Isaraela Tirama Ena Aka Aꞌi Teiha Tinana.
10
Uahoꞌabaꞌu e,
mai aoꞌu ikoinai eꞌu nuatae abomo eꞌu bahubaꞌari niao Tirama herena,
Isaraela haukia hanona patemauri.
2 Au aꞌiobina ia hanona aokia tohanai Tirama tenuatae aina,
ia ꞌabi tohana herenai ekia ꞌiobi ahaꞌi.
3 Ia aꞌi teꞌiobina bero hanona Tirama herenai nimai,
ia kipokia mo ekia bero tebakori haukia tiaꞌi ꞌini.
Weiana buonai Tirama ena bero aꞌi teaꞌi taeana.
4 Ia Keriso hanona rauhubu ebaorena,
ba kateaꞌikakauma haukia ikoikiai hanona bero kateaꞌina.
5 Mose ehore rauhubu ai bero keaꞌina robana eahuna etibaha,
“Hau ha rauhubu taina ketai hanona ia aba kemauri.”
6 Ia bero aꞌikakaumai nimai hauna ṉa eꞌabi aiho,
“Aomiai aꞌi katoꞌabi,
Tai kekaraꞌau keao kupa?”
(Weia Keriso kebaririna.)
7 ꞌAo,
“Tai keriri keao ꞌuri aonai?”
(Weia Keriso ꞌari haukia baiatakiai kebakaraꞌauna.)
8 Taba eꞌuahina hauna hanona neiana,
“Tirama ena ꞌabi hanona wai heremiai,
pinamiai mai aomiai.”
Weiana hanona aꞌikakauma ꞌabinai,
ai ṯahore ṯairoro aina.
9 Pou hanona nahomana,
oi pinamuai kohina pouna ‘Iesu hanona Obiapaka,’
abomo Tirama hanona ia ꞌariai ebamikirina hauna aomuai koaꞌikakauma raninai oi hanona komauri.
10 Pokina aomuai oaꞌikakauma hanona aba obero Tirama wairanai,
abomo pinamuai kohina pouna hanona komauri.
11 Weiana Puka Robenai eꞌabi etibaha,
“Ia kateaꞌikakaumana haukia ikoikiai hanona aꞌi katehaumaea.”
12 Iuda mai rama haeai haukia baiatakia ekia haeai hanona ahaꞌi.
Pokina Tirama hanona hamona ikoikiai ekia Obiapaka abomo atanai ṯekuti haukia ikoikiai hanona banamo nibenakia.
13 Puka Robenai eꞌabi ihobonai,
“Obiapaka atanai tiapari
haukia ikoikiai hanona
katemauri.” Iol 2.32
14 Ba weiakia herenai aꞌi tiaꞌikakauma haukia hanona aea kateapari aihona?
Haeamona pouna aꞌi teona haukia hanona aea kateaꞌikakauma aihona?
Abomo hau ha herekiai aꞌi keiroro raninai pou aea kateoꞌo aihona?
15 Mai pou ihinana haukia aꞌi kateuhunakia raninai pou hanona aea kateiroro ai aihona?
Puka Robenai tererena ihobonai,
“Pou namona timaiaina haukia hanona aekia hama ua tenamo aiho!”
Isaraela Haukia Pou Namona Aꞌi Teaꞌitaeana.
16 Ia Isaraela haukia boꞌona hanona pou namona aꞌi teaꞌi taeana.
Isaia eꞌabi ihobona,
“Obiapaka e.
Tai hanona emai pou teaꞌikakaumana?
Tai ahaꞌi.”
17 Weiana buonai aꞌikakauma hanona pou ionai nimai,
mai aia oꞌo hanona Keriso ena ꞌabiai nimai.
18 Ia au nabakai bakai,
pou aꞌi teona,
u?
Ahaꞌi.
Pou hanona aba teona.
Puka Robenai eꞌabi,
“Aiakia hanona aba ekarahi eao
hanopaka ikoikiai aokiai,
abomo ekia ꞌabi hanona hanopaka
puana abira abira etabu
ahinakia.” Sal 19.4
19 Haeamona nabakai bakai,
Isaraela haukia obo aꞌi teobo,
u?
Ahaꞌi,
obo teobo.
Kori ꞌuaina Tirama ena ꞌabi Mose ehinana,
“Wai kabawamurunimi
hanopaka haeai maearimakia
atakia ahaꞌi haukia herekia,
mai wai kabaopuerenimi hanopaka
weiakia ekia aotipa Tirama
herenai ahaꞌi haukia herekiai.” Deu 32.21
20 Abomo Isaia aona ebataburana eꞌabi etibaha,
“Weiakia aꞌi tetabunaꞌu haukia
hanona tetabu ahinaꞌu.
Abomo aꞌi tenoinaꞌu haukia
herekiai kipoꞌu abawaira
tinanaꞌu.” Isa 65.1
21 Ia Isaraela ꞌabikia ehinana etibaha,
“Beraura hamona maikoina
imaꞌu atiu ahina weiakia
aia aꞌi tioꞌo mai tikamuri
haukia naꞌimanakia katemue.” Isa 65.2