Tirama Isaraela Eaokoꞌo ainakia.
11
Ua buonai au haeamona nabakai bakai,
Tirama ena maearima ebakiꞌanakia,
u?
Ahaꞌi ꞌakina.
Au abomo Isaraela hauꞌu,
Aberahamo ꞌabaꞌabana,
Beniamina ena itubu hauꞌu.
2 Tirama ena maearima etinaꞌa ꞌuainakia haukia hanona aꞌi ebakiꞌanakia.
Puka Robenai mahabanai hauna Elia robana eahuna ꞌabina wai aba toꞌiobina.
Elia ehore Tirama wairanai Isaraela haukia ehinau ainakia etibaha,
3 “Obiapaka e,
ia emu mahabanai haukia aba teahu ꞌarinakia,
mai emu itara robekia aba terubu ꞌiti ꞌitinakia,
au mo ikupaiaꞌu namiaho,
abomo titabunaꞌu kateahu ꞌarinaꞌu.”
4 ꞌA Tirama Elia ena ꞌabi ebamuena taba ṉa ehoma?
Ia etibaha,
“Au hanona kipoꞌu eꞌu maearima aba taha ꞌabaihau hamomo (7,000) baiꞌoi tiramana Baala aꞌi tekuti aina haukia abauhu ahinakia.”
5 Weiana bariu abomo taeara ihobonai maearima harina Tirama ena aokoꞌo hoanai eaꞌi taeanakia haukia ṯemiaho.
6 Tirama ena aꞌitaea hanona ena aokoꞌo hoana paunai,
ia maearima ekia aka paukiai ahaꞌi.
Ekia aka paukiai eaꞌi taeanakia raninai Tirama ena aokoꞌo hoana hanona anina ahaꞌi.a
7 Uahomana raninai taba ṉa kahahoma?
Isaraela haukia taba titabuna hauna hanona aꞌi tetabu ahina,
ia Tirama eaꞌi taeanakia haukia tebabita mo weiana tetabu ahina.
Ia harina boꞌona hanona aokia teba pahihina.
8 Puka Robenai tererena ihobona etibaha,
“Tirama ehore aokia eba
paruanakia,
mahakiai aꞌi
teihaiha mai haiakiai aia
aꞌi teona emaimo bariu.” Deu 29.4; Isa 29.10
9 Abomo Davida Tirama ehina bena etibaha,
“Ekia tatu ꞌitarana hanona rio
mai baꞌai kateꞌaeana
ba katebatoꞌonakia kateꞌeho
puma kateaꞌina.
10 Mahakia kobaparua ꞌarinakia
aꞌi kateiha,
mai kapekia
kobabeho baihanakia
rani ikoinai.” Sal 69.22, 23
Tirama Ena Bamauri Rama Haeai Haukia Teaꞌina.
11 Uahomana raninai haeamona nabakai bakai,
ia hanona rioai tetoꞌo teꞌeho aba tepua baihana,
u?
Ahaꞌi ꞌakina.
Ia ekia ꞌeho paunai rama haeai haukia bamauri aba tetabu ahina,
ba Isaraela haukia ia katewamuru ainakia.
12 Isaraela haukia ekia behoai hanopaka maearimakia banamo rarina tetabu ahina,
abomo Tirama ena bamauri aonai teꞌeho hanona rama haeai haukia banamo rarina tetabu ahina.
ꞌA Isaraela haukia ikoikiai Tirama ena bamauri aonai katetoto raninai,
banamo hanona keapaꞌua kiꞌa baha.
13 Au hanona wai rama haeai haumi nahina benimi.
Au Tirama ena iuhubeau hauꞌu rama haeai haukia ꞌeukiai paunai,
aka nababaina hauna kapaina.
14 Weiana kababaina aonai eꞌu nuatae apaꞌuana eꞌu rama haukia kaba wamurunakia Keriso kate aꞌikakaumana,
ba Tirama kehore baika kebamaurinakia.
15 Tirama Isaraela haukia ebakiꞌanakia paunai hanopaka maearimakia ehaunakia.
Ba Tirama Isaraela haukia keaꞌi totonakia raninai taba kerama?
Weiana hanona ꞌari haukia katemauri.
16 Parawa puapuana Tirama nahabena hauna erobe raninai parawa maikoina abomo erobe,
ramu erobe raninai rena abomo terobe.
17 Olibe ibato rena baika aba ikabe obo ꞌekakia Olibe ꞌaki rena pateaꞌina Olibe ibato huanai pateꞌapa toꞌona,
ramu hamonai hoho kateaꞌina,
ba oi hanona Olibe ꞌaki rena.
18 Re weiakia tekabe obonakia haukia herekiai aꞌi koapa.
Koapa reꞌa neiana koraonana,
oi hanona ramu aꞌi nubaraina,
ia ramu hanona oi nibarainiꞌo.
