Tirama Isaraela Haukia Etinaꞌanakia.
9
ꞌAbi tohana nahinana Keriso aonai,
au hanona aꞌi nabaiꞌoi Auba Robe abomo aoꞌu eꞌiobina.
2 Eꞌu ao koꞌo hanona eapaꞌua,
ao aroꞌari aoꞌuai hauna ena pua ahaꞌi.
3 Au kipoꞌu nanuatae hanona peururu ainaꞌu Keriso ꞌeunai paꞌeho ꞌekanai uahoꞌabaꞌu weiakia eꞌu itubu haukia patemauri paunai.
4 Ia hanona Isaraela haukia,
Tirama nahunai teao mai ena nuabi ebawaira tinana herekiai,
herekiai ꞌabiꞌuai robena ebabaina rauhubu ebenakia,
marea robe tohanai tekuti mai ꞌabiꞌuai teaꞌina.
5 Ia ꞌabaꞌabakia hanona maearima apaꞌuakia,
ia ekia kupuai hanona Keriso hauaniai erama,
ia hanona taba ikoikiai nipoki ainakia Tiramana,
kahabanamona banaibanai.
Amen.
6 Au aꞌi natibaha Tirama ena ꞌabiꞌuai hanona eꞌeho,
pokina Isaraela kupunai terama haukia reꞌa ikoikiai Isaraela haukia tohakia ahaꞌi.
7 Aberahamo ꞌabaꞌabanai mo ia ikoikiai hanona nahuna tohakia ahaꞌi.
Pokina Tirama Aberahamo ehina bena “Isako herenai katerama haukia mo ꞌabaꞌabamu ai kateao.”
8 Anina hanona miori hauaniai terama haukia hanona Tirama nahuna ahaꞌi.
Ia Tirama ena ꞌabiꞌuaiai katerama miorikia hanona Aberahamo nahuna tohakiai kateao.
9 ꞌAbiꞌuai hanona ṉa ehina aihona,
“Ihau wairai rani nahomanai au kamue hanona Sara miori ha keba ramana.”
10 Weianai mo ahaꞌi,
ia Rebeka nahuna baiꞌapaea terama hamakia hamona Isako aika ꞌabaꞌabaka ena raniai abomo ihobo.
11 Ia miori aꞌi terama baha mai taba ha namona ꞌao kiꞌa obona aꞌi tebabai bahana aonai,
Tirama ena aꞌitaea hanona aba ena nuataeai ebabaina.
12 Ekia babai paunai ahaꞌi ia ena apariai ebabaina,
Tirama Rebeka ehina bena etibaha,
“Hau pakana kehore hau iꞌirina taꞌarana keaꞌi.”
13 Puka robenai tererena ihobona etibaha,
“Au Iakobo araonaꞌau aina ia Esau ꞌarina aꞌi aꞌari.”
14 Uahomana raninai taba kahaꞌuahina?
Tirama hanona ena babai aꞌi tebero,
u?
Ahaꞌi ꞌakina.
15 Tirama ehore Mose ehina bena etibaha,
“Au pabarainakia haukia hanona
kabarainakia mai paokoꞌo ainakia
haukia hanona kaokoꞌo ainakia.” Eso 33.19
16 Ua buonai Tirama maearima etinaꞌana hanona hau ha ena nuataeai ꞌao aroꞌariai ahaꞌi,
ia Tirama ena aokoꞌoai.
17 Puka robenai Tirama Parao ehina bena etibaha,
“Au oi obia aranai ahorotiniꞌo ena poki hanona neiana.
Eꞌu hiabu heremuai kabaiha baihaina,
weianai hanopaka maikoinai au ataꞌu katehinana.”
18 Weiana buonai Tirama mo ena nuatae ihobonai keaokoꞌo ainakia haukia niaokoꞌo ainakia,
aokia keba pahihinakia haukia aokia niba pahihinakia.
Tirama Ena Opuere Mai Aokoꞌo.
19 Uahomana raninai wai ha au kohina benaꞌu kotibaha,
“Ua nihoma raninai,
aehoma buonai Tirama eka beho nitabunakia?
Tai kehore Tirama ena nuatae kekaiabuna?”
20 Eꞌu hau e,
oi hau aea homamu,
Tirama ena ꞌabi nubamuena?
Uro aꞌi kehore ebabaina hauna aꞌi kehina bena,
“Taba buonai ṉa obabai aihonaꞌu?”
21 Uro babai hauna hanona mai ena bero ia kehore tipu hamonai uro kebabainakia,
ha hanona uro namona aka apaꞌuakiai keaka,
ha hanona uro ꞌabaeana aka papakiai keaka.
22 Tirama hanona matoha uro babai hauna ꞌabana ena nuatae hanona ena opuere mai ena hiabu kebaiha baiha aina,
iamo aona niaꞌi ꞌinina niopuere ainakia haukia herekiai keaomo ꞌari ranina ebaꞌoruna hauna kemai.
23 Abomo enuatae ena nuabi apaꞌuana kebawaira tinana niaokoꞌo ainakia haukia herekiai hanona mai ena bero,
weiakia aba ebaꞌorunakia haukia hanona ena nuabi kateaꞌina.
24 Uro hanona aika eaparinaka hauka,
Iuda haukia mo ahaꞌi,
ꞌa rama haeai haukia baiatakiai abomo.
25 Mahabanai hauna Hosea ena pukai ehinana ihobona etibaha,
“Eꞌu maearima tohakia ahaꞌi
haukia kaparinakia
‘eꞌu maearima.’
Itubu weiana aꞌi naraonaꞌau aina
hauna kaparina
‘eꞌu raonaꞌau.’ Hos 2.23
26 Ehina benakia,
wai hanona au eꞌu maearima ahaꞌi
ꞌekanai haeamona keaparinakia
ia hanona Mauri Tiramana
nahuna.” Hos 1.10
27 Mahabanai hauna Isaia Isaraela haukia poukia ehinana etibaha,
“Isaraela maearimakia pateboꞌo
kiꞌa poe ꞌanona ꞌabana,
ia harina bita ꞌakimo bamauri
kateaꞌina.
28 Obiapaka kehore noanoai bakai
ꞌabina hanopakai kehore hore
haraina.” Isa 10.22, 23
29 Ihobonai mo Isaia ehina ꞌuaina ꞌabana,
“Tabura Obiapakana ꞌabaꞌabamai
baika aꞌi pehabonakia raninai
ai hanona Sodoma mai Gomora
ihobokiai pataeao.” Isa 1.9
Rama Haeai Haukia Teaꞌikakauma Ia Isaraela Haukia Aꞌi Teaꞌikakauma.
30 Ua buonai taba ṉa kahahoma?
Rama haeai haukia bero aꞌi titabuna ia aba teaꞌina,
weiana hanona aꞌikakaumai teaꞌina.
31 Ia Isaraela haukia rauhubu taearanai bero tetabuna,
ia aꞌi tetabu ahina.
32 Taba buonai aꞌi teaꞌina?
Pokina aꞌikakaumai aꞌi tetabuna ia teraonana akai katetabu ahina.
Ia haukia kaikai rea piharanai weia tekai.
33 Puka Robenai tererena ihobona etibaha,
“Moihana Siona oeo aonai
pihara ha ahorotina
weianai maearima kebakai kai
reanakia,
haeamona wairo
piharana weiana kehore
kebaꞌehonakia.
Ia tai niaꞌikakauma hauna
hanona aꞌi kehaumaea.” Isa 8.14; 28.16