Eka Kuti Hoana Tohana.
12
Ua buonai uahoꞌabaꞌu e,
Tirama ena aokoꞌo rarina ꞌakina paunai nanoinimi,
hauanimi mai aomi maikoina Tirama katobena,
baibeni tabakia mauri maurikiai kateao,
katerobe Tirama aona katebanamona.
Emi kuti hoana tohanaa hanona weiana.
2 Hanopaka neiana ena hoahoa aꞌi katohobo hobo aina,
ꞌa aomi katobamaha mahanakia emi mauri katobahaeaina,
weianai Tirama ena nuatae hanona taba,
ia niaonamo aina hanona taba mai namona tohana hanona taba katoꞌiobi haraina.
Tirama Ena Ibeni Ebeniꞌo Hauna Akana Kobabaina.
3 Barai barai apaꞌuana ebenaꞌu paunai,
au wai ikoimiai nahina benimi.
Kipomi aꞌi katoraona apaꞌuanimi,
ia kipomi katoraona raona,
aomi katebero,
Tirama ehore ha ha emi aꞌikakauma aea homakia ebenimi ihobokiai.
4 Aika hauanika hanona hamona ia puana hanona eboꞌo,
ia ekia aka hanona haeai haeai.
5 Taeara ihobonai aika hanona haboꞌo,
ia Keriso aonai hanona hauani hamona,
puakia haeai haeai nahabahamomo.
6 Tirama ena aokoꞌo hoanai beruberu tabakia haeai haeai aba ebenaka,
hau ha ena beruberu hanona mahabanai reꞌa ia kemahabanai ena aꞌikakauma ihobonai.
7 Hau ha ena beruberu taꞌara aꞌi reꞌa taꞌara keaꞌi,
hau ha ena beruberu baꞌiobi reꞌa kebaꞌiobi.
8 Batabura hauna kebatabura,
baibeni hauna kebaibeni mai aona ikoinai,
ꞌuai hauna keꞌuai mai bakirona,
aokoꞌo hauna keaokoꞌo mai aonamona.
Aoka Tohanai Uahoꞌabaka Kaharaonaꞌau aina.
9 Emi raonaꞌau hanona katobatohana.
Kiꞌa tabakia ꞌarikia aꞌi katoꞌari,
namo tabakia kato babainakia.
10 Ha ha katoraonaꞌau ainimi uahoꞌabami ꞌabana,
abomo ha ha katomariki ainimi.
11 Katoaka tabura aꞌi katoꞌaboro.
Auba hiabunai Obiapaka ena taꞌara katoaꞌina mai aomi ikoinai.
12 Nuatae apaꞌuana aonai katoaonamo.
Aroꞌari ranikiai katotabura.
Rani ikoikiai katobahubaꞌari.
13 Tirama ena maearima ṯeuraru haukia katobarainakia.
Baki haukia katoaꞌi taeanakia emi ituai.
14 Tiꞌoatanimi haukia Tirama katonoina kebanamonakia,
aꞌi katoururu ainakia,
ia katoba namonakia.
15 Tiaonamo haukia kipokia katoaonamo,
weiakia tihaihai haukia kipokia katohai.
16 Ikoimiai emi miahoai aomi katehamomo.
Aꞌi katoapa,
ꞌaiaunu haukia kipokia katomiaho haeamo.
Kipomi emi aotipa aꞌi katoapainakia.
17 Hau ha ena aka kiꞌa heremiai hauna ꞌarana kiꞌai aꞌi katobamuena,
ia maearima ikoikiai wairakiai aka namokia katobabainakia.
18 Ketainimi taearanai,
maearima ikoikiai kipokia baibuai katomiaho.
19 Eꞌu hau e,
kiꞌa ꞌarana kipomi aꞌi katobamuena,
katohabona Tirama ena opuere kebabaina.
Pokina Puka robenai aba tererena,
“Obiapaka eꞌabi,
ꞌAra hore hanona au imaꞌu ai,
au kahore ꞌarana kabamuena.”
20 Haeamona tererena,
“Emu ꞌou hauna mareꞌa niꞌari
raninai aniani kobena,
abomo ꞌakona niꞌororo
raninai bei kobena.
Babai neiana kobabaina
hanona ia kobahaumaeana
ihobona matoha ꞌaranai iruba
nuhore ꞌauna.” Aot 25.21, 22
21 Aka kiꞌa kehore wai aꞌi kehaoti boanimi,
ia emi aka namokiai aka kiꞌa katohaoti boana.