IUHUBEAU EKIA AKA
Puka Aona Irerena ꞌAbina
Puka neiana hanona Pou namona Luka ererena hauna murinai ererena. Puka neiana aonai kahaihana hanona Auba Robe ehore iuhubeau haukia taeara katekaꞌaina hauna ebaihanakia, weiana ia tehore Iesu pouna namona teiroro aina Ierusalemai mai Iudeai mai Samariai mai hanopaka puanai ꞌeka baika herekiai (1.8). Puka neiana hanona Keriso ena maearima toꞌukia robakia eahuna, weiana Iuda haukia kipokia baiatakiai eaꞌi ramana, ba eapaꞌua raninai, hanopaka maearima ekia aꞌikakaumai eao. Luka hanona Keriso ena mauri robana eahu haraina mai ia murinai teꞌau haukia abomo, weiana hanona Keriso ehore Tirama ena ꞌabiꞌuai abaꞌuainai Isaraela haukia ebenakia hauna maikoina ebatoha haraina.
Puka neianai taba apaꞌuana ha robana eahuna weiana hanona Auba Robe ena aka, ia eriri emai iuhubeau haukia herekiai, ba eꞌuai ainakia mai ebataburanakia. Taeara neianai Pou namona teaꞌi taeana, aꞌikakauma haukia ekia boꞌo hanona eapaꞌua. Puka neiana aonai hanona iuhubeau haukia boꞌona orikia, haeamona Petero mai Paulo ekia aka tebabai ꞌabikia hanona teboꞌo. Petero hanona iuhubeau hauna mai ia hanona Iesu eꞌabana. Iamo Paulo hanona uahomana ahaꞌi. Koriꞌuainai Paulo ebatabura Iesu ena maearima keaꞌi kiꞌanakia. Iamo Iesu ia eaparina aonai eraona kabe, ba taꞌaraꞌi haunai eao Iesu ena aka mo ebabainakia.
Puka Paipana Apaꞌuakia
a. Baꞌoru ꞌabi tohana ihina pou. (1.1-26)
1. Iesu ena ꞌabi mai ꞌabiꞌuai orekia. (1.1-14)
2. Iuda ꞌekana iaꞌina hauna ha iaꞌi taea. (1.15-26)
b. Ierusalemai ꞌabi tohana ihina pou. (2.1–8.3)
c. Iudea mai Samariai ꞌabi tohana ihina pou. (8.4–12.25)
d. Paulo ena aka maearima herekiai. (13.1–28.31)
1. Iroro akana harimana koriꞌuaina. (13.1–14.28)
2. Ierusalemai toꞌu ꞌabiꞌabina. (15.1-35)
3. Iroro akana harimana ibaruana. (15.36–18.22)
4. Iroro akana harimana ibaihauna. (18.23–21.16)
5. Paulo wapura hauna Ierusalemai, Kaisareai, mai Romai. (21.17–28.31)