Uahoꞌabami Puma Aꞌi Katobena.
14
Hau ha ena aꞌikakauma eꞌabeꞌabe hauna katoaꞌi taeana,
ia ena raonaraona weiana hauna aꞌi katoꞌabi baitaeai aina.
2 Hau ha mai ena aꞌikakauma taba ikoikiai niani,
ia ha ena aꞌikakauma eꞌabeꞌabe hauna uma tabakia mo niani.
3 Taba ikoikiai niani hauna aꞌi niani hauna herenai aꞌi keaꞌi kiꞌana abomo uma anianikia mo niani hauna taba ikoikiai niani hauna aꞌi keꞌuahina,
pokina Tirama ehore ia terarua aba eaꞌi taeanakia.
4 Oi hanona tai,
hau ha ena taꞌara aꞌi hauna noꞌuahina?
Ia kekori ꞌini ꞌao keꞌeho reꞌa weiana hanona poki hauna ena hiabu.
Ia hanona kekori ꞌini pokina Obiapaka hanona mai hiabuna kebakori ꞌinina.
5 Hau ha niraonana beraura ha hanona etara ahi ba beraura baika,
mai hau ha niraonana beraura ikoikiai hanona ihobo.
Ha ha kipokia ekia raona raona katebakori harainakia.
6 Hau neiana niraonana beraura ha eapaꞌua Obiapaka paunai,
hau weiana taba ikoikiai niani Obiapaka paunai,
pokina kateaniani raninai Tirama tibanamo ꞌuaina.
Mai hau ha Obiapaka paunai aniani baika nibakiꞌanakia,
ia abomo Tirama nibanamona.
7 Pokina aika baiatakai hau ha aꞌi nimauri ia kipona paunai,
abomo hau ha aꞌi niꞌari ia kipona paunai.
8 Nahamauri hanona Obiapaka paunai nahamauri abomo kahaꞌari hanona Obiapaka paunai kahaꞌari.
Ua buonai kahamauri ꞌao kahaꞌari reꞌa aika hanona Obiapaka ꞌeuna.
9 Neiana buonai Keriso eꞌari abomo emauri mue,
ꞌari mai mauri haukia ekia Obiapakai keao.
10 ꞌA oi aehoma buonai uahoꞌabamu behoai nuhorotina?
Aehoma buonai nuaꞌi kiꞌana?
Aika ikoikai hanona Tirama wairanai ena bakai ꞌekanai kahakoroti.
11 Puka robenai tererena ihobona,
“Obiapaka niꞌabi;
Au namauri toha buonai,
maearima ikoikiai au wairaꞌu ai
katekaipehu,
abomo maearima
ikoikiai pinakiai katehina
pounaꞌu Au hanona Tirama.” Isa 45.23
12 Ua buonai aika ikoikai ha ha Tirama wairanai kipoka pouka kahahina.
Uahoꞌabami Aꞌi Katobaꞌehona.
13 Ua buonai aika ha ha kipoka behoai aꞌi kahahorotinaka.
Abomo uahoꞌabaka iaꞌi kiꞌana ꞌao ibaꞌehona kiꞌa aonai raonana aꞌi kaharaonana.
14 Au Obiapaka Iesu aonai aꞌiobina abomo nabatohana aniani tabakia ha kipona aꞌi ekiꞌa Tirama wairanai,
ꞌa hau ha niraonana aniani tabana ha ekiꞌa raninai aniani weiana hanona ekiꞌa ia kipona herenai.
15 Ia emu aniani tabana buonai uahoꞌabamu aona nubahaiarana raninai,
oi hanona raonaꞌau taearanai aꞌi nukaꞌa.
Uahoꞌabamu weiana paunai Keriso eꞌari hauna emu aniani koana hauna buonai aꞌi moaꞌi kiꞌana.
16 Ua buonai nuraonana hoahoa oi heremuai enamo hauna koꞌima haraina kiꞌa obona aꞌi temehinana.
17 Pokina Tirama ena obia aiarana hanona aniani mai inuinu tabana ahaꞌi,
ia bero,
baibua mai aonamo,
weiakia hanona Auba Robe nimaiainakia.
18 Hau ha taeara neiakiai Keriso taꞌarana niaꞌi hauna hanona Tirama ia niaonamo aina maearima abomo ena namo tibatohana.
19 Ua buonai rani ikoinai mai taburaka baibua taearakia kahatabu,
abomo ha ha kahaba taburanaka.
20 Aniani paunai Tirama ena aka aꞌi koaꞌi kiꞌana.
Aniani ikoikiai hanona tenamo,
iamo oi aniani tabana ha nuana paunai ꞌabamu kiꞌa aonai ketoto raninai kiꞌa hanona oi heremuai.
21 Uahoꞌabamu aona ibaroꞌarina akana aꞌi kobabaina hanona enamo,
mahi weiakia aꞌi koani aꞌi koinu ꞌari.
22 Ua buonai raona neiakia emu aꞌikakaumai koꞌima harainakia Tirama mai oi torarua baiatamiai.
Hau ha taba ha kipona niraonana ebero hauna nibabaina aonai,
aka weiana paunai aona aꞌi kearoꞌari hauna hanona enamo.
23 ꞌA aona mai kaiꞌau kaiꞌauna nianiani hauna hanona Tirama ia puma nibena,
pokina aniani weiana aonai ia aꞌi niaꞌikakauma paunai.
Aꞌikakaumai aꞌi tibabainakia tabakia ikoikiai hanona tekiꞌa.