19 Ua buonai oi hanona koꞌabi,
“Re weiakia tekabe hurinakia ꞌekakiai au paꞌe kateꞌapa toꞌonaꞌu.”
20 ꞌAbi tohana,
ekia aꞌikakauma ahaꞌi paunai Tirama ebamohu hurinakia,
ia oi hanona emu aꞌikakauma buonai ꞌekanai okoroti.
Ua buonai aꞌi koapa,
ia kotaꞌu.
21 Pokina Tirama re tohakia aꞌi eaokoꞌo ainakia raninai,
oi abomumo aꞌi keaokoꞌo ainiꞌo.
22 Weiana buonai Tirama ena namo mai ena pahihi koraonana,
weiakia teꞌeho haukia hanona Tirama herekiai nipahihi,
ia ena namo aonai komiaho hanona oi heremuai kenamo.
Ua aꞌi kobabai aiho raninai,
oi abomo ikabe huri.
23 Ia ekia kamuri kamuri patehabonakia raninai Tirama kehore keꞌapa toꞌo muenakia,
pokina ua kebabai aiho hanona ketaina.
24 Wai rama haeai haumi hanona matoha ꞌaki matiuna rena ꞌabana,
ua buonai iꞌapa toꞌo matiu ibato hauna huanai hanona keꞌamaꞌama.
Ba Tirama kehore Olibe ibato rekia ikabe huri haukia matiukia tohakiai keꞌapa toꞌo muenakia hanona keꞌamaꞌama kiꞌa baha.
Tirama Ena Aokoꞌo Maearima Ikoikiai Ahakiai.
25 Uahoꞌabaꞌu e,
au nanuatae wai ꞌabi bunina neiana katoꞌiobina,
kipomi emi aotipa aꞌi katoapaina.
ꞌAbi bunina weiana hanona Isaraela haukia bariu baika aokia tibapahihi keaomo Tirama etinaꞌanakia rama haeai haukia ikoinai katekatoto ꞌuai.
26 Ba Isaraela haukia ikoikiai katemauri.
Puka Robenai ererena ihobonai etibaha,
“Siona ai bamauri hauna
ha kemai.
Ia kehore Iakobo ꞌabaꞌabana
herekiai Tirama iaꞌi kiꞌana
tabakia kebairu parenakia.
27 Rani weianai ekia kiꞌa
kaꞌi parenakia Au eꞌu ꞌabiꞌuai
ihobonai.” Isa 59.20, 21; 27.9
28 Iuda haukia pou namona tibakiꞌana ihobona Tirama ena ꞌou haukiai tiao hanona wai rama haeai haumi emi namo tabanai eao,
ia ꞌabaꞌabakia eaꞌi taeanakia paunai ia Tirama ena raonaꞌau aonai ṯemiaho.
29 Pokina Tirama ena apari mai ena beruberu hanona aꞌi kebahaeaina.
30 ꞌUainai wai rama haeai haumi Tirama ena ꞌabi aꞌi toaꞌi taeanakia,
ia bariu hanona wai Tirama ena aokoꞌo aba toaꞌina,
pokina Iuda haukia Tirama ena ꞌabi aꞌi teaꞌi taeana paunai.
31 Taeara ihobonai bariu Iuda haukia hanona Tirama ena ꞌabi aꞌi tiaꞌi taeana,
ꞌa aokoꞌo weiana toaꞌina ihobonai ia abokiamo Tirama ena aokoꞌo weiana kateaꞌina.
32 Tirama ehore maearima ikoikiai ꞌabi aꞌi tiaꞌi taeanakia ꞌekanai ekaiabunakia,
pokina weianai ena aokoꞌo kebaihanakia.
Tirama Atana Kahabanamona.
33 Tirama hanona eaobero
mai eaotipa kiꞌa baha
ihobona ꞌaku ꞌourana ꞌabana.
Ena raona harai ꞌabina hanona
tai kehore kehina haraina?
Ena hoahoa taearana hanona
tai kehore keꞌiobi haraina?
Tai ahaꞌi.
34 Puka robenai eꞌabi,
“Tai hanona Obiapaka
aona eꞌiobina?
ꞌao,
Tai hanona ia ena bairobe
haunai eao? Isa 40.13
35 Tai kehore taba ha
Tirama kebeni ꞌuaina
ba Tirama taba weiana ꞌarana
kehorena?” Iob 41.11
36 Taba ikoikiai ibaramakia hanona
Tirama,
taba ikoikiai Ia paunai
tekarahi,
abomo taba ikoikiai
Ia ꞌeunai kateao.
Nuabi hanona Tirama herenai
keaomo banaibanai.
Amen.