Kiꞌa ꞌEunai Kahaꞌari Ia Keriso ꞌEunai Kahamauri.
6
Uahomana raninai aika ꞌabi tabana kahaꞌuahina?
Tirama ena aokoꞌo hoana keapaꞌua paunai kiꞌa kahababai toꞌo baihana, u?
2 Ua aꞌi kehoma.
Aika kiꞌa herenai aba haꞌari kiꞌa hiabunai hakaobo ba aehoma buonai kiꞌa aonai kahamiaho mue?
3 Aika Keriso Iesu kipokia aba ebaꞌuere robenaka hauka hanona ena ꞌariai abomo kipokia aba ebaꞌuere robe haeamonaka,
weiana aꞌi toꞌiobina, u?
4 Ua buonai ꞌuere robeai aika hanona ia kipokia haꞌari abomo ia kipokia tehorenaka,
weiana Keriso Hamana nuabina hiabunai ꞌariai ebamikiri muena.
Ua buonai aika abomo mauri mahamahanai kahamiaho.
5 Aika ia kipokia haꞌari haeamo raninai ia ꞌariai emikiri mue ihobonai aika abomo ꞌariai kahamikiri mue.
6 Aba haꞌiobina aika hauka ꞌaiꞌainaa Keriso kipokia matiu ibiri ropo ꞌubinai aba teꞌari hanona hauka ena kiꞌa hiabuna aba weia iaꞌi obo,
ba aika hanona kiꞌa taꞌarana aꞌi kahaꞌi mue.
7 Pokina eꞌari hauna hanona kiꞌa hiabunai aba irubu.
8 Bariu aika Keriso kipokia haꞌari raninai,
nahaꞌiobi tohana aika hanona ia kipokia kahamiaho oioi.
9 Pokina nahaꞌiobina Keriso hanona ꞌariai emikiri mue ba aꞌi keꞌari mue,
ꞌari hanona ia aꞌi kepoki ai muena.
10 ꞌAri ia eꞌari aina hauna hanona kiꞌa ikoikiai kebaorenakia paukiai rani hamonai eꞌari,
ia mauri nimauri aina hauna hanona Tirama nuabina paunai nimauri.
11 Taeara ihobonai wai abomimo kipomi katoꞌiobinimi,
kiꞌa herenai aba toꞌari,
ia Tirama ꞌeunai aba tomauri Keriso Iesu aonai.
12 Weiana buonai kiꞌa kehore hauanimi keꞌari hauna aꞌi kepoki aina ena nuatae akakia kiꞌa obokia aꞌi katoaꞌi taea.
13 Abomo hauanimi papana ha kiꞌa aonai aꞌi katohorotina,
kiꞌa akakia tabanai aꞌi keao,
ia kipomi katobaibeni ainimi Tirama herenai ihobona weiakia ꞌariai temauri mue haukia ꞌabana,
hauanimi maikoina katobena,
ia kehore bero akakia tabanai kebaonimi.
14 Kiꞌa hanona wai emi poki haunai aꞌi keao,
pokina wai hanona rauhubu baꞌanai aꞌi ṯomiaho,
ia Tirama ena aokoꞌo hoana baꞌanai ṯomiaho.
Bero Tohana Taꞌarana Kahaꞌi.
15 Ba aea kahahoma?
Rauhubu baꞌanai aꞌi nahamiaho ia Tirama ena aokoꞌo hoana baꞌanai nahamiaho buonai kiꞌa kahababai,
u?
Ahaꞌi ꞌakina.
16 Wai aba toꞌiobina weiana kipomi tubaibeni ainimi hau ha herenai aiana tuona raninai ena taꞌara iaꞌinai tuao ꞌabana.
Ua buonai kiꞌa ena taꞌara iaꞌinai niao ainimi ꞌari ꞌekana ꞌao Tirama aiana ionai niao ainimi bero ꞌekana.
17 Tirama kahabanamona.
Pokina ꞌuainai wai hanona kiꞌa ena taꞌara iaꞌinai toao,
ia bariu wai aomi maikoina tebaꞌiobinimi ꞌabina weiana toaꞌi taeana.
18 Wai kiꞌa herenai aba eirubunimi,
bariu bero ena taꞌara iaꞌinai tuao.
19 Maearima ꞌabiꞌabinai naꞌabi pokina aomi aꞌi niea paunai.
ꞌUainai hauanimi tobaibeni aina aka kiꞌa obokia mai ripuripu taꞌarakia iaꞌinai toao ihobonai,
bariu hanona hauanimi bero ena taꞌara iaꞌinai tomobaibeni,
wai katorobe.
20 Wai kiꞌa ena taꞌara iaꞌinai toao aonai wai hanona bero tohabo ꞌabaeana.
21 Rani weiakiai aka kiꞌa obokia buabuakia hanona taba totabu ahina?
Bariu tuhaumaeai tabakia mo.
Taba weiakia puakiai hanona ꞌari.
22 Ia wai bariu hanona kiꞌai aba irubu obo,
ba Tirama ena taꞌara iaꞌina haumiai tuao.
Ua buonai buabuami hanona robe taearana tohanai,
puanai hanona mauri banaibanai.
23 Pokina kiꞌa ꞌarana hanona ꞌari,
ia Tirama ena beruberu apaꞌuana hanona mauri banaibanai Keriso Iesu aika eka Obiapaka kipokia.b