Keriso Eka Kiꞌa Eaꞌi Obo Ia Auba Robe Ebenaka.
8
Weiana buonai bariu Keriso Iesu aonai ṯemiaho haukia hanona puma ha aꞌi katehoaina.
2 Pokina Keriso Iesu paunai Auba Robe rauhubuna mauri nimaiaina hauna ehore kiꞌa mai ꞌari rauhubuna ꞌeukiai aba erubu obonaꞌu.
3 Hauani ena ꞌabeꞌabe paunai rauhubuai aꞌi ketaina ꞌekanai Tirama ehore ebabaina.
Ia ehore Nahuna hamomona euhuna,
kiꞌa hauna ꞌabana kiꞌa ꞌaranai eao,
maearima ekia puma ikoinai ehoaina.
4 Weiana hanona aika hauani ena aka kiꞌa obokia aꞌi nahababai,
Auba Robe ena nuataeai nahamiaho hauka aokai rauhubu ena nuatae bero akana kebaore haraina.
5 Hauani ena nuataeai ṯemiaho haukia hanona hauani tabakia mo tiraonanakia,
ia Auba Robe ena nuataeai ṯemiaho haukia hanona Auba Robe ena aka tabakia tiraonanakia.
6 Hauani ena raona keꞌuai aina puana hanona ꞌari,
ia Auba Robe ena raona keꞌuai aina puana hanona mauri banaibanai mai baibua.
7 Hauani ena raona neꞌuai aina hanona Tirama niꞌoatana,
pokina weiana hanona Tirama ena rauhubu aꞌi nikaꞌaina abomo kebabaina aꞌi ketaina.
8 Weiakia hauani ena raonai ṯemiaho haukia hanona Tirama ibaonamonai hanona aꞌi ketaina.
9 Ia wai Tirama ena Auba Robe aomiai nemiaho raninai,
wai hanona hauanimi aꞌi nibakaꞌanimi,
ia Auba Robe nibakaꞌanimi.
Ia hau ha aonai Keriso ena Auba ahaꞌi hauna hanona Keriso ena maearima ahaꞌi.
10 Aomiai Keriso nemiaho raninai hauanimi hanona abeꞌari kiꞌa paunai,
ia aubami hanona emauri bero paunai.
11 Ia Tirama Aubana weiana Iesu ꞌariai ebamikirina hauna aomiai nemiaho raninai Keriso Iesu ꞌariai ebamikirina Tiramana kehore wai hauanimi kateꞌari haukia abomo keba maurinakia ena Auba Robe aomiai nemiaho paunai.
Auba Robe Eaoainaka Tirama Nahunai Haeao.
12 Weiana paunai uahoꞌabaꞌu e,
aika hanona kahaka,
ia hauani ꞌeuna ꞌara horeai ahaꞌi,
abomo hauani ena nuataeai aꞌi kahamauri.
13 Pokina hauani ena nuatae ꞌekakiai komiaho raninai oi hanona koꞌari Tirama wairanai,
ia Auba Robe ena nuataeai hauani ena aka kiꞌa obokia koba ꞌarinakia raninai oi hanona komauri banaibanai.
14 Pokina weiakia Tirama ena Auba Robe neꞌuai ainakia haukia hanona Tirama nahuna.
15 Wai hanona taꞌaraꞌi mai taꞌu aubana aꞌi toaꞌina ia Auba Robe toaꞌina,
weiana hanona niaoainimi Tirama nahunaia tuao,
Auba Robe weiana hiabunai Tirama nahaparina,
“Hamaꞌu,b
au Hamaꞌu.”
16 Auba Robe weiana aika aubaka ohi tibatohana aika hanona Tirama nahuna.
17 Bariu aika Ia nahuna raninai aika hanona barina kahaꞌina hauka.
Tirama barina kahaꞌina hanona Keriso kipokia Ia nahunai kahaeao Tirama barina kahaꞌina.
Weiana Keriso kipokia ena haiara kahahaiara aina raninai ia nuabina abomo kahaꞌina.
Wairai Kupa Aiaranai Nuabi Aonai Kahamiaho.
18 Au naraonana bariu rani neiana aika nahahau haiara aina hanona taba papakia,
ia nuabi weiana muriai aika ꞌeukai kewaira tina hauna keapaꞌua kiꞌa baha.
19 Tirama ebabai tabakia ikoikiai hanona tibaiꞌimai ekia nuatae apaꞌuana Tirama nahuna katewaira tina.
20 Pokina terama tabakia ikoikiai hanona taba anikia ahaꞌi baꞌanai ṯemiaho,
ꞌa ekia nuataeai ahaꞌi,
ia Tirama ena nuataeai.
