Keriso Rauhubu ai Erubunaka.
7
Uahoꞌabaꞌu e,
au hanona wai rauhubu toꞌiobina haumi nahina benimi,
wai aba toꞌiobina rauhubu hanona maearima nipoki aina maurina nemiaho aonai mo.
2 Rauhubu paunai babiꞌe ha atawana herenai kemiaho hau ena mauri beraurakia ikoikiai,
ia hau keꞌari raninai ia hanona hawainibe rauhubuna herenai aba irubu taꞌi.
3 Weiana buonai hau nemiaho oho aonai babiꞌe kemikiri hau haeai ha keatawana raninai ia hanona nabau babiꞌena kahahinana.
Ia hau keꞌari raninai ia hanona rauhubu herenai aba irubu taꞌi.
Hau haeai ha keatawana reꞌa ia nabauna aꞌi kahahinana.
4 Weiana buonai uahoꞌabaꞌu e,
wai abomo Keriso ena ꞌari paunai rauhubu ꞌeunai toꞌari,
ba Keriso ꞌariai emikiri hauna herena tuao,
buabuaka katerama Tirama ꞌeunai.
5 Aika hauani ena nuataeai hamiaho aonai,
raona kiꞌa obokia terama rauhubu ꞌeunai teaka hauanikai ba buabuakia habaramanakia puana hanona ꞌari.
6 Ia aika ebiri ꞌininaka tabana herenai aba haꞌari buonai bariu rauhubu herenai aba terubu taꞌinaka,
weiana buonai aika hanona taeara mahamahana Auba Robe ꞌeunai taꞌara kahaꞌi,
ia rere rere ꞌaiꞌainai ahaꞌi.
Kiꞌa Ehore Ebaꞌarinaka.
7 Ua buonai taba kahaꞌuahina?
Rauhubu hanona ekiꞌa?
Ahaꞌi ꞌakina.
Rauhubu ehore au ebaꞌiobinaꞌu kiꞌa hanona taba.
Rauhubu aꞌi kehina benaꞌu,
“Oi taba ha aꞌi konuataeai ꞌabaeana.”
raninai,
au aꞌi kaꞌiobina nuatae ꞌabaea hanona taba.
8 Ia kiꞌa ehore taearaꞌu etabu rauhubu ꞌabinai weia nuatae ꞌabaea haeai haeai aoꞌuai ebaramanakia,
ia rauhubu keahaꞌi raninai,
kiꞌa hanona eꞌari ꞌabana ena hiabu ahaꞌi.
9 ꞌUainai au hanona rauhubu aꞌi aꞌiobina aonai araonana namoꞌu ai amauri amiaho,
iamo rauhubu ꞌabina aꞌiobina aonai kiꞌa hanona aiha tinana emauri mauri,
au hanona aꞌari ꞌabana.
10 Rauhubu neiana hanona mauri ebaihanaka tabana,
ia au ꞌeuꞌuai ia hanona ꞌari tabanai eao.
11 Pokina kiꞌa ehore taearaꞌu etabu rauhubuai eꞌoinaꞌu ba ꞌari hauꞌu ai ebaonaꞌu.
12 Ia rauhubu kipona hanona erobe,
rauhubu ꞌabina kipona abomo erobe,
weiakia hanona tebero mai tenamo.
13 Uahomana raninai taba namona weiana hauna ehore au eꞌu ꞌari tabanai eao,
u?
Ahaꞌi ꞌakina.
Rauhubu ꞌabina namonai kiꞌa ehore au hereꞌuai ꞌari ebaramana buonai,
kiꞌa hanona iꞌiobi haraiai keao,
rauhubu ꞌabina paunai kiꞌa hanona kiꞌa tohanai eao.
Kiꞌa Eka Mauri Nipoki aina.
14 Haꞌiobina rauhubu hanona Tirama ꞌeunai emai,
ia au hanona hauani ꞌeunai aeao,
kiꞌa ehore ekawanaꞌu ena taꞌara iaꞌinai naeao.
15 Au taba nababaina hauna obona aꞌi naobo,
pokina nanuatae aina kababaina hauna aꞌi nababaina,
ia taba ꞌarina aꞌi naꞌari hauna nababaina.
16 Rauhubu ehore namo mai kiꞌa ebaihanaka.
Ba taba aꞌi nanuatae aina hauna nababaina raninai,
au nabatohana rauhubu hanona enamo.
17 Ua buonai nababaina hanona au kipoꞌu tohaꞌu ahaꞌi,
ia kiꞌa aoꞌuai nemiaho hauna.
18 Au naꞌiobina taba ha namona aoꞌu ai aꞌi nemiaho,
weiana hauaniꞌu ena nuataeai aꞌi nemiaho,
pokina au taba namona nanuatae aina kababaina ia ibabainai hanona aꞌi nitaina.
19 Aka namona nanuatae aina kababaina hauna aꞌi nababaina,
haeamona aka kiꞌa obokia ibabaikia aꞌi nanuataeai haukia nababai toꞌo baihana.
20 Ia taba aꞌi nanuatae aina hauna nababaina raninai,
nibabaina hauna hanona au tohaꞌu ahaꞌi,
ia kiꞌa aoꞌuai nemiaho hauna niaka.
21 Weiana au aka taearana ha atabu ahina,
au eꞌu nuatae aka namona kababaina,
ia aka kiꞌa obokia mo tiwaira tina.
22 Aoꞌu tohana Tirama ena rauhubu niaonamo aina.
23 Ia hauaniꞌu ai rauhubu haeai niaka aihana,
rauhubu weiana rauhubu aoꞌuai nemiaho hauna nehuarina,
weiana hanona hauaniꞌu ai niaka kiꞌa ena rauhubu baꞌanai nebirinaꞌu nibawapuranaꞌu.
24 Au kiꞌaꞌu,
aokoꞌoꞌu!
Tai kehore au hauaniꞌu neiana niaoainaꞌu ꞌari ꞌekanai hauna herenai kebamaurinaꞌu?
25 Ia Tirama napaina Iesu Keriso eka Obiapaka eba maurinaꞌu paunai.
Ua buonai eꞌu mauri hanona nahomana,
au aoꞌu tohana hanona Tirama ena rauhubu taꞌarana iaꞌinai niao,
ia hauaniꞌu hanona kiꞌa ena rauhubu taꞌarana iaꞌinai niao.