Aika Kabamani Ena Hiabu Baꞌanai Kahamiaho.
13
Maearima ikoikiai hanona tipoki ainakia haukia aiakia kateaꞌi taeanakia.
Pokina poki hanona kipona aꞌi erama ia Tirama herenai emai,
poki haukia ikoikiai hanona Tirama ehore ebakorinakia.
2 Weiana hau ha poki hauna niꞌoatana hanona ihobona mo Tirama ebakorina hauna niꞌoatana,
baiꞌoata akana nibabaina hauna hanona kipona ena puma ketabu ahina.
3 Pokina aka namona tibabaina haukia hanona poki haukia aꞌi titaꞌu ainakia,
ia beho babai haukia mo.
Oi nonuatae poki hauna aꞌi kotaꞌu aina?
Ua homana reꞌa aka namokia kobabai,
ba ia kehore oi kebanamoniꞌo.
4 Ia hanona Tirama ena taꞌara aꞌi hauna emu namo akana nibabaina.
ꞌA pobabai kiꞌa hanona ia potaꞌu aina.
Pokina ia hanona tare aꞌi eaꞌi ꞌabaeana.
Ia hanona Tirama ena taꞌara aꞌi hauna babai kiꞌa haukia ꞌarakia kebenakia.
5 Ua buonai poki haukia aiakia kahaona,
puma herenai kahakapare paunai mo ahaꞌi,
ia raona bero paunai abomo.
6 Ua buonai wai abomo takiti monina tubaibeni,
pokina ia hanona Tirama ena taꞌara aꞌi haukia,
rani ikoinai barai barai akana neiana tibabaina.
7 Taba katobaibeni Kabamani herekiai haukia kato benakia.
Moni bararo haeai haeai haukia katobaibeni,
titaꞌu aina hauna katotaꞌu aina,
timariki aina hauna katomariki aina.
ꞌAbami ꞌArikia Katoꞌari Toha.
8 Hau ha herenai taba ha aꞌi koaꞌi ꞌabaea ꞌuaina,
ia taba kahababai toꞌo baihana hauna hanona ha ha kaharaonaꞌau ainaka.
Herena hauna niraonaꞌau aina hauna hanona rauhubu aba nikaꞌai haraina.
9 Rauhubu neiakia,
‘Aꞌi konabau kiꞌa,
aꞌi koahuahu,
aꞌi kobainao,
abomo hau ha ena taba aꞌi konuataeai ꞌabaeana’ mai rauhubu baika kipokia teba hamomonakia hanona ꞌabina apaꞌuana hamona neiana,
‘Heremu hauna koraonaꞌau aina ihobona kipomu nuraonaꞌau ainiꞌo ꞌabana.’
10 Hau ha mai ena raonaꞌau hauna nihore herena hauna aꞌi niaꞌi kiꞌana.
Ua buonai katoraonaꞌau hanona rauhubu maikoinai aba tubatohana.
Ea Taearanai Kahakaꞌa.
11 Rani neiana tabana hanona toꞌiobina paruai katonoꞌa raonaꞌau akana katobabaina ranina aba ekaraꞌau.
Pokina popounai haꞌikakauma raninai ibamaurika beraurana hanona atauꞌai ꞌa bariu hanona aba herekai.
12 Rabi aba niore mararani Iesu ena mai ranina hanona aba herekai.
Ua buonai wapura akakia hamahabonakia,
ia ea ena huari hoakia hamaꞌinakia.
13 Eka hoahoa patenamo ihobona mararani nahababai ꞌabana.
Aꞌi kaharipu ripu,
aꞌi kahainu ꞌari,
aꞌi kahanabau,
aꞌi kaharea,
aꞌi kahaꞌau,
aꞌi kahawamuru.
14 Obiapaka Iesu Keriso hanona emi huari habuninai katobaona,
ia hauanimi ekia nuatae akakia kiꞌa obokia aꞌi katoaꞌi taeanakia.