Beroka Ehinana Paunai Kahaonamo.
5
Weiana eka aꞌikakaumai bero haꞌina buonai Tirama kipokia baibuai kahamiaho Iesu Keriso eka Obiapaka paunai.
2 Aika nahaꞌiobina aꞌikakauma taearana weianai hatoto ia paunai aokoꞌo hoana neiana aonai aba nahamiaho,
raona apaꞌuana weiana Tirama ena nuabi aonai kahatoto hauna nahaonamo aina.
3 Weiana mo ahaꞌi,
ia haiara ranikiai abomo nahaonamo,
pokina naha ꞌiobina haiara nihore bakiro nibaramana,
4 Bakiro nihore rabo harai nibaramana,
abomo rabo harai nihore raona apaꞌuana nibaramana.
5 Raona apaꞌuana neiana hanona abiabika aꞌi keaꞌi kiꞌana,
pokina Tirama ena raonaꞌau Auba Robeai eheina aika aokai,
Auba Robe weiana hanona Tirama ebaibeni aika ꞌeuka.
6 Aika kipoka bero kahatabuna aꞌi etaina aonai Tirama enuatae ranina tohanai Keriso eꞌari aka kiꞌa hauka paukai.
7 Hau ha bero hauna paunai keꞌari hanona kepahihi.
Paꞌe baika katenuatae reꞌa namo hauna paunai kateꞌari.
8 Ia kiꞌai hamiaho oho aonai Keriso eꞌari aika paukai,
Tirama ena raonaꞌau ua ebaiha aihonaka.
9 Ua buonai Keriso eꞌari aruarunai Tirama bero ebenaka.
Aika nahaꞌiobi haraina ia paunai Tirama ena opuere aonai kebamaurinaka.
10 Aika hanona Tirama ena ꞌou haukai haeao aonai Nahuna eꞌari paunai kipokia habaibua,
aba habaibua hauka nahaꞌiobi haraina Keriso ena mauriai kebamaurinaka.
11 Weiana mo ahaꞌi,
aika abomo Tirama aonai nahaonamo eka Obiapaka Iesu Keriso paunai bariu aika Tirama kipokia aba habaibua.
Adamu ꞌEunai ꞌAri Emai Ia Keriso ꞌEunai Mauri Emai.
12 Hau hamona paunai kiꞌa hanopakai etoto,
kiꞌa ehore ꞌari etoto aina,
ua buonai ꞌari emai maearima ikoikiai herekia,
taeara weianai ikoikiai teaka kiꞌa.
13 Kiꞌa hanona aba erama ꞌuai hanopakai,
ba rauhubu tebaibeni.
Rauhubu ahaꞌi paunai kiꞌa hanona kiꞌai aꞌi tebaona.
14 Ia ꞌari hanona epoki Adamu ena raniai emai mo Mose ena raniai,
maearima ikoinai Adamu ena aka kiꞌa ihobonai aꞌi tebabai kiꞌa haukia abomo teꞌari.
Ua buonai Adamu hanona muriai kemai hauna ibabataina.
15 Ia Tirama ena beruberu hanona Adamu ena kiꞌa ꞌabana ahaꞌi.
Pokina hau hamona ena kiꞌa paunai maearima boꞌona teꞌari,
ia Tirama ena aokoꞌo hoana hanona eapaꞌua kiꞌa baha,
Adamu ena kiꞌa etara haona weiana hanona ena aokoꞌo hoana beruberuna hau hamona Iesu Keriso paunai boꞌona katemauri.
16 Haeamona Tirama ena beruberu apaꞌuana mai hau hamona ena babai kiꞌa terarua hanona aꞌi teihobo,
hau hamona ena babai kiꞌai beho bakaina emai,
ia beruberu apaꞌuana emai bero ebaramana.
17 Hau hamona ena aka kiꞌa paunai ꞌari ehore epoki ainakia,
aika nahaꞌiobi haraina weiakia Tirama ena aokoꞌo hoana apaꞌuana ebaꞌoruna hauna mai bero beruberuna kateaꞌina haukia mauri banaibanai aonai katepoki hau hamona Iesu Keriso paunai.
18 Weiana buonai hau hamona ena aka kiꞌai maearima ikoikiai puma teaꞌina,
abomo hau hamona ena aka beroai bero emaiaina maearima ikoikiai mauri banaibanai ebenakia.
19 Hau hamona ena aia oꞌo ahaꞌi paunai maearima boꞌona kiꞌa haukiai teao,
abomo hau hamona ena aia oꞌoai maearima boꞌona bero haukiai kateao.
20 Rauhubu ekori hanona maearima ekia kiꞌa kateiha haraina ia ekia kiꞌa eapaꞌua hao apaꞌua hao.
Ia kiꞌa eapaꞌua ꞌekanai Tirama ena aokoꞌo hoana hanona eapaꞌua haonakia.
21 Weiana buonai kiꞌa epoki ꞌari taearanai abomo Tirama ena aokoꞌo hoana bero taearanai kepoki keaoainaka mauri banaibanai ꞌekana Iesu Keriso eka Obiapaka paunai.