Paulo Ena Banamo ꞌAbikia.
16
Au wai nabaꞌiobinimi haibuka Foibe niwahi,
ia hanona Kenkrea aiara apaꞌuana Tirama ena marea ena akaa babiꞌena ha.
2 Nanoinimi Obiapaka atanai katoaꞌi taeana,
ihobona Tirama ena robe maearimakia tuaꞌi taeanakia ꞌabana,
abomo ena nuatae akanai hanona katobaraina,
pokina ia ehore maearima boꞌona ebarainakia,
au abomo ebarainaꞌu.
3 Eꞌu banamo Priskila mai Akula katobenakia,
ia hanona au kipokia Keriso Iesu ena aka tababaina haukia.
4 Terarua au pauꞌuai ekia mauri aꞌi teraonana.
Banamo ꞌabina nabenakia,
aumo ikupaiaꞌu ahaꞌi,
ia rama haeai haukia ekia Tirama ena marea haukia ikoikiai abomo banamo ꞌabina tebaibeni.
5 Eꞌu banamo terarua ekia ituai titoꞌu haukia weiakia Tirama ena marea haukia abomo katobenakia.
Eꞌu banamo eꞌu raonaꞌau hauna Epaineto katobena,
ia hanona Asia aonai hau koriꞌuaina ena mauri ebaibeni Keriso ꞌeuna.
6 Eꞌu banamo Maria katobena,
ia hanona wai paumiai aka apaꞌuana ebabaina.
7 Eꞌu banamo hatiaꞌaꞌu Androniko mai Iunia katobenakia,
ia terarua mai au kipokia wapura itunai tamiaho.
Iuhubeau haukia ia terarua teꞌiobi harainakia,
ia hanona Keriso teaꞌikakauma ꞌuaina ba au hanona muriai.
8 Eꞌu banamo Ampilia katobena,
Obiapaka aonai naraonaꞌau aina.
9 Abomo eꞌu banamo Urebano katobena,
taka haeamo Keriso aonai,
eꞌu raonaꞌau hauna Staku abomo eꞌu banamo katobena.
10 Abomo eꞌu banamo Apele katobena,
ia hana atetua terama ranikiai ena aꞌikakaumai ekori ꞌini Keriso aonai.
Eꞌu banamo Aristobulo ena itu haukia katobenakia.
11 Eꞌu banamo hatiaꞌaꞌu Herodiona katobena,
eꞌu banamo Nakiso ena itu haukia katobenakia,
ia hanona Obiapaka aonai haukia.
12 Eꞌu banamo Trupena mai Truposa katobenakia,
ia hanona Obiapaka paunai aka tebabai harai babiꞌekia.
Eꞌu banamo eꞌu raonaꞌau babiꞌena Peresi katobena,
ia hanona Obiapaka aonai aka rarina ꞌakina ebabaina.
13 Eꞌu banamo Obiapaka etinaꞌana hauna Rufo mai hinana ohi katobenakia,
ia hinana hanona au hinaꞌu ai eao.
14 Eꞌu banamo Asunukrito,
Pilegon,
Hereme,
Patroba,
Herema mai kipokia ṯemiaho haeamo haukia katobenakia.
15 Eꞌu banamo Pilologo,
Iulia,
Nerea haibuna ohi abomo Olumupa mai Tirama ena robe maearimakia ikoikiai ia kipokia ṯemiaho haeamo haukia katobenakia.
16 Ha ha baipau robenai kipomi katobanamonimi.
Keriso ena marea maearimakia ikoikiai ekia banamo tetiu ahina heremi.
Baraona ꞌIni ꞌAbina Orena Ebenakia.
17 Uahoꞌabaꞌu e,
nabahi ahinimi,
hoa hore abomo emi aꞌikakauma tiaꞌi kiꞌana haukia mai ꞌiobi weiana toaꞌina hauna tiꞌoatana haukia katoiha ꞌininakia,
abomo herekiai katokapare.
18 Pokina maearima uahomakia haukia hanona Keriso aika eka Obiapaka ena aka aꞌi tibabaina,
ꞌa kipokia ekia nuatae akakia tibabai,
ekia ꞌabi namokiai abomo bahao rea ꞌabiꞌabikiai maearima weiakia kiꞌa herenai ekia ꞌiobi ahaꞌi haukia tibahao reanakia.
19 Wai pou namona aiana tukaꞌaina hanona maearima ikoikiai pouna aba teona,
weiana buonai au hanona wai naonamo ainimi.
Au nanuatae wai hanona taba namokia herekiai katoaotipa,
ia taba kiꞌa obokia ibabaikiai aꞌi katoraonana.
20 Baibua Tiramana kehore rani aꞌi kehomaꞌa Satani aba kehe amataina wai ꞌapumi baꞌakiai.
Au nabahubaꞌari,
aika eka Obiapaka Iesu ena aokoꞌo hoana heremiai kemiaho.
Aꞌikakauma Haukia Baika Ekia Banamo ꞌAbikia.
21 Timoteo,
au tararua taka haeamo hauna mai hatiaꞌaꞌu Luka,
Iason,
Sosipatro ekia banamo ṯetiu ahina heremi ai.
22 Au,
Teretio,
Paulo ehina ꞌabikia marere neianai arerenakia hauꞌu aboꞌumo Obiapaka atanai nabanamonimi.
23 Gaio ia herenai namiaho,
neia ena ituai Tirama ena marea maearimamai ṯatoꞌu haumai nibarainamai mai aonamomai ṯamiaho,
ena banamo netiu ahina heremi,
aiara apaꞌuana monina neꞌimana hauna Erasto mai uahoꞌabaka Koato terarua ekia banamo abomo tetiu ahinakia heremi.
24 Au nabahubaꞌari,
eka Obiapaka Iesu Keriso ena aokoꞌo hoana hanona ikoimiai heremiai kemiaho.
Amen.
Tirama Kahabanamona.
25 Tirama kahabanamona,
ia hanona mai taburana kebakori ꞌininimi emi aꞌikakaumai,
Iesu Keriso pouna namona nairoro aina hauna taearanai,
mai ꞌabi tohana bunina ꞌuainai rani homaꞌana tebunina hauna ebawaira tinana taearanai.
26 ꞌA bariu ꞌabi tohana weiana hanona miaho banai banai Tiramana ena ꞌabiai mahabanai haukia ekia rere rere aonai ewaira tina,
maearima ikoikiai ꞌabi tohana weiana tebaꞌiobinakia,
ua buonai hanopaka ikoikiai Tirama kate aꞌikakaumana abomo aiana katekaꞌaina.
27 Aobero Tiramana hamo hamona kahabanamona Iesu Keriso paunai Ia nuabina kemiaho banai banai!
Amen.