Kipoka Aꞌi Kahabaonamonaka ꞌAbaka Kahabarainakia.
15
Aika aꞌikakaumai hatabura hauka hanona aꞌikakaumai teꞌabeꞌabe haukia ekia puma kahabuana.
Aika kipoka eka aonamo mo aꞌi kahatabu.
2 Ha ha hereka haukia kahaba aonamonakia kipokia ekia namo paunai,
weiana kehore ekia aꞌikakauma kebataburana.
3 Pokina Keriso abomo kipona ena aonamo mo aꞌi etabuna.
Puka Robenai tererena ihobona etibaha,
“Bapoꞌo poꞌo ꞌabikia oi
tebapoꞌo ainiꞌo haukia
au abomo tebapoꞌo ainaꞌu.” Sal 69.9
4 ꞌUainai terere tabakia hanona aika ibamarereka paunai tererenakia,
weiana Puka robena kahatuabina hanona aika bakiro mai tabura kebenaka keaomo nuatae apaꞌuana kahatabu ahina.
5 Au nabahubaꞌari bakiro mai batabura nibaibeni Tiramana kehore Keriso Iesu murinai katokaꞌa raninai aomi keba hamomonakia.
6 Ba ikoimiai mai aomi hamona abomo aia hamonai Tirama aika eka Obiapaka Iesu Keriso Hamana katobanamona.
Pouna Namona Rama Haeai Haukia Herekiai Abomo Teihobo.
7 Ua buonai ꞌabami katoaꞌi taeanakia ihobona Keriso eaꞌi taeanimi ꞌabana,
babai weianai Tirama kahabanamona.
8 Au wai nahina benimi,
Keriso hanona Tirama ena ꞌabi tohana paunai Iuda haukiaa ekia taꞌara iaꞌina haunai eao,
Tirama ena ꞌabi ꞌuai ꞌabaꞌabakia herekiai haukia ibatohakia paunai,
9 abomo rama haeai haukia Tirama katebanamona ena aokoꞌo paunai.
Puka robenai tererena Davida eꞌabi ihobona,
“Ua buonai rama haeai haukia
baiatakiai kabanamoniꞌo,
abomo Oi atamu kahui aina.” Sal 18.49
10 Haeamona Mose eꞌabi etibaha,
“Rama haeai haumi e,
Tirama ena maearima kipokia
katoaonamo haeamo.” Deu 32.43
11 Haeamona Davida eꞌabi etibaha,
“Rama haeai haumi ikoimiai,
Obiapaka katobanamona.
Abomo maearima ikoimiai,
ia katohui aina.” Sal 117.1
12 Haeamona Isaia eꞌabi,
“Iese ena rama nininai
hau ha kewaira tina,
rama haeai haukia kepoki ainakia.
Rama haeai haukia katehore
ia ikupaiana katenuataeai
apaꞌuana.” Isa 11.10
13 Au nabahubaꞌari,
nuatae apaꞌuana nibaibeni Tiramana kehore emi aꞌikakaumai aonamo mai baibua ikoinai kebabonunimi.
Weiana Auba Robe hiabunai emi nuatae keba apaꞌuana rani ikoinai.
Paulo Rama Haeai Haukia Ekia Aka Haunai Eao.
14 Uahoꞌabaꞌu e,
au aꞌiobi haraina wai hanona emi hoa namokia teboꞌo,
mai ikoimiai hanona aꞌikakauma taearana toꞌiobi haraina buonai,
kipomi ha ha katobaꞌiobinimi hanona ketaina.
15 Ia marere neiana aonai taba baika mai taburaꞌu arere benimi hanona wai ibaraonami,
neiana hanona Tirama ena aokoꞌo hoana ebenaꞌu paunai.
16 Au hanona Keriso Iesu ena taꞌara aꞌi hauꞌu ai aeao rama haeai haukia ꞌeukiai,
kaka matoha robe hauꞌu Tirama ena pou namona kairoro aina,
weiana Auba Robe ena barobe hiabunai rama haeai haukia hanona baibeni tabakiai kateao Tirama keaꞌi taeanakia.
17 Ua buonai Tirama ena aka nababaina hanona ṉapa Keriso Iesu aonai.
18 Au ꞌabi haeai haeai aꞌi kahinanakia,
ia ꞌabi hamonamo kahinana,
Keriso au ebarainaꞌu kairoro mai kaka rama haeai haukia herekiai kamaiainakia Tirama herena aiana katekaꞌaina hauna mo,
19 au eꞌu aka weiana aonai Auba robe hiabunai hoa mai babai hiabukia tewaira tina.
Weiana Ierusalemai akakaiaro aeao mo Iluriko ꞌeka maikoina Keriso pouna namona airoroai orena.
20 Rani ikoinai eꞌu raona apaꞌuana hanona neiana,
pou namona kairoro aina Keriso atana aꞌi teꞌiobina ꞌekakiai.
Weiana hanona hau ha ena hoboro ebakorina hauna ahanai eꞌu itu aꞌi mabakorina paunai.
21 Puka robenai tererena ihobona etibaha,
“Pouna aꞌi teona haukia
hanona kateihana,
abomo aiana
aꞌi teona haukia hanona
kateꞌiobina.” Isa 52.15
Paulo Eraonana Keao Roma.
22 Aka weiana ehore rani boꞌokia ebaꞌoronaꞌu buonai,
aꞌi awahi heremi.
23 ꞌA bariu ꞌeka neianai eꞌu aka aba abaorenakia,
abomo ihau boꞌona anuatae kawahi kaihanimi.
24 Ua buonai au nanuatae kakabanai Speini kaeao raninai kaihanimi,
mai aonamoꞌu wai kipokia kahamiaho rani papana,
murinai katobarainaꞌu kaeao weia.
25 Ia au bariu Ierusalema naeao Tirama ena maearima weia ṯemiaho haukia ibaraikia paunai.
26 Pokina Tirama ena marea maearimakia weiakia Makedonia mai Akaia hanokia haukia kipokia ekia nuataeai beruberu tabakia tebararo Tirama ena robe maearimakia Ierusalemai ṯeuraru haukia ꞌeukia.
27 Ia aka weiana tebabaina mai aonamokia.
Ia ua tebabai aiho hanona ebero.
Pokina Iuda haukia aubakia ena banamo rama haeai haukia kipokia tewatena buonai rama haeai haukia hauani ena banamo tabakia baika Iuda haukia Keriso tiaꞌikakaumana haukia katebenakia hanona ebero.
28 Aka neiana kabaorena,
moni tebararona hauna kipoꞌu kaeaoaina Ierusalema haukia kabenakia murinai,
kawahi kaihanimi ba Speini kaeao.
29 Au naꞌiobina,
kawahi heremi raninai Keriso ena banamo maikoinai kawahi aina.
30 Uahoꞌabaꞌu e,
eka Obiapaka Iesu Keriso paunai abomo raonaꞌau weiana Auba robe ebenaka hauna paunai nanoinimi,
emi bahubaꞌari ai kipokia kahabahamomo Tirama katonoina au pauꞌu ai.
31 Emi bahubaꞌari ai Tirama katonoina Iudea aonai Iesu Keriso aꞌi tiaꞌikakaumana haukia imakiai kebamaurinaꞌu,
abomo Tirama ena maearima weia Ierusalemai ṯemiaho haukia eꞌu aka neiana kateaꞌi taeana mai aonamokia.
32 Uahomana raninai Tirama ena nuataeai kawahi heremi mai aonamoꞌu,
abomo kipokia kahabatabura haeamonaka.
33 Baibua nibaibeni Tiramana ikoimiai heremiai kemiaho.
Amen.