahaꞌi.”
Toma Iesu Eihana.
24 Iꞌabana haukia harau haea rua ha atana Toma,
tiaparina baiꞌapaea,
Iesu toꞌu weiana herekiai ewaira tina rabinai ia hanona weia baiatakiai ahaꞌi.
25 Iꞌabana haukia baika ia tehina bena tetibaha,
“Ai Obiapaka taihana.”
Ia Toma ehina benakia,
“Au ikoko maniꞌakia imanai haukia kaihanakia haeamona ia robunai imaꞌu katiu totona,
uahomana ahaꞌi raninai au hanona ia aꞌi kaꞌikakaumana.”
26 Wapu ꞌababani teao murinai iꞌabana haukia itu aonai tetoꞌu mue,
Toma abomo weia ia kipokia.
Paꞌabi tekaiabu ꞌinina.
Iamo Iesu hanona eao ia baiatakiai ekoroti eꞌabi etibaha,
“Baibua heremiai kemiaho.”
27 Ba ia Toma ehina bena etibaha,
“Imamu riuriuna emai imaꞌu neiana moaꞌi ꞌapuana,
abomo imamu emai robuꞌuai motiu totona,
weiana aomu aꞌi kekaiꞌau kaiꞌau ia koaꞌikakaumanaꞌu.”
28 Toma Iesu ena ꞌabi ebamuena etibaha,
“Oi hanona eꞌu Obiapaka,
au eꞌu Tirama!”
29 Iesu ia ehina bena etibaha,
“Aba oihanaꞌu buonai nuaꞌikakaumanaꞌu.
Ia weiakia aꞌi ṯeihanaꞌu iamo tiaꞌikakaumanaꞌu haukia hanona tenamo.”
Puka Neiana Ena Poki.