21 Terama tabakia hanona hauani parina ena ibiri ꞌiniai kateirubu,
Ba Tirama nahuna ekia nuabi irubuna aonai katemiaho haeamo.
22 Weiana aika haꞌiobina terama tabakia maikoinai hanona mai ao pumakia matoha babiꞌe miori keba ramana haiarana ꞌabana emai mo bariu rani neiana.
23 Iamo ikupaiakia ahaꞌi,
Tirama ena buabua koriꞌuaina Auba Robe haꞌina hauka abomo aoka niao puma mai nahabaiꞌima Tirama nahunai kebaonaka mai hauanika maikoina kebamaurinakia.
24 Aika nuatae apaꞌuana neianai mauri haꞌina.
Ia nuatae apaꞌuana weiana aba haihana raninai aꞌi kahanuatae aina.
Tai hanona taba aba eaꞌina hauna nuatae apaꞌuanai kebaona?
25 Ia taba aꞌi nahaꞌi bahana hauna nahanuataeai apaꞌuana raninai,
aika hanona mai bakiroka kahabaiꞌima.
26 Taeara ihobonai Auba Robe hanona nibarainaka eka ꞌabeꞌabe aokiai,
aika aea kahabahubaꞌari aiho hanona aꞌi nahaꞌiobina,
ia Auba Robe kipona nihore nibahubaꞌari mai ao pumana maearima keꞌabi aꞌi ketaina haunai ninoinoi aika paukai.
27 Abomo maearima aokia neihanakia Tiramana hanona Auba Robe ena raona tabana eꞌiobina,
pokina Auba Robe hanona Tirama ena maearima paukiai ninoinoi Tirama ena nuatae ihobonai.
28 Aika nahaꞌiobina Tirama ebabainakia tabakia ikoikiai hanona tiaka haeamo Tirama tiraonaꞌau aina haukia mai ena nuataeai eaparinakia haukia ibanamokiai.
29 Pokina Tirama weiakia eꞌiobi ꞌuainakia haukia ebaꞌorunakia Nahuna ihobonai kateao,
ba Keriso hanona hau pakanai keao uahoꞌabana ikoikiai baiatakiai.
30 Ebaꞌorunakia haukia ia ehore eaparinakia,
eaparinakia haukia ia ehore beroai ebaonakia,
beroai ebaonakia haukia ia ehore ena nuabi ebenakia.
Taba Ha Tirama Ena Raonaꞌau Herenai Aꞌi Keaꞌiparenaka.
31 Uahomana raninai taba neiakia aea kaharoba ahuai aihonakia?
Tirama aika nitainaka raninai tai hanona aika keꞌoatanaka?
Tai ha ahaꞌi.
32 Ia nahuna hamomona aꞌi eubo aina,
aika ikoikai paukai ebaibeni ai ꞌabaeana.
Nahuna ebenaka buonai taba ikoikiai abomo kebeni ꞌabaeanaka.
33 Tai kehore Tirama ena aꞌitaea haukia atetua ꞌekanai kehorotinakia?
Tai ha ahaꞌi.
Tirama hanona ia niba tohanakia aꞌi tebeho.
34 Ba tai hanona puma kebenakia?
Tai ha ahaꞌi.
Pokina Keriso Iesu eꞌari,
haeamona emikiri mue,
ia hanona Tirama itipana tainai nemiaho,
aika paukai ninoinoi.
35 Tai kehore Keriso ena raonaꞌau ai keaꞌi parenaka?
Atetua kehore ꞌao bahaiara kehore ꞌao baiꞌoata kehore ꞌao arobo kehore ꞌao uraru kehore ꞌao taꞌu kehore ꞌao kareba kehore ꞌao?
Tai ha ahaꞌi.
36 Atetua weiakia hanona Puka Robenai tererena ihobona etibaha,
“Ai hanona oi paumuai rani
ikoikiai ꞌari ṯawairana,
ai hanona mamoe ai tibaonamai
kateahu ꞌarinamai.” Sal 44.22
37 Ia taba neiakia ikoikiai aokiai aika hanona hatarahi,
niraonaꞌau ainaka hauna paunai.
38 Pokina au aba aꞌiobi tohana,
weiana ꞌari ꞌao mauri,
anerukia ꞌao hiabu aubakia,c
bariu ṯemiaho tabakia ꞌao wairai katemai tabakia,
hiabu haeai haeai,
39 hano ꞌubinai ꞌao hano baꞌanai,
terama tabakia ikoinai ha kehore Tirama ena raonaꞌau herenai aꞌi keaꞌi parenaka,
pokina aika eka Obiapaka Iesu Keriso aonai nahamiaho paunai.