Paulo ehore puka neiana ererena pokina ena nuatae hanona keao aꞌikakauma haukia toꞌukia baika Roma aiara apaꞌuanai haukia keihanakia. Ena nuatae hanona keao kipokia katemiaho ꞌapua ba keao Speini (15.23, 24). Puka neiana aonai Paulo ehore Keriso pouna namona ehina pou haraina, mai weiakia Iesu murinai tiꞌau haukia ekia mauri aea katehoma.

Koriꞌuainai hanona banamo ꞌabina aꞌikakauma haukia toꞌukia Romai ṯemiaho herekiai ehinana. Epua puka ꞌabina anina tohana ṉa ehina harai aihona, “pou namona aonai bero Tirama herenai emai hauna ewaira tina, kahaꞌi ramana aꞌikakaumai keaomo puana.” (1.17) Haeamona Paulo eꞌabi, maearima weiakia Iuda haukia ꞌao rama haeai haukia ikoikiai hanona kiꞌa haukia. Weiana Tirama ehore ia eaokoꞌoai kiꞌanakia, eapari muenakia Iesu Keriso kateaꞌikakaumana haukia hanona Tirama kehore ia kebamaurinakia.

Puka iroꞌana 5–8 aonai Paulo ehore Tirama ena rauhubu anina mai Auba Robe aꞌikakauma haukia ekia mauri aonai hauna robakia eahunakia. Iroꞌana 9–11 hanona Paulo kipona ena puma apaꞌuana ha robana eahuna, weiana Iuda haukia weiakia Tirama etinaꞌanakia ia ena maearimai kateao haukia boꞌona Iesu tekamuri aina. Haeamona rama haeai haukia hanona temai Iesu iꞌabana haukiai teao, iamo Iuda haukia hanona ahaꞌi. ꞌA Paulo ena aꞌikakauma hanona muriai Iuda haukia katemai Iesu ena maearimai kateao. Puka neiana aꞌenai hanona Paulo ehore hoahoa mai babai weiana aꞌikakauma haukia katekaꞌai haukia robakia eahuna.