Paulo Ena Marere Koriꞌuaina
KORINTO
Haukia Herekiai
Puka Aona Irerena ꞌAbina
Paulo ena raniai, Korinto hanona aiara apaꞌuana Akaia hanona aonai Helene ꞌekana. Paulo kipona hanona maearima koriꞌuaina Iesu pouna namona Korintoai eiroro, iamo ekaobo eao ꞌeka baika ena aka kebabaina aonai aꞌikakauma haukia baiatakiai atetua apaꞌuakia baika terama.
Ua buonai marere neiana ererena, herekiai kehina pou haraina mai ekia atetua abomo kebaberonakia. Ena taꞌu apaꞌuana hanona ekia aꞌikakaumai aꞌi temeꞌeho marikina, haeamona ekia hoahoa namokia hanona kiꞌa obokiai aꞌi temeao. Taeara namona weiana tehawainibe haukia katemauri aina hauna ehina pou haraina, haeamona weiana hanona taba apaꞌuana ba katebabaina hanona kenamo. Abomo Paulo niꞌabi, atetua neiakia maearima herekiai tirama pokina Auba Robe ekia mauri keꞌuai aina hanona aꞌi ṯenuatae paunai. Paulo niꞌabi, taeara namonai kahamiaho haeamo mai Auba Robe ena beruberu aꞌikakauma haukia herekiai hauna robakia eahu. Weiakia ꞌari haukia ekia mikiri mue robakia eahuna. Neiakia ikoinai hanona Korinto haukia ekia atetua tabakia. Paulo ehore ꞌabi namokia boꞌokia ebenakia weiana Tirama ena nuatae kateꞌiobina.
Puka neiana iroꞌana 13 aonai hanona Paulo ehore taearana namona weiana maearima iraonaꞌauaikia robana eahuna, weiana hanona Auba Robe ena ibeni tabana namona ibeni tabakia ikoikiai ꞌarakiai, ba Tirama kipona nihore ena maearima nibenakia.
Puka Paipana Apaꞌuakia
a. Roba iahu. (1.1-9)
b. Hoa horekia Tirama ena marea aonai. (1.10–4.21)
c. Nabau hoahoakia kiꞌa obokia mai itu maurina. (5.1–7.40)
d. Aꞌikakauma haukia mai kiꞌa haukia. (8.1–11.1)
e. Marea maurina mai kuti taearana. (11.2–14.40)
f. Keriso mai aꞌikakauma haukia ekia mikiri mue. (15.1-58)
g. Aꞌikakauma haukia ekia beruberu Iudea ꞌeukia. (16.1-4)
h. Paulo ena nuatae ꞌabina mai ꞌabi orekia. (16.5-24)